Esekelo 38 - Baibo Busansulushi Bwa Libuku Ili

Gogi mbweshi cikabe cisebensesho cakwe Lesa

¹ Mpeeke Mwaami Lesa wakaŋambila ayi,

² “Webo omuntu, langa kuli Gogi wa mucishi ca Magogu muleli munene wa mushobo wa bene Mesheki aTubali akulaluka mapensho pali nguwe

³ akumulwiita ayi nebo neMwaami Lesa Shinkusu shoonse ntokwaamba ayi, ‘Webo Gogi omuleli munene wa bene Mesheki aTubali, ntookulwana.

⁴ Ndaakukusandulula, nkakukobe ndobo mumicendwa yako akukutola mubusha pantu pomwi alikoto lyako linene lya bashilumamba. Ndaakutola maaki ako, bashilumamba beshikulwanina pamaaki bacite ashilwanisho shabo, likoto lya bashilumamba baanji bacite mayawo anene aaniini, boonse kabanyamwite mipeeni mumaansa.

⁵ Bashilumamba ba kuPesha, Kushi alimwi aPuti balaakunooli abo boonse kabacite mayawo ashimpoompo.

⁶ Bashilumamba boonse ba mucishi ca Goma, Beti Togama kumatwa alimwi abashilumamba boonse ba mumishobo imwi iinji, balaakunooli awebo.

⁷ “ ‘Libambile, webo alikoto lya bantu bako baanji bakushingulukite, ubatanjilile.

⁸ Paakwiinda nshiku shiinji mulaakwiitwa kuya kunkondo. Mumyaaka itoosa mulaakuya mukulwana cishi ca bantu batokookesha kuswa kunkondo. Ico ncishi ca bantu bakabunganishikwa kuswa pakati ka mishobo iinji kuya kutulundu twa Isilaeli uto twatalinga kucite bantu kwaciindi cilaamfu. Bantu aba bakakushikwa pakati ka mishobo imwi, bulya boonse balishiite kwakubula cakulisukama.

⁹ Webo abashilumamba bako boonse alimwi amishobo imwi iinji njooli ayo, mulaakuya munkondo akulwana anga ncipuupu cinene. Mulaakubabo anga ndikumbi lyafwekelesha cishi.’ ”

¹⁰ Mwaami Lesa Shinkusu shoonse waamba ayi, “Bushiku ubu ulaakuba amuyeeyo ubiibi.

¹¹ Ulaakwaamba ayi, ‘Ndaakubukila cishi cicite mandabala atacite malinga. Ndaakulwana bantu bashiite muluumuno kwakubula cakulisukama. Nkokwaamba ayi boonse abo bekala kutaaku malinga, minjililo nabi mpingilo.

¹² Ndaakusaala akubwesa buboni bwa bantu abo bekala mumandabala anene ayo akalinga matongo. Bantu abo bakabunganishikwa kuswa pakati ka mishobo imwi bulya balicite shifubwa abuboni buunji alimwi balishiite pakati ka shishi shoonse.’

¹³ Mpeeke bantu ba kuSheba, Dedani abeshimakwebo ba kuTashishi amandabala a ncico oonse balaakukwiipusha ayi, ‘Sa wesa mukusaala? Sa wabunganya likoto lyako lya bashilumamba ayi bese basaale silifa, golodi, shifubwa alimwi abuboni bumwi? Sa mutooyanda kutola shintu shoonse isho?’ ”

¹⁴ Paceebo ceeco, Mwaami Lesa wakantuma kwaambila Gogi ayi, “Mwaami Lesa Shinkusu shoonse waamba ayi, ‘Mubushiku ubo bantu bangu bene Isilaeli baakwikala muluumuno, ulaakunyamuka

¹⁵ kuswa kumishaanu kumatwa kulaamfu, webo amishobo imwi iinji njooli ayo, boonse kabatantite maaki, likoto linene lya bashilumamba bacite nkusu.’

¹⁶ Mulaakulwana bantu bangu bene Isilaeli anga ndikumbi lyafwekelesha cishi. Ciindi ico caakushika, webo Gogi, ndaakukutuma kuya mukulwana cishi cangu kwaamba ayi mishobo imwi ikanshiibe. Ndaakutondesha ayi ndisalalite pameenso abo kwiinda muli ndiwe.

¹⁷ Sa teshi ndiwe ndakalinga kwaambaawo munshiku shakeenda kwiinda mubasebenshi bangu balaluki ba muIsilaeli? Ciindi ico bakalaluka myaaka iinji ayi ndaakukuleta kwisa mukubalwana. Nebo neMwaami Lesa ndaamba.”

Lesa mbweshi akape mulandu Gogi

¹⁸ Mwaami Lesa Shinkusu shoonse waamba ayi, “Makani aya ngeshi akacitike mubushiku ubu. Na Gogi akalwaane cishi ca Isilaeli, bukali bwangu buyoosha bulaakubuka.

¹⁹ Mubukali bwangu buyoosha abuumbi ndaamba ayi paciindi ico kulaakuba citentanshi cinene mucishi ca Isilaeli.

²⁰ Inswi shoonse, bayuni boonse, banyama ba muluundu, tulongolo toonse alimwi abantu boonse bekala mucishi ca panshi shilaakututuma kunembo lyangu. Tulundu tulaakuwa, shicengo sha myaandami shilaakupwayooka alimwi lubumbu lomwi alomwi lulaakuwa.

²¹ Ndaakuleta bantu abo beshi bakese mukulwana nkondo aGogi patulundu twangu toonse. Bantu balaakutalika kuyasana mipeeni beene abeene. Nebo neMwaami Lesa Shinkusu shoonse.

²² Ndaakumoombolosha akumupa mulandu kwiinda mukumutumina mwaalu ankoondo. Ndaakumuloshesha mfula inene abuumbi alimwi ya mabwe. Ndaakulosha mulilo asalufa ulungula pali nguwe, bashilumamba bakwe apamishobo imwi iinji njooli ayo.

²³ Mukucita boobo ndaakutondesha mishobo yoonse ayi ndalemekwa alimwi ayi ndisalalite pameenso abo. Lyalo ndyeshi bakeshibe ayi nebo ndi Mwaami Lesa.”