Esekelo 40 - Baibo Busansulushi Bwa Libuku Ili

CILI ANGA NCILOTO CA ŊANDA YAKWE LESA ITOOSA ( 40:1—48:35 ) Esekelo mbwaakatolwa kuJelusalemu

¹ Mumwaaka wamakumi obilo amyaaka yosanwe wa busha bwesu, pabushiku bwalikumi bwa mweenshi wakutaanguna mumwaaka, mumwaaka walikumi ayone ndabala ya Jelusalemu ndiyakawa, nkusu sha Mwaami Lesa shakanselukila akuntola.

² Mucili anga nciloto Lesa wakantola kucishi ca Isilaeli akunjimika peculu lya kalundu kalaamfu ako kakalinga kucite maanda aanji kulubasu lwa kumalenge ayo akalinga kuboneka anga nindabala inene.

³ Ono ndyaakanshisha kooko, ndakabonako muntu wakalinga kubekabeka anga ngubulonse uyo wakalinga kwiimfwi pamwinjililo kaacite ntambo ya busalu buteshimite alimwi akasamu kakupimishaako mumaansaakwe.

⁴ Mpomunyaawo muntu uyo wakandwiita ayi, “Webo omuntu, langilisha kabotu, ukutike akubikaako maano kushoonse nsheshi nkutondeshe ceebo ncewaletelwa kokuno. Wamana uye ulwiite bene Isilaeli shoonse nsheshi ubone.”

Mwinjililo wa kwicwe

⁵ Mpeeke ndakabona lubumbu lushingulukite Ŋanda yakwe Lesa. Kasamu kakupimishaako ako muntu uyo nkwaakalinga kucite mumaansaakwe kakalinga kulaampa mamita ali 3. Mpeeke wakapima lubumbu akasamu ako. Lubumbu ulo lwakalinga mamita ali 3 kuya mwiculu alimwi lwakalinga kucite mutika uli mamita ali 3.

⁶ Kuswawaawo wakaya kumwinjililo ulangite kwicwe. Wakatanta pamatantilo, wapima mwinjililo akucana ayi ulicite mamita ali 3.

⁷ Kunembo lya mwinjililo kwakalinga mwakwiinda. Kumbasu shobilo shoonse sha mumo, kwakalinga tupinda twa beshikulindilila totatwe kulubasu lomwi alomwi. Tupinda uto twakalinga kucite mamita ali 3 mubulaamfu amubufwaafwi. Lubumbu lwakalinga pakati ka ntuto lwakalinga mamita ali 2.5. Kunembo lya tupinda uto kwakalinga mwakwiinda mwakalinga kulaampa mamita ali 3. Mwakwiinda umo mwakalinga kuya kucipinda cakwinjililaako cakalinga kulangite kuŊanda yakwe Lesa.

⁸ Kuswawaawo wakapima cipinda cakwinjililaako

⁹ akucana ayi cilicite mamita ali 4 mubulaamfu. Mwinjililo wa cipinda ico wakalinga kulaampa mita yomwi. Mwinjililo uyo wakalinga kulangite kuŊanda yakwe Lesa.

¹⁰ Mukati ka mwinjililo wa kwicwe, kumbasu shobilo shoonse, mwakalinga tupinda totatwe kulubasu lomwi alomwi. Toonse totatwe twakalinga kweelene alwalo lubumbu lwakalinga pakati ka tupinda lwakalinga kweelene.

¹¹ Kuswawaawo muntu uyo wakapima mwakwiinda mubufwaafwi akucana ayi mwakalinga mamita ali 6.5, pakati ka shisasa na shacalulwa pakalinga mamita ali 5.

¹² Kunembo lya tupinda toonse twa beshikulindilila kwakalinga lubumbu lufwaafwi lwakalinga kucite masentimita ali 50 kuya mwiculu alimwi amumutika. Tupinda uto twakalinga kucite mamita ali 3 mubulaamfu amubufwaafwi.

¹³ Kuswawaawo wakaya wapima mushinso wakuswa kulubumbu kwisule lya kapinda komwi kushika kulubumbu lwa kwisule lya kapinda kulubasu lumwi lwa mwakwiinda akucana ayi pali mamita ali 12.5.

¹⁴ Cipinda cakalinga kweela, ico cakalinga kwiindwaamo kuya mukupulila kulubansa lwa Ŋanda yakwe Lesa, wakacipima akucana ayi cakalinga kucite mamita ali 10 mubufwaafwi.

¹⁵ Mushinso wakuswa kumwinjililo wa lubumbu lwa kunsengwe kuya mukushika kucipinda ico cakalinga kweela, pakalinga mamita ali 25.

¹⁶ Kwakalinga mbwelyo kulubumbu lwa pansengwe lya tupinda toonse alimwi akulubumbu lwa mukati. Lubumbu lwakalinga mweela lya mwakwiinda lwakaboteshekwa atupukupuku twakutala.

Lubansa lwa pansengwe

¹⁷ Mpeeke muntu uyo wakantola kulubansa lwa pansengwe. Uko ndakabona shipinda shili 30 shakalinga kuyakitwe muya lubumbu lwa pansengwe. Kunembo lya shipinda isho pakalinga musena wakayalwa mabwe panshi.

