Esekelo 35 - Baibo Busansulushi Bwa Libuku Ili

Lesa mbweshi akape mulandu bene Edomu

¹ Mpeeke Mwaami Lesa wakaŋambila ayi,

² “Webo omuntu, langa kucishi ca Edomu ulaluke mapensho pali ncico mukubalwiita ayi

³ nebo neMwaami Lesa Shinkusu shoonse ndaamba ayi, ‘Webo oKalundu ka Siya, ntookulwana. Ndaakutambika lyaansa lyangu akukulengesha kuba luyanga.

⁴ Ndaakunyonyoola mandabala ako ayi akabe matongo. Lyalo ndyeshi ukeshibe ayi nebo ndi Mwaami Lesa.

⁵ “ ‘Webo wakatolelela lupato lwako lukulukulu pabene Isilaeli akubaaba kumupeeni muciindi ca mapensho abo. Ee, ciindi cakupekwa mulandu kwabo pashibiibi shabo ndicakashikila.

⁶ Paceebo ceeco kweelana ambocibete lushinisho ayi nebo neMwaami Lesa Shinkusu shoonse ndi muumi, mbweeke ubo ndaakumwaaba kulufu alimwi teshi mukakonshewo kululoboka. Ulicite mulandu wa bucayi, aboobo awebo ulyeelete kucaikwa.

⁷ OKalundu ka Siya, ndaakukunyonyoola akukulengesha kuba luyanga alimwi ndaakucaya woonse weshi akeende muli ndiwe.

⁸ Ndaakususha tulundu twako abaabo beshi bakacaikwe. Mituntu ya baabo beshi bakafwite munkondo ilaakwisula patulundu twako, shinyika atulonga twako toonse.

⁹ Ndaakukusandula kuba luyanga kwalyoonse alyoonse. Taaku weshi akekalewo tubili mumandabala ako. Lyalo ndyeshi ukeshibe ayi nebo ndi Mwaami Lesa.

¹⁰ “ ‘Webo wakalinga kwaamba ayi mishobo yobilo iyi, Juda aIsilaeli, pantu pomwi ashishi sha njiyo shilaakuba sheesu. Ncakwiila tulaakushibwesa, nakubi kwaamba ayi nebo neMwaami Lesa ndi Lesa wabo.

¹¹ Paceebo ceeco, kweelana ambocibete lushinisho ayi nebo neMwaami Lesa Shinkusu shoonse ndi muumi, ndaakukucita kweelana abukali alimwi amunyono ngowakatondesha mukupata bamumishobo iyo. Bantu abo balaakwishiba ayi ntookupa mulandu ceebo ca ceeco ncewakacita kuli mbabo.

¹² Lyalo ndyeshi ukeshibe ayi anu nebo neMwaami Lesa ndakanyumfwa ndiwakalinga kwaamba camusebaanyo ayi tulundu twa Isilaeli nduyanga alimwi ayi twakapekwa kuli ndiwe ayi utunyonyoole.

¹³ Mwakalinga kuntwaangila akwaamba makani abiibi pali ndime kwakutalitibuka, nebo nemwiine kaandinyumfwila.’ ”

¹⁴ Mwaami Lesa Shinkusu shoonse waamba ayi, “Ndaakukulengesha kuba luyanga, lyalo cishi coonse ca panshi cilaakusangalala.

¹⁵ Cilaakusangalala bweenka webo mbowakasangalala cishi ca Isilaeli, ee, cishi cangu, ndicakanyonyoolwa. Ulaakuba luyanga, oKalundu ka Siya, ee, webo a cishi ca Edomu coonse. Lyalo bantu boonse ndyeshi bakeshibe ayi nebo ndi Mwaami Lesa.”