Esekelo 45 - Baibo Busansulushi Bwa Libuku Ili

Cipansha ca cishi ca Mwaami Lesa

¹ “Pakunookwabaanya cishi kupa mushobo womwi awomwi cipansha ca nguwo, cipansha cimwi cilyeelete kupekwa kuMwaami Lesa. Cipansha ico cilyeelete kuba makilomita ali 12.5 mubulaamfu alimwi amakilomita ali 10 mubufwaafwi. Cipansha ico coonse cilaakunoosalalite.

² Mucipansha ico mulyeelete kuba musena pakuyakila Ŋanda yangu. Musena uyo ulaakuba amamita ali 250 mumbasu shone shoonse. Ulaakunooshingulukite amusena ulibo bwaashi ucite mamita ali 25 mubufwaafwi.

³ Mucipansha cisalalite mulyeelete kupima cipansha cimwi ceelete kuba amakilomita ali 12.5 mubulaamfu alimwi amakilomita ali 5 mubufwaafwi. Mucipansha ico mweshi mukabe Ŋanda yangu, musena usalalite wiindaawo.

⁴ Cilaakuba cipansha cisalalite mucishi, musena uyo wakabikwa palubasu ayi ngwa bapailishi abo basebensela ndime neMwaami Lesa muŊanda yangu. Kumusena uyo nkweshi kukabe maandaabo alimwi amusena usalala wa Ŋanda yangu.

⁵ Musa umwi wa cipansha cisalalite ico ngwa bene Lefi basebensa muŊanda yangu. Kumusena uyo nkweshi kukabe ndabala yabo mweshi bakanookala.

⁶ “Lubamba acipansha cisalalite mukapime musena umwi ucite makilomita ali 12.5 mubulaamfu alimwi amakilomita ali 2.5 mubufwaafwi. Pamusena uyo palaakuyakwa ndabala inene mwakwikala muntu uli woonse mwiine Isilaeli.

Cipansha ca cishi ca muleli

⁷ “Kuswawaawo kulaakuba cipansha ca cishi ca muleli. Cipansha ico cilaakunootalikila kunyinsa yakumbo ya cipansha cisalalite kuya mukushika kuLweenge lwa Mediteleniyani kumbo. Kuswa kunyinsa yakwicwe ya cipansha cisalalite cilaakuya kwicwe tibili akunyinsa yakwicwe ya cishi kwaamba ayi mushinso mubulaamfu ukeelane acipansha cakapekwa kumukowa wa bene Isilaeli womwi awomwi.

⁸ Cishi ico nceshi cikabe cipansha ca muleli mucishi ca Isilaeli kwaamba ayi atakanoolyatilila bantu, sombi ulaakulekela bene Isilaeli shipansha shimwi sha cishi ayi nshabo kweelana amikowa yabo.”

Milawo yeelete muleli

⁹ Mwaami Lesa Shinkusu shoonse wakaamba ayi, “Mwebo nobaleli bene Isilaeli, mweendilisha kubisha nobene Isilaeli! Amucileeke shalunkutwe alimwi akulyatilila bamwi. Amucite shintu shakutanyengelela alimwi shiluleme. Mutakatandi tubili bantu bangu kuswa mucishi cabo. Nebo neMwaami Lesa Shinkusu shoonse ndaamba.

¹⁰ “Muntu uli woonse ulyeelete kusebensesha shipimo sheelete.

¹¹ Cipimo cakupimishaako shintu shiyumu ico ciitwa ayi efa, cilyeelete kweelana acakupimishaako sha maanshi ico ciitwa ayi bati. Cipimo cakasuminishikwa nceeco ciitwa ayi oma. Cipimo ca oma cilyeelene amaefa ali likumi nabi mabati ali likumi.

¹² Cipimo ciitwa ayi shekeli cilyeelene amagela ali 20. Mashekeli ali 60 alyeelene amina yomwi.

¹³ Shipo shipuseneeko nshemweelete kupa nsheeshi. Cipansha comwi mushipansha sha witi shili 60 alimwi acipansha comwi mushipansha sha bale shili 60.

