Esekelo 46 - Baibo Busansulushi Bwa Libuku Ili

Muleli anshiiku shakusekelela

¹ Mwaami Lesa Shinkusu shoonse wakaamba ayi, “Mwinjililo wakwicwe uya kulubansa lwa mukati ulyeelete kunoocalitwebo panshiku shosanwe abomwi shakusebensa akucalulwa pabushiku bwakookesha bwa Cibelu alimwi apabushiku bwakusekelela Mweenshi Upya.

² Muleli ulyeelete kwiinda kumwinjililo wakwicwe pakuswa kulubansa lwa pansengwe kwinjila mucipinda cakwinjililaako akuya mukwiimikana kushisamu sha kumwinjililo, bapailishi pakunoobenga milambu yakwe yakutenta alimwi amilambu ya bwanabwankashi. Ono muleli lakwe ulyeelete kulambilila kweenka uko kumwinjililo, amanisha nkokuboolela. Mwinjililo uyo tooelete kucaalwa kushikila macolesha.

³ Bushiku bomwi abomwi bwakookesha bwa Cibelu alimwi apabushiku bomwi abomwi bwakusekelela Mweenshi Upya, bantu boonse balyeelete kulambila Mwaami Lesa kunembo lya mwinjililo uyo.

⁴ “Ono pabushiku bwakookesha bwa Cibelu muleli ulyeelete kuleta bana ba mbelele basankwa bosanwe awomwi alimwi ambelele isankwa yomwi, shoonse kashitacite tumpenda ayi njimilambu yakutenta kuMwaami Lesa.

⁵ Pambelele isankwa yomwi ayomwi ulyeelete kwiilikaawo acipo ca malita ali 17.5 a fulaulo. Apalo pamwanaambelele womwi awomwi ulyeelete kwiilikaawo amweelo wa shipo uli woonse ngweenga kaasuni. Pacipo comwi acomwi ca fulaulo, ulyeelete kwiilikaawo amalita ali 3 a mafuta a olifi.

⁶ Pabushiku bwakusekelela Mweenshi Upya, ulyeelete kubenga mucende mwaana, bana ba mbelele bali bosanwe awomwi alimwi ambelele isankwa, shoonse kashitacite tumpenda.

⁷ Pamucende womwi awomwi ambelele isankwa yomwi ayomwi ulyeelete kwiilikaawo acipo ca malita ali 17.5 a fulaulo. Apalo pamwanaambelele womwi awomwi ulyeelete kwiilikaawo amweelo wa shipo uli woonse ngweenga kaasuni. Pacipo comwi acomwi ca fulaulo, ulyeelete kwiilikaawo amalita ali 3 a mafuta a olifi.

⁸ Muleli pakuswa kucipinda cakwinjililaako ca mwinjililo, ulyeelete kwiinda kweenka nkwaanjilila.

⁹ “Bantu na besa mukulambila Mwaami Lesa pakusekelela kuli koonse, abo beshi bakanoonjilila kumwinjililo wakumatwa, balyeelete kuswita kumwinjililo wakumalenge pakumanisha kulambila. Abalo abo beshi bakanoonjilila kumwinjililo wakumalenge, balyeelete kuswita kumwinjililo wakumatwa. Taaku muntu nabi womwi weshi akanooswita kumwinjililo uyo ngweenjililaako. Sombi ulyeelete kuswita kumwinjililo umwi.

¹⁰ Muleli ulyeelete kwinjilila pantu pomwi abantu alimwi akuswitabo pantu pomwi ambabo.

¹¹ Panshiku shakusekelela alimwi anshiiku shakusekelela shakasalwa, pamucende womwi awomwi ambelele isankwa yomwi ayomwi balyeelete kwiilikaawo acipo ca malita ali 17.5 a fulaulo. Apalo pamwanaambelele womwi awomwi balyeelete kwiilikaawo amweelo wa shipo uli woonse ngweenga kaasuni. Pacipo comwi acomwi ca fulaulo, balyeelete kwiilikaawo amalita ali 3 a mafuta a olifi.