¹⁸ Musena wa mabwe uyo wakalinga kushingulukite lubansa loonse alimwi wakalinga kucite mamita ali 25 mubufwaafwi. Lubansa lwa pansengwe ulu lwakalingaako panshi kwiinda lwa mukati.

¹⁹ Kwakalinga mwinjililo wakuya mulubansa lwa mukati uyo wakalinga kusuntukiteeko. Muntu uyo wakapima mushinso wakalinga pakati ka minjililo yobilo iyo akucana ayi pali mamita ali 50.

Mwinjililo wa kumatwa

²⁰ Kuswawaawo muntu uyu wakapima mwinjililo wakumatwa uyo wakalinga kuya kulubansa lwa pansengwe.

²¹ Atwalo tupinda twa beshikulindilila twa kumbasu shobilo shoonse sha mwakwiinda, lubumbu lwa mukati acipinda cakwinjililaako shakalinga kweelenebo mumamita asha kumwinjililo wakwicwe. Shoonse shakalinga kucite mamita ali 25 mubulaamfu alimwi amamita ali 12.5 mubufwaafwi.

²² Acalo cipinda cakwinjililaako, mbwelyo atupukupuku twakutala shakalinga kweelenebo asha kumwinjililo wakwicwe. Kumusena uko kwakalinga matantilo osanwe aobilo akalinga kuya kumwinjililo alimwi cipinda cakwinjililaako cakalinga kweela kacilangite mulubansa.

²³ Kuswa kumwinjililo wakumatwa kwiinda mulubansa kwakalinga mwinjililo aumwi wakalinga kuya mulubansa lwa mukati bweenka bwakalinga kumwinjililo wakwicwe. Muntu uyo wakapima mushinso wakalinga pakati ka minjililo yobilo akucana ayi pakalinga mamita ali 50.

Mwinjililo wakumalenge

²⁴ Kuswawaawo muntu uyo wakantola kulubasu lwakumalenge uko nkondakabona mwinjililo aumwi. Wakapima lubumbu lwa mukati acipinda cakwinjililaako akucana ayi shilyeelenebo asha kuminjililo imwi.

²⁵ Mumwinjililo uyo wakalinga kucite mbwelyo bweenka mbuli minjililo imwi. Awalo wakalinga kucite mamita ali 25 mubulaamfu alimwi amamita ali 12.5.

²⁶ Kwakalinga matantilo osanwe aobilo akalinga kuya kumwinjililo alimwi cipinda cakwinjililaako cakalinga kweela kacilangite mulubansa. Lubumbu lwakalinga mweela lya mwakwiinda lwakaboteshekwa atupukupuku twakutala.

²⁷ Akwalo uko kwakalinga mwinjililo wakuya mulubansa lwa mukati. Muntu uyo wakapima mushinso wakalinga pakati ka minjililo yobilo iyo akucana ayi pakalinga mamita ali 50.

Mwinjililo wakumalenge wakuya mulubansa lwa mukati

²⁸ Mpomunyaawo muntu uyu wakanyinsha kumwinjililo wakumalenge akuntola kulubansa lwa mukati. Lyalo wakapima mwinjililo uyo akucana ayi wakalinga kweelene awa mulubumbu lwa pansengwe.

²⁹ Tupinda twa beshikulindilila twa nguwo, cipinda cakwinjililaako alubumbu lwa nguwo lwa mukati shakalinga kweelene asheesho sha kuminjililo imwi. Amwalo mutupinda twa mwinjililo uyo mwakalinga mbwelyo. Mwinjililo uyo wakalinga kucite mamita ali 25 mubulaamfu alimwi amamita ali 12.5 mubufwaafwi.

³⁰ Shipinda shakwinjililaako sha minjililo ya lubansa lwa mukati shakalinga kucite mamita ali 12.5 mubulaamfu alimwi amamita ali 2.5 mubufwaafwi.

³¹ Cipinda cakwinjililaako cakalinga kulangite mulubansa lwa pansengwe. Lubumbu lwakalinga mweela lya mwakwiinda lwakaboteshekwa atupukupuku twakutala. Kwakalinga matantilo osanwe aotatwe akalinga kuya kumwinjililo uyo.

Mwinjililo wakwicwe wakuya mulubansa lwa mukati

³² Mpomunyaawo muntu uyu wakanyinsha kumwinjililo wakumalenge akuntola kulubansa lwa mukati. Lyalo wakapima mwinjililo uyo akucana ayi wakalinga kweelene aminjililo imwi.

³³ Tupinda twa beshikulindilila twa nguwo, cipinda cakwinjililaako alubumbu lwa nguwo lwa mukati shakalinga kweelene asheesho sha kuminjililo imwi. Amwalo mutupinda twa mwinjililo uyo mwakalinga mbwelyo kushinguluka koonse. Mwinjililo uyo wakalinga kucite mamita ali 25 mubulaamfu alimwi amamita ali 12.5 mubufwaafwi.