¹⁴ Mweelo wa mafuta a olifi ngomweelete kupa ngooyu. Cipansha comwi mushipansha shili 100. Mulyeelete kwaapima mumabati. Mabati likumi alyeelene aoma yomwi alimwi alyeelene akoli yomwi.

¹⁵ Mbelele yomwi ilyeelete kukushikwa palitanga lyomwi alyomwi lya mbelele shili 200 kuswa kumafulo eendaawo kubota mucishi ca Isilaeli. “Shintu isho shoonse shilaakusebenseshekwa mukupa shipo sha fulaulo, milambu yakutenta alimwi amilambu ya bwanabwankashi kwaamba ayi shibiibi shanu shilekelelwe. Nebo neMwaami Lesa Shinkusu shoonse ndaamba.

¹⁶ “Bantu boonse ba mucishi balyeelete kutola shintu isho shoonse kumuleli uyo wa bene Isilaeli.

¹⁷ Ulaakunooli mulimo wa muleli uyo kupa shifubwa shakubenga milambu yakutenta pantu pomwi ashiyandika kushipo sha fulaulo akushipo sha shakunwa sha bene Isilaeli boonse pakusekelela. Nkokwaamba ayi kusekelela kwa Mweenshi Upya, Nshiku shakookesha sha Cibelu alimwi akusekelela kumwi kwakasalwa. Ulaakunoopa milambu yakulekelelwa shibiibi, shipo sha fulaulo, milambu yakutenta aya bwanabwankashi kwaamba ayi shibiibi sha bene Isilaeli shilekelelwe.”

Makani apa kusekelela

¹⁸ Mwaami Lesa Shinkusu shoonse wakaamba ayi, “Pabushiku bwakutaanguna mumweenshi wakutaanguna mulyeelete kubenga mucende mwaana utacite kampenda ayi ngumulambu wakusalasha Ŋanda yangu.

¹⁹ Mupailishi ulaakubwesa bulowa bumwi bwa mulambu wakulekelelwa shibiibi akusanseela kushisamu sha kumulyango wa Ŋanda yangu, kumakonko one oonse a cipaililo alimwi akushisamu sha kuminjililo yakuya mulubansa lwa mukati.

²⁰ Pabushiku bwasanu ashobilo bwa mweenshi mulyeelete kucita bweenka ubo kucitila baabo boonse babisha cakuteshiba nabi mukubula lushibo. Munshila iyo mulaakunoosalasha Ŋanda yangu.

²¹ “Lyalo pabushiku bwalikumi ashone mumweenshi wakutaanguna, mulaakutalika kusekelela bushiku bwa Pasika bwakwiibaluka kusotokela. Kwanshiku shosanwe ashobilo muntu uli woonse ulaakunoolyabo cimaande.

²² Ono pabushiku bwakutaanguna bwakusekelela muleli wa cishi ulyeelete kupa mucende ayi ngumulambu wakulekelelwa shibiibi shakwe mwiine asha bantu boonse.

²³ Pabushiku bomwi abomwi bwa nshiku isho shosanwe ashobilo shakusekelela, ulyeelete kupa bacende bosanwe abobilo alimwi ambelele shisankwa shosanwe ashobilo shitacite kampenda ayi njimilambu yakutenta kuMwaami Lesa. Ulyeelete kupa mpongo isankwa ayi ngumulambu wakulekelelwa shibiibi.

²⁴ Pamucende womwi awomwi ambelele isankwa yomwi ayomwi isho sheelete kubengwa, palyeelete kwiilikaawo amalita ali 17.5 a fulaulo amalita ali 3 a mafuta a olifi.

²⁵ “Pakusekelela kwa Shimpaka uko kutalika pabushiku bwalikumi ashosanwe mumweenshi wasanu ayobilo, muleli uyo ulaakunoopa shintu sheenka sha milambu yakulekelelwa shibiibi, milambu yakutenta, shipo sha fulaulo alimwi amafuta a olifi.”