¹² “Ono na muleli kaasuni kubenga mulambu wakulyaaba kuMwaami Lesa, na mulambu wakutenta nabi mulambu wa bwanabwankashi, mwinjililo wakwicwe uya mulubansa lwa mukati ulyeelete kucalulwa ayi enjilileeko. Muleli uyo ulyeelete kubenga mulambu bweenka mbwaacita lyoonse pabushiku bwakookesha bwa Cibelu. Mwinjililo ulyeelete kucalwa na muleli uyo waswa.”

Mulambu wa bushiku abushiku

¹³ Mwaami Lesa wakaamba ayi, “Bushiku abushiku macuunsa mulyeelete kubenga mwanaambelele ucite mwaaka womwi alimwi utacite kampenda ayi ngumulambu wakutenta kuli ndime neMwaami Lesa. Mulambu wa mushobo uyo ulyeelete kubengwa bushiku abushiku.

¹⁴ Pabushiku abushiku macuunsa, mulyeelete kupa makilogilamu ali 2 a fulaulo, kwiilikaawo alita yomwi ya mafuta a olifi akusenkanyaako. Kubenga mulambu wa mushobo uyo kuli ndime ulaakuba ngumulawo walyoonse alyoonse.

¹⁵ Nkokwaamba ayi mbelele, fulaulo amafuta a olifi shinanoobengwa kuli ndime neMwaami Lesa bushiku abushiku macuunsa kwalyoonse alyoonse.”

Muleli acishi

¹⁶ Mwaami Lesa Shinkusu shoonse wakaamba ayi, “Na muleli watimbwitako mwanaakwe cipansha cimwi ca cishi cakwe ayi ncipo, cipansha ca cishi ico cilaakuba ca mwaana uyo abamulunyungu lwakwe.

¹⁷ Sombi na muleli watimbwitako musebenshi wakwe cipansha cimwi ca cishi cakwe, cipansha ico cilaakuboola alimwi mumaansa a muleli mumwaaka walwaanguluko. Cishi ico nca bana bakwebo basankwa.

¹⁸ Muleli taaelete kubwesa cishi ca bantu bakwe akucipa bana bakwe, sobwe. Sombi ulyeelete kubatimbwita kucishi ico ncaakapekwa. Taaelete kulyatilila bantu bangu mukubanyaya cishi cabo.”

Shipinda shakutelekelaamo sha kuŊanda yakwe Lesa

¹⁹ Mpomunyaawo muntu uyo wakantola kumulyango wa shipinda shisalalite shilangite kumatwa pafwaafwi amwinjililo wakumalenge mulubansa lwa mukati. Ishi nshipinda shisalalite sha bapailishi. Kuswawaawo wakantondeka musena uli kumbo lya shipinda isho

²⁰ akundwiita ayi, “Uyu ngomusena bapailishi ngweshi banootelekelaako nyama ibengwa ayi njimilambu yakulekelelwa shibiibi, milambu yakumanisha milandu alimwi akubamba shipo sha fulaulo kwaamba ayi batakanookusha shintu shisalalite akushitola kulubansa lwa pansengwe. Ceebo na muntu wacata shintu isho shisalalite inga wacisikwa.”

²¹ Kuswawaawo wakantola mulubansa lwa pansengwe akuntondesha mumakonko one oonse umo mondakabona lubansa luniini lomwi lomwi mulikonko.

²² Imansa isho shakalinga mumakonko shakalinga kucite mamita ali 20 mubulaamfu alimwi amamita ali 15 mubufwaafwi. Imansa isho shakalinga kweelenebo shoonse.

²³ Lubansa lomwi alomwi lwakalinga kushingulukitwe lubumbu lwa mabwe. Kulubumbu ulo kwakayakwa misena yakukunkilawo mulilo.

²⁴ Mpomunyaawo muntu uyo wakandwiita ayi, “Iyi njimisena yakutelekelaamo umo basebenshi ba muŊanda yakwe Lesa mweshi banootelekela milambu ibenga bantu.”