³⁴ Cipinda cakwinjililaako cakalinga kulangite mulubansa lwa pansengwe. Lubumbu lwakalinga mweela lya mwakwiinda lwakaboteshekwa atupukupuku twakutala. Kwakalinga matantilo osanwe aotatwe akalinga kuya kumwinjililo uyo.

Lubansa lwa mukati lwakumwinjililo wa kumalenge

³⁵ Mpomunyaawo muntu uyu wakanyinsha kumwinjililo wakumalenge akuntola kulubansa lwa mukati. Lyalo wakapima mwinjililo uyo akucana ayi wakalinga kweelene aminjililo imwi.

³⁶ Bweenka mbuli imwi iyi, awalo wakalinga kucite tupinda twa beshikulindilila, lubumbu lwa mukati lwakaboteshekwa, cipinda cakwinjililaako ambwelyo kushinguluka. Mwinjililo uyo wakalinga kucite mamita ali 25 mubulaamfu alimwi amamita ali 12 mubufwaafwi.

³⁷ Cipinda cakwinjililaako cakalinga kulangite mulubansa lwa pansengwe. Lubumbu lwakalinga mweela lya mwakwiinda lwakaboteshekwa atupukupuku twakutala. Kwakalinga matantilo osanwe aotatwe akalinga kuya kumwinjililo uyo.

Maanda akalinga kuyakitwe pafwaafwi amwinjililo wa kumatwa

³⁸ Mulubansa lwa pansengwe mwakalinga cipinda cimwi cakanungwa kumwinjililo wakumatwa wakuya mulubansa lwa mukati. Mulyango wa cipinda ici wakalinga kuya kucipinda cakwinjililaako cakalinga kulangite kulubansa. Mucipinda ico mobakalinga kusanshila shifubwa shakubenga milambu yakutenta.

³⁹ Mucipinda cakwinjililaako ico mwakalinga matebulu one, obilo kumbasu shobilo shoonse. Pamatebulu aya mpobakalinga kunoocaila shifubwa shakubenga milambu iyo yakalinga kutentwa yakabumbulu, milambu yakulekelelwa shibiibi nabi milambu yakumanisha milandu.

⁴⁰ Apalo pansengwe lya cipinda ico pakalinga matebulu one akalinga kweelenebo aayo akalinga mucipinda ico cakwinjililaako. Kwakalinga obilo obilo kumbasu shobilo shoonse sha matantilo akalinga kumwinjililo wakumatwa.

⁴¹ Matebulu akucailaawo shifubwa shakubenga milambu akalinga osanwe aotatwe pantu pomwi. One akalinga mucipinda cakwinjililaako, amwi oonse akalinga mulubansa.

⁴² Matebulu amwi one akalinga kucipinda cakwinjililaako apo pakalinga kubambilwa shifubwa shamilambu akalinga kupangitwe amabwe akabeswa. Akalinga kucite masentimita ali 50 kuya mwiculu amasentimita ali 75 mumbasu shone shoonse sha capeculu. Shisebensesho shoonse shakalinga kusebenseshekwa pakucaya shifubwa shakubenga milambu, shakalinga kubikwa pamatebulu aya.

⁴³ Mucipinda ico mwakalinga nkobeko kushinguluka lubumbu isho shakalinga mamilimita ali 75. Nyama yoonse yakubenga milambu yakalinga kubikwa pamatebulu ayo.

⁴⁴ Kuswawaawo wakantola kulubansa lwa mukati uko nkondakabona shipinda shobilo. Cipinda comwi cakalinga kulangite kumalenge kacili lubamba amwinjililo wakumatwa, cimwi kacilangite kumatwa kacili lubamba amwinjililo wakumalenge.

⁴⁵ Mpeeke muntu uyo wakandwiita ayi, “Cipinda cilangite kumalenge nca bapailishi basebensela muŊanda yakwe Lesa.

⁴⁶ Cipinda cilangite kumalenge nca bapailishi basebensela kucipaililo. Bapailishi boonse mbamulunyungu lwakwe Sadoki. Aba mbobantu beenkabo mumukowa wakwe Lefi basuminishikwa kusebensela Mwaami Lesa muŊanda yakwe.”

Lubansa lwa mukati aŊanda yakwe Lesa

⁴⁷ Muntu uyo wakapima lubansa lwa mukati ulo lwakalinga kucite mamita ali 50 mumbasu shoonse. Ŋanda yakwe Lesa yakalinga kumbo alimwi kunembo lya njiyo kwakalinga cipaililo.

⁴⁸ Kuswawaawo wakantola mucipinda cakwinjililaako ca Ŋanda yakwe Lesa. Wakapima mwinjilila akucana ayi ulicite mamita ali 2.5 mumutika, mubufwaafwi kaucite mamita ali 7. Kumbasu shobilo shoonse sha mwinjililo kwakalinga lubumbu lwakalinga kucite mamita ali 1.5.

⁴⁹ Kwakalinga matantilo akalinga kuya mucipinda cakwinjililaako ico cakalinga kucite mamita ali 10 mubufwaafwi, amamita ali 6 kuswa kunembo kuya kwisule. Kwakalinga licinko lyomwi lyomwi kumbasu shobilo shoonse sha matantilo.