Esekelo 4 - Baibo Busansulushi Bwa Libuku Ili

Esekelo mbwaakatondesha kushingulukwa kwa ndabala ya Jelusalemu kubalwani

¹ Mpomunyaawo Lesa wakaŋambila ayi, “Webo omuntu, bwesa lucelwa ulubike kunembo lyako akutalaawo ndabala ya Jelusalemu.

² Wamanisha ubikeeko shisebensesha balwani pakushinguluka ndabala. Ukabe shilindi, uyakeko citunta cakutantaawo pakulwana, akuyaka misumba ya balwani alimwi akwiishingulusha minkulwa yakupwaishako lubumbu.

³ Kuswawaawo ubwese cikaye ca nshimbi ucibike ciboneke anga ndubumbu lwa nshimbi luli pakati lyako andabala. Lyalo ulange nkweshi cinoobetele. Ndabala iyo itooshingulukwa. Webo ndiwe weshi wiishinguluke. Ici citooba citondesho kumushobo wa bene Isilaeli.

⁴ “Mpeeke woone panshi koonena kulubasu lwacipiko akulibika mukuli wa shibiibi sha mushobo wa bene Isilaeli. Ulaakunyamuna shibiibi shabo isho kwanshiku isho nsheshi ukoonene kulubasu ulo.

⁵ Ntookupa mweelo wa nshiku shakunyamuna shibiibi isho weelene amyaaka yakubisha kwabo. Nkokwaamba ayi ulaakunyamuna shibiibi sha bene Isilaeli kwanshiku shili 390.

⁶ “Nshiku ishi shaakwiinda, ukoone alimwi. Ono ukasanduluke akoonena kulubasu lwalulyo akunyamuna shibiibi sha mushobo wa bene Juda kwanshiku shili 40. Nkokwaamba ayi bushiku bomwi bunanokwiimikanina mwaaka womwi wa mulandu wabo.

⁷ Ulaanshe meenso uko kundabala ya Jelusalemu ishingulukitwe kubalwani. Ukanyamune lyaansa lyako akulalukila ndabala iyo mapensho.

⁸ Ndaakukwaanga ntambo kwaamba ayi utakacikoonshi kusandulukila kulubasu lumwi kushikila ukamaane kulwana ndabala ya Jelusalemu.

⁹ “Bwesa witi, bale, cilemba, nyangu, alimwi alupoko ushibike mucakubikila comwi akuya mukushisebensesha kupanga shinkwa. Shinkwa uyo ngweshi ukanoolya kwanshiku shili 390 isho nsheshi ukanooletele kulubasu lwako lwacipiko.

¹⁰ Ukapime magilamu a shinkwa ali 230 ayo ngweshi unoolya bushiku abushiku paciindi cibambitwe.

¹¹ Ukabwese amaanshi akwana nkomeshi shobilo akunwa bushiku abushiku paciindi cibambitwe.

¹² Ukanoolya shakulya ishi bweenka mbweenga walya shinkwa wa mise wa bale. Ukanooupanga bantu kababweneeko mukusebensesha maambukwa ayumu a bantu ayi nshenkuni.”

¹³ Lyalo Mwaami Lesa wakaamba ayi, “Munshila njemunya iyo bene Isilaeli mbweshi bakalye shakulya shitasalalite kweelana amilawo pakati ka mishobo iyo njeshi nkabatandileeko.”

¹⁴ Mpeeke ndakaamba ayi, “Citabi boobo noBaami baLesa Beshinkusu shoonse. Kuswa kubwanike bwangu kushika sunu, nebo nshina kulyaawo kale nyama yakulifwita nabi yakacaikwa abanyama bamuluundu. Mulomo wangu tauna kulyaawo kale nyama itasalalite kweelana aMilawo.”

¹⁵ Lyalo Mwaami Lesa wakaamba ayi, “Ncibotu, anu ntookuleka ukapange shinkwa wako pamulilo wa bufumba bwa ŋombe mumusena wakusebensesha maambukwa a bantu.”

¹⁶ Kuswawaawo wakandwiita ayi, “Webo omuntu, ndaakuceesha shakulya muJelusalemu. Bantu balaakunoolya shakulya shakweeleka cakulisukama. Aalo maanshi balaakunoonwa akweeleka mukutyongola.

¹⁷ Cilaakuba boobo ceebo shakulya amaanshi shilaakushupa. Balaakupenshekwa abuumbi mumyoyo pakunoobonana ayalo mibili yabo ilaakunyombela ceebo ca shibiibi shabo.”