Esekelo 37 - Baibo Busansulushi Bwa Libuku Ili

Cinyika ca mafuwa ayumu

¹ Mpeeke nkusu sha Mwaami Lesa shakanselukila. Mushimu wakwe wakantola pakati ka cinyika ico cakalinga kuswitebo mafuwa.

² Kuswawaawo wakanyinshaanya pakati ka ngawo. Uko ndakabona mafuwa aanji panshi. Mafuwa ayo akalinga ayumu.

³ Mpomunyaawo Mwaami Lesa wakanjipusha ayi, “Webo omuntu, sa mafuwa aya inga akonsha kuba abuumi alimwi?” Anebo ndakakumbula ayi, “NoBaami baLesa Beshinkusu shoonse, mwebo nweenka ndimwe mweenga mwakumbula mwiipusho uyo.”

⁴ Mpeeke wakandwiita ayi, “Laluka pamafuwa aya akwaalwiita ayi, ‘Nomafuwa ayumu, amunyumfwe liswi lya Mwaami Lesa!’

⁵ Waalwiite ayi nebo neMwaami Lesa Shinkusu shoonse ndaamba ayi, ‘Ndaakumufulita muuya muli ndimwe amwebo mulaakuba abuumi.

⁶ Kuswawaawo ndaakumubika mishisa, nyama alimwi akumufwekelesha cikanda. Ndaakumufulita muuya muli ndimwe amwebo mulaakuba abuumi. Lyalo ndyeshi mukeshibe ayi nebo ndi Mwaami Lesa.’ ”

⁷ Aboobo ndakalaluka kweelana ambondakaambilwa. Kaancilaluka, ndakanyumfwa coongo cakokolokokolo. Lyalo mafuwa akatalika kunungana, nkokwaamba ayi lifuwa kulifuwanyina.

⁸ Kaanjebela, ndakabonabo mafuwa ayo akaba amishisa, nyama alimwi acikanda. Sombi taakalinga kucitewo muuya, sobwe.

⁹ Mpeeke Mwaami Lesa Shinkusu shoonse wakandwiita ayi, “Webo omuntu, laluka kumuuwo akuwaambila ayi nebo neMwaami Lesa ndaamba ayi, ‘Webo omuuya, kwesa kuswa kumbasu shone shoonse sha cishi ca panshi unjile mubantu aba bakacaikwa kwaamba ayi babe abuumi.’ ”

¹⁰ Aboobo ndakalaluka kweelana ambondakaambilwa. Ncakwiila muuya wakenjila mumibili ya bantu abo, abalo bakaba abuumi. Mpeeke bakanyamuka akwiimikana. Bakalinga baanji cakukwanabo likoto linene lya bashilumamba.

¹¹ Mpeeke Mwaami Lesa Shinkusu shoonse wakandwiita ayi, “Webo omuntu, mafuwa aya ngumushobo wa bene Isilaeli woonse. Balo balaamba ayi, ‘Mafuwa esu akayuma, kulangila kwesu kwakamaninina. Ncakwiila twanyonyooka cakumaninina.’

¹² Paceebo ceeco laluka ubalwiite ayi nebo neMwaami Lesa Shinkusu shoonse ndaamba ayi, ‘Ndaakucalula shuumbwe shanu, nkamukusheemo akumuboosha kucishi canu ca Isilaeli.

¹³ Ono mwebo nobantu bangu, bushiku mbweshi nkacalule shuumbwe shanu akumukushaamo, mulaakwishiba ayi nebo ndi Mwaami Lesa.

¹⁴ Ndaakubika Mushimu muli ndimwe amwebo mulaakuba abuumi alimwi ndaakumulengesha kwikala mucishi canu. Lyalo mulaakwishiba ayi nebo ndi Mwaami Lesa nendashomesha kucita boobo alimwi ndaakucicita. Nebo neMwaami Lesa ndaamba.’ ”

Cishi ca Juda aca Isilaeli mubulelo bomwi

¹⁵ Mpeeke Mwaami Lesa wakaŋambila ayi,

¹⁶ “Webo omuntu, bwesa kasamu ulembewo ayi, ‘Kasamu ka bene Juda alimwi abene Isilaeli abo mbobanyumfwanaabo.’ Kuswawaawo ubwese kasamu kamwi ulembewo ayi, ‘Kasamu ka bene Efuleemu, ee, ka bene Josefu abene Isilaeli abo mbobanyumfwanaabo.’

¹⁷ Lyalo tusamu uto utununganye kwaamba ayi kabe anga nkasamu komwi mumaansaako.

¹⁸ “Ono bene mishaanu na bakwiipushe ayi, ‘Sa teshi utusansulwite ncecaamba ici?’

¹⁹ Webo ubalwiite ayi nebo neMwaami Lesa ndaamba ayi, ‘Ndaakubwesa kasamu ka mukowa wakwe Josefu ako kali mumaansaakwe Efuleemu pantu pomwi abene Isilaeli abo banyumfwanaakwe akukanunganya kukasamu ka mukowa wakwe Juda ayi tube kasamu komwi ako keshi kakanooli mumaansaangu.

²⁰ Kuswawaawo ucate tusamu uto ntowalembaawo bantu kabakubwene

²¹ akubaambila ayi nebo neMwaami Lesa Shinkusu shoonse ndaamba ayi, Ndaakukusha bene Isilaeli kuswa mumishobo iyo njebakaya mukwikalaako mumbasu shone shoonse sha cishi ca panshi akubaboosha mucishi cine mishaabo.

²² Kuswawaawo ndaakubalengesha kuba mushobo womwi mucishi ico cili patulundu twa Isilaeli. Kulaakubabo mwaami womwi pakati kabo boonse. Teshi bakabewo tubili mishobo yobilo nabi kwaabanishikwa mumalelo obilo.

²³ Teshi bakalibishewo tubili kushikoshanyo shabo, kushibumbwabumbwa shabo shilensha bunya nabi kushibiibi shabo shimwi shoonse. Ncakwiila ndaakubasalasha kuswa kushibiibi shabo shoonse. Balaakuba bantu bangu anebo ndaakuba Lesa wabo.

²⁴ “ ‘Wamulunyungu lwakwe Defedi musebenshi wangu ngweshi akabe mwaami wabo. Lyalo boonse balaakubabo amweembeshi womwi. Balaakunookonkela milawo amilasho yangu cakushomeka.

²⁵ Balaakwikala mucishi ico ncendakapa musebenshi wangu Jakobo, ee, cishi ico cakalinga kwikalaamo bamashali banu bakulukulu. Balo, bana babo alimwi abamulunyungu lwabo balaakunookala mumo kwamuyayaya. Wamulunyungu lwakwe Defedi ngweshi akabe mwaami wabo kwalyoonse alyoonse.

²⁶ Ndaakupanga cipangano ca luumuno ambabo. Cilaakuba cipangano calyoonse alyoonse. Ndaakushimpya bulelo bwabo akubafusha alimwi ndaakubika Ŋanda yangu pakati kabo kwalyoonse alyoonse.

²⁷ Ndaakunookala pakati kabo. Ndaakuba Lesa wabo, abalo balaakuba bantu bangu.

²⁸ Mishobo yaakubona ayi ndabika Ŋanda yangu pakati kabo kwalyoonse alyoonse, ilaakwishiba ayi nebo neMwaami Lesa ndakasala bene Isilaeli kuba bantu bangu.’ ”