Esekelo 43 - Baibo Busansulushi Bwa Libuku Ili

Mwaami Lesa mbwaakaboolela muŋanda yakwe

¹ Mpomunyaawo muntu uyo wakantola kumwinjililo wakalinga kulangite kwicwe,

² uko nkondakabona mumuni utowa uyo utondesha bulemu bwakwe Lesa wa bene Isilaeli koosa kuswa kwicwe. Liswi lyakwe lyakalingabo anga nkupoota kwa maanshi atookunka. Cishi ca panshi cakabeka kumumuni utowa uyo wakalinga kwisa.

³ Cili anga nciloto ici cakalingabo anga nceeco ncendakabona Lesa ndyaakesa mukunyonyoola ndabala inene ya Jelusalemu alimwi aceeco ncendakabona kuMulonga wa Keba. Aboobo ndakaliwaala panshi akushishaawo ciwa.

⁴ Mumuni utowa uyo utondesha bulemu bwa Mwaami Lesa wakenjila muŊanda yakwe Lesa kwiinda pamwinjililo ulangite kwicwe.

⁵ Mpomunyaawo Mushimu wa Mwaami Lesa wakanyamuna akuntola mulubansa lwa mukati lwa Ŋanda yakwe. Mpeeke bulemu ubo bwa Mwaami Lesa bwakesula muŊanda yakwe.

⁶ Ono muntu uyo kaaciimfwi lubamba anebo, ndakanyumfwa Mwaami Lesa kaamba kuli ndime kuswa muŊanda yakwe.

⁷ Mpeeke wakandwiita ayi, “Webo omuntu, uyu ngomusena wa cuuna cangu ca bwaami. Ndaakunookala kokuno pakati ka bene Isilaeli akubalela kwa lyoonse alyoonse. Taaku bene Isilaeli nabi bamaami babo beshi bakasebaanye tubili liina lyangu lisalalite mukulambila balesa bamwi nabi kubika mituntu ya bamaami babo kumusena uno.

⁸ Bamaami ndibakayaka milyango yabo lubamba amilyango yangu, ee, ndibakashimpika shisamu sha kumilyango lubamba ashisamu shangu sha kumilyango, cakwaamba ayi pakati kesu pakalinga kwiindabo lubumbu, bakasebaanya liina lyangu kushintu shilensha bunya shoonse nshebakalinga kucita. Paceebo ceeco ndakabanyonyoola mubukali bwangu.

⁹ Ono bulya balyeelete kucileka kulambila balesa bamwi akukusha mituntu ya bamaami babo. Na bacite boobo, ndaakunookala pakati kabo kwalyoonse alyoonse.”

¹⁰ Mpeeke Mwaami Lesa wakatolelela akwaamba ayi, “Webo omuntu, lwiita bene Isilaeli shaŊanda yangu alimwi ayi bayeeye mbuli mbweeyakitwe. Balengeshe kunyumfwa nsoni ceebo ca micito yabo ibiibi.

¹¹ Ono na bakanyumfwe nsoni pasheesho shoonse nshebacita, ukabapandulwite mbuli Ŋanda yakwe Lesa mbweeyakitwe. Nkokwaamba ayi mboyakayakwa, milyango yakuswitaako ayakwinjililaako alimwi abubete misena ya maanda oonse. Ubapandulwite milawo amilasho yoonse ya pali njiyo.

¹² Musena woonsebo ushingulukite peculu lya kalundu ka Ŋanda yangu ulisalalite kwiindaawo. Uyu ngomulawo wa Ŋanda yangu nebo neLesa.”

Cipaililo

¹³ Cipaililo ici cakapimwa akasamu keenka kakapimishikwa Ŋanda yakwe Lesa. Kushinguluka lwiimbi loonse kwakalinga mukonkola wakalinga kucite masentimita ali 50 kuya panshi alimwi amasentimita ali 50 mubufwaafwi. Peculu lya nguwo wakalinga kucite camweela cakalinga kucite masentimita ali 25 kuya mwiculu.

