Esekelo 33 - Baibo Busansulushi Bwa Libuku Ili

Mwaami Lesa mbwaakasala Esekelo kuba shikulindilila

¹ Mpeeke Mwaami Lesa wakaŋambila ayi,

² “Webo omuntu, lwiita bene mishaanu ayi, ‘Na ndaleta nkondo mucishi, bantu ba mucishi ico balasala womwi pakati kabo kuba shikulindilila.

³ Shikulindilila uyo na wabona balwani kabesa, ulalisha lupeenga kucenjesha bantu.

⁴ Ono na umwi wanyumfwa, kuswawaawo wabula kubikaako maano, balwani na besa bamucaya, muntu uyo ngayi walicaisha mwiine.

⁵ Mukwiinga wanyumfwa lupeenga ndilwalila, sombi lakwe wasuula. Ncakwiila muntu uyo walicaisha mwiine. Naanyumfwa kucenjeshekwa naakwiinga wapuluka.

⁶ Ono na shikulindilila wabona balwani kabesa, sombi wabula kulisha lupeenga lwakucenjesha bantu, mpeeke balwani besa akucayaawo womwi, muntu uyo ulaakufwita shibiibi shakwe. Sombi anebo ndaakupa mulandu shikulindilila pabulowa bwakwe.’

⁷ “Webo omuntu, ndaakubika kuba shikulindilila mushobo wa bene Isilaeli. Paceebo ceeco unoonyumfwa maswi ngweshi nokwaamba, awebo unooya mukubacenjesha kweelana amaswi angu.

⁸ Na ndaambila mucita shibi ayi, ‘Ndushinisho webo ulaakufwa,’ ono webo wabula kumucenjesha nabi kumwaambila kwaamba ayi aleke nshila shakwe shibiibi ayi atafwi, muntu uyo ulaakufwa ceebo ca shibiibi shakwe isho. Sombi awebo ulaakupekwa mulandu pabulowa bakwe.

⁹ Sombi na wamucenjesha mucita shibi, ono wabula kusanduka kuswa kububi bwakwe nabi kunshila shakwe shibiibi, ulaakufwa ceebo ca shibiibi shakwe, sombi webo ulaakupulusha buumi bwako.”

Muntu amuntu ulaakupekwabo mulandu ceebo ca shibiibi shakwe

¹⁰ Mpeeke Mwaami Lesa wakaŋambila ayi, “Webo omuntu, ibalusha bene Isilaeli isho nshebaamba. Balaamba ayi, ‘Swebo twalemenwa shilubo alimwi ashibiibi shesu. Paceebo ceeco twamana kunyanga ceebo ca nshisho. Ino inga twaba buyani abuumi?’

¹¹ Balwiite kwaamba ayi, ‘Ndushinisho kweelana ambocibete lushinisho ayi nebo neMwaami Lesa ndi muumi, nebo nshisangalali kubona mucita shibi kaafwa? Sombi ndasangalala kumubona kaasanduka kuswa kunshila shakwe shibiibi akuba abuumi. Amusanduke! Amusanduke kuswa kunshila shanu shibiibi! Ceebonshi mutooyanda kufwa mwebo nobene Isilaeli?’

¹² “Paceebo ceeco, webo omuntu, lwiita bene mishaanu ayi, ‘Bululami bwa muntu teshi bukamupulushe na wabisha. Shibiibi sha muntu teshi shikamucaishe na wasanduka kuswa kuli nshisho. Alakwe muntu walinga kucita shiluleme, na wabisha teshi akasuminishikwe kuba abuumi ceebo ca bululami bwakwe bwa kalekale.’

¹³ Na ndalwiita muntu ululeme ayi, ‘Ndushinisho ulaakuba abuumi,’ sombi kaacinkite manungo mubululami bwakwe bwa kalekale nabi kaacita shibiibi, bululami bwakwe boonse mbwaakacita teshi bukeebalukwewo tubili. Muntu uyo ulaakufwita shibiibi nshaakacita.

