Esekelo 44 - Baibo Busansulushi Bwa Libuku Ili

Bwakusebensesha Mwinjililo Wakwicwe

¹ Mpeeke muntu uyo wakantola kumwinjililo wa pansengwe ulangite kwicwe lya Ŋanda yakwe Lesa. Mwinjililo uyo wakalinga kucalitwe.

² Mpeeke Mwaami Lesa wakandwiita ayi, “Mwinjililo uyo ulyeelete kucalikwa. Taweelete kucalulwa, sobwe. Taaku muntu weshi akanoonjililaako. Ulaakunoocalitwebo ceebo nebo neMwaami Lesa, Lesa wa bene Isilaeli mpondenjilila.

³ Muleli eenkabo ngoweelete kwikala mumwinjililo akulya kunembo lyangu neMwaami Lesa. Ulyeelete kwinjilila kucipinda cakwinjililaako alimwi akuswita nkuko.”

Milasho isuminisha muntu kwinjila muŊanda yakwe Lesa

⁴ Kuswawaawo muntu uyo wakanyinsha kumwinjililo wa kumatwa kuya kunembo lya Ŋanda yakwe Lesa. Mpeeke ndakalangilisha akubona Ŋanda ya Mwaami Lesa yesula mumuni utowa utondesha bulemu bwa Mwaami Lesa. Aboobo ndakaliwaala panshi akushishaawo ciwa.

⁵ Mpeeke Mwaami Lesa wakandwiita ayi, “Webo omuntu, langilisha kabotu, ukutikishe akubika maano kusheesho shoonse nsheshi nkulwiite. Ntookulwiita milasho yoonse ya paŊanda yangu nebo neMwaami Lesa. Ubike maano akwishiba bantu beelete kwinjila abeelete kuswa muŊanda yakwe Lesa alimwi abantu batasuminishikwi kwinjila.

⁶ “Lwiita bene Isilaeli bantu baashu balya ayi nebo neMwaami Lesa Shinkusu shoonse teshi nkasuminishewo tubili shintu shilensha bunya nshebalinga kucita!

⁷ Babisha Ŋanda yangu kwiinda mukusuminsha baswamashi batapalwitwe, ee, bantu batanyumfwili ndime, kwinjila muŊanda yangu ciindi mafuta abulowa ndyeshibengwa kuli ndime. Aboobo bantu bangu bapwaya cipangano cangu kushintu shilensha bunya nshebakacita.

⁸ Mumusena wakusebensa mulimo wabo wakulama shintu shangu shisalalite muŊanda yangu, balo bakalekela baswamashi ayi beendeleshe mbabo sha mumusena wangu Usalalite.

⁹ “Ono nebo neMwaami Lesa Shinkusu shoonse ndaamba ayi, ‘Taaku muswamashi utapalwitwe, ee, taaku muntu uyo utanyumfwili ndime, weshi akenjile muŊanda yangu, nabibo keekala pakati ka bene Isilaeli weshi akasuminishikwewo kwinjila.’ ”

Bene Lefi mbobakakushikwa pamulimo wa bupailishi

¹⁰ Mpeeke Mwaami Lesa Shinkusu shoonse wakandwiita ayi, “Bene Lefi abene Isilaeli abo bakamfutatila kuya mukulambila shibumbwabumbwa ntoobapa mulandu.

¹¹ Inga kabasebensa muŊanda yangu milimo ya mbuli kweendelesha minjililo ya kuŊanda yangu alimwi amilimo ya muli njiyo. Inga kabacaya shifubwa sha milambu yakutenta amilambu imwi ya bantu. Inga kabeemikana kunembo lya bantu akubasebesela.

¹² Sombi ceebo cakwaamba ayi bakasebensela bantu abo kunembo lya shibumbwabumbwa shabo akulengesha bene Isilaeli kubisha, nebo neMwaami Lesa ndashomesha cakulumbila ayi, ‘Balyeelete kupekwa mulandu kweelana akubisha kwabo.

¹³ Tabeelete kunsebensela mulimo wabupailishi nabi kusena pafwaafwi acintu coonse cisalalite nabi kwinjila muMusena Usalalite Wiindaawo.’ Uyu ngomulandu ngobapekwa ceebo ca shintu shilensha nsoni nshebakacita.

¹⁴ Nakubi boobo, ndabapa mulimo umwi uli woonse uyandikabo kucata amaansa muŊanda yangu.”