¹⁴ Cipansha ca cipaililo cakutaanguna kuswa peculu lya capanshi cakalinga kucite mita kuya mwiculu. Cipansha cakuboolaawo cakalinga kunjiliteko mukati amasentimita ali 50 kushinguluka koonse alimwi cakalinga kucite mamita obilo kuya mwiculu. Cipansha cakaboolaawo acalo cakalinga kunjiliteko mukati amasentimita ali 50 kushinguluka koonse.

¹⁵ Cipansha ici cakutentelawo milambu acalo cakalinga kucite mamita obilo kuya mwiculu. Mumakonko one a ncico mwakalinga shili anga ngameeca shone.

¹⁶ Cakutentelawo cakalinga kweelenebo mumbasu shoonse. Cakalinga kucite mamita ali 6 mumbasu shoonse.

¹⁷ Cipansha ca mukati cakalinga kweelenebo mumbasu shoonse, nkokwaamba ayi cakalinga kucite mamita ali 7 mumbasu shoonse. Peculu lya ncico cakalinga kucite camweela cakalinga kucite masentimita ali 25 kuya mwiculu. Mukonkola wakalinga kucite masentimita ali 50 mubufwaafwi. Matantilo akuya pacipaililo akalinga kulubasu lwakwicwe.

Kusalashikwa kwa cipaililo

¹⁸ Mpomunyaawo Mwaami Lesa Shinkusu shoonse wakandwiita ayi, “Webo omuntu, milasho yakupetamo milambu yakutenta akusanseela bulowa pacipaililo caakuyakwa njeeyi:

¹⁹ Bapailishi bene Lefi bamulunyungu lwakwe Sadoki beenkabo mbobeelete kwisa kunembo lyangu mukunsebensela. Nebo neMwaami Lesa Shinkusu shoonse ndime ndapa mulawo uyu. Mulaakubapa mucende mwaana pakubenga mulambu wakulekelelwa shibiibi.

²⁰ Ulyeelete kubwesa bulowa bumwi akubusanseela kushili anga ngameeca shone sha kumakonko one a cipaililo. Ukasanseele akumakonko one oonse a cipansha ca pakati ca cipaililo alimwi amumbasu sha ncico moonse. Munshila iyo ulaakucisalasha ayi ceelele kubengelwawo milambu kuli ndime.

²¹ Ulyeelete kubwesa mucende uyo weshi akabengwe ayi ngumulambu wakulekelelwa shibiibi akuya mukumutentela pamusena wakasalwa pansengwe lya Ŋanda yakwe Lesa.

²² “Pabushiku bwabili ulyeelete kubenga mpongo isankwa itacite kampenda ayi ngumulambu wakulekelelwa shibiibi. Ukasalashe cipaililo abulowa bwa njiyo bweenka mbweshi ukacite abulowa bwa mucende.

²³ Pesule lyakumana kusalasha cipaililo, ulyeelete kubenga mucende mwaana amwanaambelele musankwa kuswa mulitanga boonse kabatacite kampenda.

²⁴ Ulyeelete kushibenga kunembo lyangu nebo neMwaami Lesa. Bapailishi balyeelete kubasanseela mwiinyo akubabenga ayi ngumulambu wakutenta kuli ndime neMwaami Lesa.

²⁵ “Bushiku bomwi abomwi, kwanshiku shosanwe ashobilo ulyeelete kubenga mpongo isankwa, mucende mwaana amwanaambelele kuswa mulitanga ayi njimilambu yakulekelelwa shibiibi. Shifubwa shoonse tasheelete kuba atumpenda.

²⁶ Kwanshiku shosanwe ashobilo, bapailishi balyeelete kusalasha cipaililo ico akucilengesha kweelela kusebenseshekwa.

²⁷ Kumeelelesho anshiku isho, kutalikila pabushiku bwasanu ashotatwe kuya kunembo, bapailishi balyeelete kutalika kubenga milambu yakutenta aya bwanabwankashi ya bantu pacipaililo. Lyalo ndaakusangalala pali ndimwe noonse. Nebo neMwaami Lesa Shinkusu shoonse ndaamba.”