Esekelo 39 - Baibo Busansulushi Bwa Libuku Ili

Kukomwa kwakwe Gogi

¹ Mpeeke Mwaami Lesa wakaŋambila ayi, “Webo omuntu, laluka mapensho kuli Gogi akumulwiita ayi nebo neMwaami Lesa Shinkusu shoonse ntokwaamba ayi, ‘Webo Gogi omuleli munene wa bene Mesheki aTubali, ntookulwana.

² Ndaakukusandulula akukukweelaanya. Ndaakukubwesa kuswa kumatwa kulaamfu nkakutole kutulundu twa Isilaeli.

³ Kuswawaawo ndaakuuma buta bwako kuswa kulyaansa lyako lyacipiko akulengesha mifwi ili kulyaansa lyalulyo kuloka.

⁴ Ulaakuwita patulundu twa Isilaeli, webo, bashilumamba bako boonse alimwi amishobo imwi iyo njeshi ukanooli ayo. Ndaakukusandula kuba cakulya ca bayuni bapusenepusene balya nyama aca banyama ba muluundu.

⁵ Mulaakufwita muluundu. Nebo neMwaami Lesa Shinkusu shoonse ndaamba.

⁶ Ndaakutuma mulilo mucishi ca Magogu apabaabo bekala kwakubula cakulisukama muloombe lwa lweenge. Lyalo ndyeshi bakeshibe ayi nebo ndi Mwaami Lesa.

⁷ “ ‘Kuswawaawo ndaakulengesha liina lyanu lisalalite kwishibwa pakati ka bantu bangu. Teshi nkasuminishe tubili liina lyangu lisalalite kusebaana. Lyalo mishobo imwi ndyeshi ikeshibe ayi nebo neMwaami Lesa ndi Usalalite wa bene Isilaeli.’

⁸ “Nebo neMwaami Lesa Shinkusu shoonse ndaamba ayi, ‘Bushiku ubo bulaakushikila! Shintu isho shilaakucitika. Ubu mbushiku bulya mbooŋambaawo.

⁹ Pabushiku ubo bantu balya bekala mumandabala ali mucishi ca Isilaeli balaakubwesa shilwanisho akushisandula kuba ninkuni. Nkokwaamba ayi mulilo balaakunookunkisha mayawo aniini aanene, mata amifwi, nkoli alimwi amasumo. Shilaakufula cakwaamba ayi kwamyaaka yosanwe ayobilo teshi bakapengewo nkuni.

¹⁰ Teshi bakanootepawo nkuni muluundu nabi mumasaka ceebo balaakunoosebensesha shilwanisho isho pakukunka mulilo. Kuswawaawo balaakusaala baabo bakabasaala akubwesa buboni bwa baabo bakababwesela. Nebo neMwaami Lesa Shinkusu shoonse ndaamba.’ ”

Kubikwa kwakwe Gogi

¹¹ Mwaami Lesa waamba ayi, “Bushiku ubu ndaakupa Gogi musena wakubikaako muIsilaeli muCinyika ca Beshikweenda kwicwe lya Lweenge lwa Mwiinyo. Musena uyo ulaakushinkila beshikweenda ceebo Gogi alikoto linene lya bashilumamba bakwe balaakufukilwa nkuko. Aboobo musena uyo ulaakwiitwa ayi Cinyika ca Bashilumamba bakwe Gogi.

¹² Cilaakutolela bene Isilaeli myeenshi yosanwe ayobilo kufukila mituntu yabo kwaamba ayi cishi cisalale kweelana aMilawo.

¹³ Bantu boonse ba mucishi balaakwiifukila alimwi bushiku mbweshi nkatondeshe bulemu bwangu abalo balaakulemekwa ceebo ca mulimo uyo. Nebo neMwaami Lesa Shinkusu shoonse ndaamba.”

¹⁴ Ono yaakumana myeenshi yosanwe ayobilo, bantu balaakusalwa ayi baye ciyandoola mituntu itana kufukilwa. Bamwi balaakunooya ciifukila mukusalasha cishi.