Shabapailishi

¹⁵ Mwaami Lesa Shinkusu shoonse wakaamba ayi, “Bapailishi bene Lefi bamulunyungu lwakwe Sadoki balo bakatolelela kunsebensela cakushomeka muŊanda yangu, bene Isilaeli ndibakamfutatila. Paceebo ceeco balo mbweshi banoosena pafwaafwi anebo ayi bansebensele. Bapailishi abo mbweshi banoosa kunembo lyangu akubenga milambu ya mafuta alimwi abulowa kuli ndime.

¹⁶ Balo beenkabo mbobeelete kwinjila muŊanda yangu, balo beenka mbobeelete kusebensela kucipaililo cangu alimwi mbobeeletebo kunsebensela kunembo lyangu akweendelesha kulambila kwa muŊanda yangu.

¹⁷ “Pakwinjila kuya mulubansa lwa mukati, balyeelete kufwala shakufwala sha nsalu iteshimite. Tabeelete kufwala shakufwala sha booya pakunoosebensa mulubansa lwa mukati nabi mukati muŊanda yakwe Lesa.

¹⁸ Balyeelete kufwala shisani sha kumitwi sha nsalu iteshimite alimwi atuputula twa nsalu iteshimite. Tabeelete kufwala shakufwala sheenga shabalengesha kuyuwa.

¹⁹ Ono kabatana kuya mulubansa lwa pansengwe umo mubunganina bantubo, balyeelete kufuula shakufwala isho nshebalinga kusebenselaamo akushishiya mushipinda shisalalite. Balyeelete kufwala shakufwalabo shimwi kwaamba ayi kubule muntu ucata shakufwala shabo shisalalite akucisikwa.

²⁰ “Bapailishi tabeelete kukulula mitwi yabo nabi kuleka misusu yabo kulaampa. Sombi balyeelete kunooilulula bweelete.

²¹ Bapailishi tabeelete kunwa waini kabatana kwinjila mulubansa lwa mukati.

²² Bapailishi tabeelete kweeba banakashi bakalekwa. Balyeelete kweebabo banakashi bene Isilaeli batana kukumanawo kale abasankwa nabi bamukalubinje bakashiya bapailishinaabo.

²³ Bapailishi balyeelete kwiisha bantu bangu bupusano buli pakati ka shintu shisalalite ashitasalalite alimwi abupusano buli pakati ka shintu shisalalite kweelana aMilawo ashitasalalite.

²⁴ “Na kwaba milandu pakati ka bantu, bapailishi mbobeelete koombolosha kweelana amilasho yangu. Balyeelete kulama kusekelela kwakulemeka ndime kweelana amilawo amilasho yangu. Balyeelete kulama bushiku bwangu bwakookesha bwa Cibelu.

²⁵ “Mupailishi taaelete kulilengesha kutanoosalalite kweelana aMilawo mukusena pafwaafwi amutuntu wa muntu. Ono nakubi boobo na mufu uyo mbaishi nabi banyina, mwanaakwe musankwa nabi mwanakashi, mukwabo nabi nankashi shakwe uteebetwe, inga walilengeshabo kutanoosalalite.

²⁶ Pesule lyakusalashikwa ulyeelete kulindilila nshiku shosanwe ashobilo.

²⁷ Ono bushiku mbweenga wenjila mulubansa lwa mukati wa Ŋanda yangu kuya mukusebensela mumo, ulyeelete kubenga mulambu wakulekelelwa shibiibi. Nebo neMwaami Lesa Shinkusu shoonse ndaamba.

²⁸ “Nebo neenkabo ndime buboni bweelete kupyana bapailishi. Tooelete kubapa cipansha ca cishi muIsilaeli. Nebo ndimeshi nkabe cipansha cabo.

²⁹ Balo balaakunoolya shipo sha fulaulo, milambu yakulekelelwa shibiibi alimwi amilambu yakumana milandu. Nkokwaamba ayi shintu shoonse shapekwa kuli ndime neMwaami Lesa mucishi ca Isilaeli shilaakuba shabo.

³⁰ Bapailishi balyeelete kupekwa nsomo shiindaawo kubota alimwi ashipo shipuseneeko shiindaawo kubota. Pakupanga shinkwa, bantu balyeelete kupa bapailishi shinkwa wakutaanguna ayi ncipo. Lyalo ndaakupa maandaabo coolwe.

³¹ Bapailishi tabeelete kulya muyuni na munyama wacanika walifwita nabi wacaikwa kubanyama bamuluundu.