Esekelo 36 - Baibo Busansulushi Bwa Libuku Ili

Mwaami Lesa ulaakupa coolwe bene Isilaeli

¹ Mpeeke Mwaami Lesa wakandwiita ayi, “Webo omuntu, laluka patulundu twa Isilaeli akutulwiita ayi tukutike maswi angu nebo

² neMwaami Lesa Shinkusu shoonse. Balwani bako bakaamba ayi, ‘Cabota! Tulundu tulya tukulukulu, sunu twaba twesu.’

³ “Paceebo ceeco laluka akubalwiita ceeco ncendaamba nebo neMwaami Lesa Shinkusu shoonse. Mishobo ishingulukite ndiyakakoma akusaala tulundu twa Isilaeli, yoonse yakasebaanya bene Isilaeli.

⁴ Paceebo ceeco, amukutike ico nceentokwaamba nebo neMwaami Lesa Shinkusu shoonse kuli ndimwe notulundu tunene atuniini, notulonga ashinyika, nomatongo amandabala akacaala cisuukila ayo akasaalwa alimwi akacelebulwa kumishobo yoonse ishingulukite.

⁵ “Nebo neMwaami Lesa Shinkusu shoonse ndaamba ayi, ‘Ntookalalila mishobo imwi yoonse mubukali bwangu buyoosha, bunene bunene kwaambila bene Edomu. Ntoocita boobo ceebo bakabwesa cishi cangu kwaamba ayi basaale mafulo a ncico cakusangalala amusebaanyo.’

⁶ “Paceebo ceeco, laluka sha pacishi ca Isilaeli. Aambila tulundu tunene atuniini, tulonga ashinyika ico nceentokwaamba nebo neMwaami Lesa Shinkusu shoonse. Ntokwaamba mubukali bwangu bwa busuba ceebo ca nshila iyo mishobo imwi nceyakabasebaanishilaamo.

⁷ Paceebo ceeco nebo neMwaami Lesa Shinkusu shoonse ndaamba ayi, ‘Ndashomesha cakulumbila kaantambikite lyaansa lyangu mwiculu ayi mishobo imushingulukite ayalo ilaakusebaana.’

⁸ “ ‘Sombi pali ndimwe notulundu twa Isilaeli, shisamu shilaakuba amisampi akucatila shisepo bantu bangu bene Isilaeli. Bene Isilaeli bali pafwaafwi kuboola kumishaabo.

⁹ Ndi kulubasu lwako, aboobo ndaakukubikaako maano kwaamba ayi ukaliimwe akushangwa.

¹⁰ Ndaakufusha mweelo wa bantu pali ndimwe, nkokwaamba ayi ndaakufusha mushobo woonse wa bene Isilaeli. Mumandabala ako mulaakunookala bantu alimwi, aalo maanda alaakuyakululwa.

¹¹ Ndaakufusha mweelo wa bantu ashifubwa pali ndimwe. Balaakushalana alimwi akufula. Ndaakwikalika bantu pali ndiwe mbuli kalekale akukulengesha kuswitilila kwiinda pakutaanguna. Lyalo ndyeshi mukeshibe ayi nebo ndi Mwaami Lesa.

¹² Ndaakulengesha bantu, ee, bantu bangu bene Isilaeli kweendaana pali ndimwe. Mwebo mulaakuba cishi cabo. Amwebo teshi mukaalilwewo tubili kupa bana babo shakulya.’

¹³ “Bulya nebo neMwaami Lesa Shinkusu shoonse ndaamba ayi, ‘Ndushinisho bantu balamwaambila ayi mulalya bantu akucaya baana ba mumushobo wa bene Isilaeli.

¹⁴ Sombi kuswa sunu teshi mukalyewo tubili bantu nabi kumana kucaya baana. Nebo neMwaami Lesa Shinkusu shoonse ndaamba.

¹⁵ Teshi nkamulekelesheewo tubili ayi musekwe kumishobo imwi nabi musebaanishikwe kubantu. Teshi mukacayewo baana ba mumushobo wanu. Nebo neMwaami Lesa Shinkusu shoonse ndaamba.’ ”

Buumi bupya bwa bene Isilaeli

¹⁶ Mpeeke Mwaami Lesa wakaŋambila ayi,

¹⁷ “Webo omuntu, bene Isilaeli ndibakalinga kwikala mucishi cabo, bakacibisha kubwikaalo bwabo amicito yabo. Micito yabo yakalinga kubalengesha kutanoosalalite kweelana aMilawo anga ngumwanakashi wakubala.

¹⁸ Aboobo ndakabalengesha kunyumfwa cilemeneshi ca bukali bwangu buyoosha ceebo ca bulowa mbobakatila mucishi alimwi mukwiinga bakacibisha kushibumbwabumbwa shabo.