¹⁵ Ono pakunooya ciyandoola mucishi, na umwi wabona cifuwa ca muntu, ulaakushimpikawo keshibilo kulubasu lwa cifuwa ico kushikila beshikukaba shuumbwe bakacifukile muCinyika ca Bashilumamba bakwe Gogi

¹⁶ pafwaafwi andabala iitwa ayi Amona, nkokwaamba ayi Bashilumamba bakwe Gogi. Munshila iyo cishi cilaakusalashikwa.

¹⁷ Mwaami Lesa Shinkusu shoonse wakaŋambila ayi, “Webo omuntu, ita mushobo wa bayuni woonse abanyama bamuluundu boonse akubalwiita ayi, ‘Amuyoboloke akubungana pantu pomwi kuswa mumisena yoonse ishingulukite, mwise kumulambu ngoontoomubambila, ee, kumulambu unene patulundu twa Isilaeli. Uko mulaakulya nyama akunwa bulowa.

¹⁸ Mulaakulya nyama ya bashilumamba bayumu akunwa bulowa bwa baleli ba cishi ca panshi. Boonse balaakucaikwabo anga nimbelele shisankwa, bana ba mbelele, mpongo nabi anga mbacende. Nkokwaamba ayi kucaikwabo anga nshifubwa shiinite sha kuBashani.

¹⁹ Mulambu uyo ngoontoomubambila, mulaakulya mafuta akushimbililwa alimwi mulaakunwa bulowa kushikila mukakolwe.

²⁰ Patebulu lyangu mulaakulya shipumputa kulilabo nshemusuni sha maaki abeshikwaatanta, bantu beshinkusu alimwi abashilumamba bamushobo woonse. Nebo neMwaami Lesa Shinkusu shoonse ndaamba.’ ”

Mwaami Lesa bweshi akabooshe shoolwe kubene Isilaeli

²¹ Kuswawaawo Mwaami Lesa wakaamba ayi, “Ndaakutondesha bulemu bwangu pakati ka mishobo alimwi yoonse ilaakubona mboonsebensesha nkusu shangu kupingula cakutanyengelela.

²² Lyalo kuswa bushiku ubo kuya kunembo, bene Isilaeli balaakwishiba ayi nebo ndi Mwaami Lesa, Lesa wabo.

²³ Mishobo iyo ilaakwishiba ayi bene Isilaeli bakaya mushishi sha busha ceebo ca shibiibi shabo mukutashomeka kuli ndime. Aboobo ndakabafutatila akubaaba kubalwani babo cakwaamba ayi baanji bakamana kucaikwa munkondo.

²⁴ Ndakabacita kweelana akutasalala kwabo alimwi ashilubo shabo. Ncakwiila ndakabafutatila.”

²⁵ Mwaami Lesa Shinkusu shoonse wakaamba ayi, “Ono bulya ndaakuboosha bamulunyungu lwakwe Jakobo kuswa mubusha. Ncakwiila ndaakufwita nkumbu bantu bangu bene Isilaeli boonse. Liina lyangu lisalalite ndaakulitabilila.

²⁶ Lyalo baakwikala kwakubula cakulisukama mucishi cabo alimwi kwakubula muntu nabi womwi wakubaloondesha, balaakuluba nsoni shabo nshebacite ceebo cakutashomeka kwabo kuli ndime.

²⁷ Ono bushiku ndaakubaleta kuswa pakati ka mishobo imwi, ee, bushiku ndaakubabunganya kuswa mushishi sha balwani babo, ndaakutondesha mishobo yoonse ayi ndisalalite pameenso a mishobo iinji kwiinda muli mbabo.

²⁸ Lyalo ndyeshi bakeshibe ayi nebo ndi Mwaami Lesa, Lesa wabo. Nakubi kwaamba ayi ndakabatuma mubusha pakati ka mishobo imwi, ndaakubabunganya akubaleta mucishi cabo cakutashiyaawo nabi womwi.

²⁹ Teshi nkabafutatilewo tubili ceebo ndaakutila Mushimu wangu pabene Isilaeli. Nebo neMwaami Lesa Shinkusu shoonse ndaamba.”