Esekelo 47 - Baibo Busansulushi Bwa Libuku Ili

Kalonga kakunka kuswa muŊanda yakwe Lesa

¹ Mpeeke muntu uyo wakantola kumwinjililo wa Ŋanda yakwe Lesa. Lyalo ndakabona maanshi kaaswa mumwinjililo akunookunkila kwicwe uko kwakalinga kulangite Ŋanda yakwe Lesa. Maanshi aya akalinga kuswa panshi kulubasu lya kumalenge lya Ŋanda yakwe Lesa akuya mukwiinda kumalenge lya cipaililo.

² Kuswawaawo muntu uyo wakankusha muŊanda yakwe Lesa kwiindila kumwinjililo wa kumatwa akunshingulusha kuntola kumwinjililo ulangite kwicwe. Uku kwakalinga kalonga kakalinga kukunka kuswa kumalenge lya mwinjililo.

³ Lyalo muntu uyo wakalulama kwicwe akupima kalonga ako akasamu kakupimishaako. Wakapima muya kalonga kwa mushinso wa mamita ali 500 akundwiita ayi nsubukile waawo mpwaakeela. Pakusubuka, maanshi akanshika mutupokoso.

⁴ Kuswawaawo wakapima aumwi mushinso wa mamita ali 500 apo maanshi mpaakanshika mumanungo pakusubuka. Wakapima aumwi mushinso wa mamita ali 500 apo maanshi paakanshika mubukome pakusubuka.

⁵ Wakapima aumwi mushinso wa mamita ali 500 apo maanshi mpaakalinga alaamfu cakwaamba ayi ndakaalilwa kusubukilawo. Apo kalonga kakalinga kalaamfu cakutasubukilawo kooenda, sombibo kusamba njabwe.

⁶ Mpomunyaawo muntu uyo wakandwiita ayi, “Webo omuntu, uboneshe kabotu kabotu shintu ishi.” Lyalo muntu uyo wakantola kuloombe lwa mulonga.

⁷ Ono ndindakashika kooko, ndakabona shisamu shiinji kumbasu shobilo shoonse sha mulonga uyo.

⁸ Mpeeke wakandwiita ayi, “Maanshi aya alakunka kwiinda mucishi kululama kwicwe kuya mukulokela muCinyika ca Joodani tibili amuLweenge lwa Mwiinyo. Ono maanshi ayo ashika muLweenge ulo, alalengesha maanshi a mwiinyo kuba maanshi abotu.

⁹ Koonse uko mulonga uyo nkweenga wakunkila, kulaakuba mishobo amishobo ya banyama alimwi answi. Mulonga uyo ulaakubotesha maanshi amuLweenge lwa Mwiinyo alimwi uko koonse nkweenga wakunkila ulaakulengesha ayi kukabe buumi.

¹⁰ Nkokwaamba ayi kutalikilabo kuKantupu ka Eni Gedi kuya mukushika akuKantupu ka Eni Egilaimu kulaakuba beshikucaya nswi kuloombe lwa lweenge. Kumisena iyo, bantu balaakunooyanika toombe ashalo nswi shilaakufula anga muLweenge lwa Mediteleniyani.

¹¹ Sombi maanshi alo ali mushitolo kuloombe lwa lweenge teshi akanooliiwo abotu, sobwe. Alo alaakunoolibo maanshi a mwiinyo kwaamba ayi bantu bakanoocanako mwiinyo.

¹² Kulubasu lomwi alomwi lwa mulonga kulaakumena shisamu sha mishobo amishobo sheshi shikanoocata shisepo. Matewu a shisamu isho teshi akanooyumaawo alimwi shisamu isho teshi shikacilekeewo kucata, sobwe. Shilaakunoocata shisepo shipya mweenshi amweenshi ceebo shilaakunootililwa amaanshi aswa kuŊanda yakwe Lesa. Shisamu shilaakunoocata shisepo shilikwa aalo matewu alaakunoosebenseshekwa kushilika bantu.”

Nyinsa sha cishi

¹³ Mpeeke Mwaami Lesa Shinkusu shoonse wakaamba ayi, “Nyinsa sha shipansha sha cishi isho nsheshi mukabaanye mikowa ili likumi ayobilo ya bene Isilaeli nsheeshi. Mukowa wakwe Josefu ulyeelete kupekwa shipansha shobilo.

¹⁴ Ndakashomesha cakulumbila kaantambikite lyaansa lyangu kubamashali banu bakulukulu kwaamba ayi ndaakubapa cishi cino ayi ncabo. Aboobo mulyeelete kwaabana shipansha sheelene pakati kanu.

¹⁵ “Nyinsa yakumatwa ilaakunooswa kuLweenge lwa Mediteleniyani akululama kwicwe mundabala inene ya Etiloni kuya mukwiinda kumwinjililo wa kuAmati, njeeyo kundabala inene ya Sedadi.

¹⁶ Kuswa kooko ilaakuya mukwiinda kundabala inene ya Belota aya Sibulaimu. Mandabala aya ali panyinsa ili pakati ka bulelo bwa Damasikasi alimwi abwa Amati. Kuswa kooko ilaakuya mukwiinda kundabala inene ya Asa Atikoni iyo ibetele panyinsa ya cishi ca Aulani.

¹⁷ Aboobo nyinsa ya kumatwa ilaakunooswa kuLweenge lwa Mediteleniyani kululama kwicwe kundabala inene ya Asa Enoni, nyinsa ya Damasikasi alimwi aya Amati kaili kulubasu lwakumatwa.

¹⁸ “Nyinsa yakwicwe ilaakululama kumalenge kutalikila pakati ka cishi ca Damasikasi aca Aulani uko Mulonga wa Joodani nkweshi ukabe nyinsa ya cishi ca Isilaeli acishi ca Gilyadi kuya mukushika kundabala ya Tama ili kuLweenge lwa Mwiinyo.

¹⁹ “Nyinsa yakumalenge ilaakuswa kuTama akululama kushishiba sha kuKadeshi Meliba kuya mweela nyinsa ya Ijipiti tibili akuLweenge lwa Mediteleniyani.

²⁰ “Nyinsa yakumbo ilaakuba Lweenge lwa Mediteleniyani kuya kumatwa tibili akumusena uli kumbo lya mwinjililo wa kuAmati.

²¹ “Mulyeelete kubaana cishi ico kweelana amikowa yanu

²² ceebo cilaakuba caanu kwalyoonse alyoonse. Baswamashi bashiite pakati kanu abo bacite baana bakashalilwa kokuno, abalo balyeelete kupekwa cipansha ca cishi mwaakunokwaabaanya. Mulyeelete kubacitabo anga abalo mbene Isilaeli beene beene. Mwaakunokuuma cisolo pakwaabana cishi, abalo balyeelete kuumaako ayi bapekweko shipansha sha cishi pantu pomwi abene Isilaeli beene beene.

²³ Muswamashi womwi awomwi ulaakupekwa cipansha cakwe pantu pomwi abamumukowa uyo ngweekalaamo. Nebo neMwaami Shinkusu shoonse ndaamba.