¹⁹ Ndakabapalanganishisha pakati ka mishobo imwi. Ndakaboombolosha kweelana abwikaalo bwabo alimwi amicito yabo.

²⁰ Koonse uko nkobakalinga kuya pakati ka mishobo imwi, bakasebaanya liina lyangu lisalalite ceebo bantu bakalinga kubaamba ayi, ‘Aba mbobantu ba Mwaami Lesa, nakubi boobo bakatandwa kucishi cakwe.’

²¹ Ndakapenshekwa amoyo paliina lyangu lisalalite ilyo bene Isilaeli ndyebakabisha pakati ka mishobo iyo njebakaya mukwikalaako.

²² “Paceebo ceeco lwiita bene Isilaeli ayi nebo neMwaami Lesa Shinkusu shoonse ndaamba ayi, ‘Teshi nkacite shintu nsheshi nkacite ceebo canu nobene Isilaeli. Sombi ndaakushicita ceebo ca liina lyangu lisalalite ilyo ndimwakabisha pakati ka mishobo iyo njemwakaya mukwikalaako.

²³ Ono ndaakutondesha kusalala kwa liina lyangu lilemekwa, ilyo lyakabishikwa pakati ka mishobo, ee, liina ndimwakabisha pakati ka mishobo. Lyalo ndyeshi bakeshibe ayi ndi Mwaami Lesa. Nebo Mwaami Lesa Shinkusu shoonse ndaamba. Ndaakutondesha ayi ndisalalite pameenso abo kwiinda muli ndimwe.

²⁴ “ ‘Ndaakumukusha mushishi sha mishobo imwi akumuboosha mucishi cine mishaanu.

²⁵ Ndaakumusanseela maanshi asalalite mukusalasha kuswa kusheesho shoonse shakamubisha alimwi ashibumbwabumbwa shanu.

²⁶ Ndaakumupa myoyo ipya alimwi atulango tupya. Ndaakukusha myoyo yanu iyumu anga ngamabwe akumupa myoyo inyumfwila ndime.

²⁷ Ndaakubika Mushimu wangu muli ndimwe akumulengesha kukonkela milasho yangu alimwi akunyumfwila milawo yangu cakushomeka.

²⁸ Mulaakunookala mucishi ico ncendakapa bamashali banu bakulukulu. Mulaakuba bantu bangu, anebo ndaakuba Lesa wabo.

²⁹ Ndaakumupulusha kusheesho shoonse shakalinga kumubisha. Ndaakulengesha shili anga ngamaila kufula cakutakolwawo tubili nsala.

³⁰ Ndaakulengesha shisamu shanu kucata shisepo shiinji akulengesha shishango shimwi kucata abuumbi kwaamba ayi mutakanyumfwi nsoni pakati ka mishobo ceebo ca nsala.

³¹ Lyalo mulaakwiibaluka nshila shanu shibiibi amicito yanu ibiibi alimwi mulaakulisenda ceebo ca shibiibi shanu ashintu nshemwakalinga kucita shilensha bunya.

³² Ntooyanda kumushibisha ayi nshitoocita shintu ishi ceebo ca ndimwe, sobwe. Amunyumfwe nsoni akulisenda pamicito yanu mwebo nobene Isilaeli. Nebo neMwaami Lesa Shinkusu shoonse ndaamba.’ ”

³³ Mwaami Lesa Shinkusu shoonse waamba ayi, “Bushiku mbweshi nkamusalashe kuswa kushibiibi shanu shoonse, ndaakulengesha ayi mumandabala anu mukanookala bantu alimwi, aalo maanda alaakuyakululwa.

³⁴ Cishi canu cakalinga cacaala cisuukila, cilaakulimwa alimwi. Teshi cikanoociboneka ayi nduyanga kubaabo beendaamo.

³⁵ Bantu balaakunokwaamba ayi, ‘Cishi ici cakalinga canyonyoolwa, bulya cababo anga ngumuunda wa Edeni. Mandabala akalinga aba matongo, musena utacite bantu alimwi ayo akalinga anyonyoolwa, ono aba amalinga alimwi mulekala bantu.

³⁶ Lyalo mishobo imushingulukite iyo yeshi ikacaaleewo ilaakwishiba ayi nebo neMwaami Lesa ndime ndayakulula isho shakanyonyoolwa akushanga cipya umo mwakalinga mwaba matongo. Nebo neMwaami Lesa ndaamba alimwi ndaakushicita.’ ”

³⁷ Mwaami Lesa Shinkusu shoonse waamba ayi, “Ndaakunyumfwa kusenga kwa bene Isilaeli akubacafwa. Ndaakubafusha anga nimbelele,

³⁸ shakubenga milambu muJelusalemu pabushiku bwa Kusekelela. Aboobo mandabala ayo oonse akalinga aba matongo alaakusula bantu anga nimbelele isho. Lyalo ndyeshi bakeshibe ayi nebo ndi Mwaami Lesa.”