Esekelo 42 - Baibo Busansulushi Bwa Libuku Ili

Maanda obilo akalinga pafwaafwi aŊanda yakwe Lesa

¹ Mpomunyaawo muntu uyo wakanyinsha kulubansa lwa pansengwe akuntola kuŋanda yakalinga kumatwa a Ŋanda yakwe Lesa iyo yakalinga kufwaafwi aŋanda yakalinga kulubasu lwa kumbo.

² Ŋanda iyo yakalinga kumatwa yakalinga kucite mamita ali 50 mubulaamfu alimwi amamita ali 25 mubufwaafwi.

³ Kulubasu lumwi yakalinga kulangite kumusena wakalinga kucite mamita ali 10 mubufwaafwi uyo wakalinga kulubasu lwa Ŋanda yakwe Lesa alimwi kulubasu lumwi yakalinga kulangite kumusena wakayalwa mabwe panshi uyo wakalinga mulubansa lwa pansengwe. Ŋanda iyo yakalinga ya maanda otatwe kuya mwiculu.

⁴ Kulubasu lwa kumatwa lya ŋanda iyi kwakalinga mwakwiinda mwakalinga kucite mamita ali 5 mubufwaafwi amamita ali 50 mubulaamfu. Milyango ya shipinda yakalinga kulangite kulubasu lwa kumatwa.

⁵ Shipinda shakalinga peculu lya ŋanda iyo shakalinga shiniiniiko kwiinda sha pakati asha panshi ceebo mwakwiinda mwakabwesa musena unene kuli nshisho.

⁶ Shipinda sha muŋanda ya panshi shakalinga kutaaba shipinda sha muŋanda yabili ayatatu kuya peculu. Paceebo ceeco shipinda isho teshakalinga kucite macinko mbuli maanda amwi a mulubansa.

⁷ Kwakalinga lubumbu lwapansengwe ulo lwakalinga kubambene ashipinda alimwi alubansa lwa pansengwe ulo lwakayakwa kunembo lya shipinda ulo lwakalinga kucite mamita 25 mubulaamfu.

⁸ Mundando wa shipinda shakalinga kulangite kulubansa lwa pansengwe wakalinga kucite mamita ali 25, mundando wakalinga kulangite kuŊanda yakwe Lesa wakalinga kucite mamita ali 50.

⁹ Shipinda sha panshi shakalinga kucite mulyango kulubasu lwa kwicwe na muntu wenjilaamo kuswa mulubansa lwa pansengwe.

¹⁰ Kumalenge lya Ŋanda yakwe Lesa kwakalinga ŋanda ikoshenye a njiyo kufwaafwi a ŋanda yakalinga kumbo lya Ŋanda yakwe Lesa.

¹¹ Kunembo lya shipinda sha ŋanda iyo kwakalinga mwakwiinda mweelene amoomo mwakalinga kulubasu lwa kumatwa. Mwakalinga kweelene mubulaamfu amubufwaafwi alimwi mwakalinga kupangitwe mushobo womwi. Ayalo milyango yakalinga kukoshenye.

¹² Kwakalinga mulyango wakuya kushipinda sha kumalenge lya ŋanda iyo. Mulyango uyo wakalingila kumatalikilo a lubumbu kwicwe.

¹³ Mpomunyaawo muntu uyo wakandwiita ayi, “Maanda obilo oonse aya alisalalite. Bapailishi abo benjilaamo balalya milambu indaawo kusalala. Ceebo cakwaamba ayi shipinda isho shilisalalite, bapailishi balabikaamo milambu indaawo kusalala. Nkokwaamba ayi balabikaamo shipo sha fulaulo, milambu yakulekelelwa shibiibi alimwi amilambu yakumanisha milandu.

¹⁴ Na bapailishi batooyanda kuswa muŊanda yakwe Lesa ayi baye mulubansa lwa pansengwe, balyeelete kushiya shakufwala shisalalite nshebafwala pakusebensela Mwaami Lesa mushipinda ishi. Balyeelete kufwala shakufwala shimwi pakuya kumusena ubunganinaako bantubo.”

Muntu uyo mbwaakapima musena woonse wa Ŋanda yakwe Lesa

¹⁵ Ono muntu uyo ndyaakamanisha kupima muŊanda yakwe Lesa, wakanyinsha kumwinjililo wakwicwe kuya pansengwe akupima musena woonse wa Ŋanda yakwe Lesa.

¹⁶ Wakabwesa kasamu kakupimishaako, wapima lubasu lwakwicwe akucana ayi lulicite mamita ali 250 mubulaamfu.

¹⁷ Kuswawaawo wakapima lubasu lwa kumatwa akucana ayi lulicite mamita ali 250.

¹⁸ Mpeeke wakapima lubasu lwakumalenge akucana ayi lulicite mamita ali 250.

¹⁹ Pesule wakapima lubasu lwakumbo akucana ayi alwalo lulicite mamita ali 250 mubulaamfu.

²⁰ Anu lubumbu lwakalinga kushingulukiteko lwakalinga kucite mamita ali 250 kumbasu shoonse. Lubumbu ulo ndolwakalinga kupansaanya shintu shisalalite ashintubo.