¹⁴ Inga ndaambila mucita shibi ayi, ‘Ndushinisho webo ulaakufwa,’ ono lakwe wasanduka kuswa kushibiibi shakwe akucita shintu shakutanyengelela alimwi shiluleme,

¹⁵ nkokwaamba ayi na wapilusha cintu ncaakacatila shinkongole, wapilusha nshaakeepa, wakonkela milasho iyo ipa buumi alimwi akuleka kubisha, ndushinisho muntu uyo ulaakuba abuumi. Teshi akafweewo, sobwe.

¹⁶ Shibiibi shakwe shoonse nshaakacita teshi shikeebalukwewo tubili ceebo wacita shintu shakutanyengelela alimwi shiluleme. Ndushinisho muntu uyo ulaakuba abuumi.

¹⁷ “Nakubi kwaamba ayi bene mishaanu balaamba ayi, ‘Nshila sha Mwaami Lesa tashilulemeewo.’ Sombi ninshila shabo shitaluleme.

¹⁸ Na muntu waswa kubululami bwakwe akutalika kucita bubi, ulaakufwa ceebo ca bubi bwakwe.

¹⁹ Na muntu wasanduka kuswa kushibiibi shakwe akucita shintu shakutanyengelela alimwi shiluleme, muntu uyo ulaakuba abuumi ceebo cakucita boobo.

²⁰ Nakubi boobo, mwebo nobene Isilaeli mulaamba ayi, ‘Nshila sha Mwaami Lesa tashilulemeewo,’ sombi nebo muntu womwi awomwi ndaakumoombolosha kweelana anshila shakwe mwiine.”

Makani akukomwa kwa ndabala ya Jelusalemu

²¹ Mumwaaka wamakumi obilo amyaaka yosanwe wa busha bwesu, pabushiku bwasanu bwa mweenshi walikumi, muntu wakaloboka kuJelusalemu wakesa kuli ndime akwaamba ayi, “Ndabala yakakomwa!”

²² Ono macolesha muntu uyo kaatana kushika, lyaansa lya Mwaami Lesa lyakancata. Lyalo bushiku bwakaboolaawo macuunsa muntu uyo ndyaakesa, ndakakonsha kwaamba alimwi.

Shibiibi sha bantu

²³ Mpeeke Mwaami Lesa wakaŋambila ayi,

²⁴ “Webo omuntu, bantu bekala mumatongo mucishi ca bene Isilaeli batokwaamba ayi, ‘Abulaamu wakalingabo eenka, nakubi boobo cishi ici cakalinga caakwe coonse. Ono swebo tuli baanji aboobo bulya cishi ici ncesu.’

²⁵ “Paceebo ceeco balwiite ayi nebo neMwaami Lesa Shinkusu shoonse ndaamba ayi, ‘Mwebo mulalya nyama icicite bulowa, mulalambila shibumbwabumbwa alimwi mulacaya bantu. Sa ubo ingayi mulyeelete kupekwa cishi?

²⁶ Mulicinkite manungo mumipeeni yanu, mulacita shintu shilensha bunya alimwi womwi awomwi ulacita bulale. Sa ubo ingayi mulyeelete kupekwa cishi?’

²⁷ “Balwiite ayi nebo neMwaami Lesa Shinkusu shoonse ndaamba ayi, ‘Kweelana ambocibete lushinisho ayi ndi muumi, mbweeke ubo abo bakacaala mumatongo balaakucaikwa munkondo. Abo bekala muluundu ndaakubaaba kubanyama ba muluundu. Abalo abo boonse bekala mushiyubilo amushimfwengo, balaakufwa kumwaalu.

²⁸ Ndaakusandula cishi kuba luyanga ankusu nshebalinga kulisumpwitaawo shilaakubamana. Atwalo tulundu twa muIsilaeli tulaakucaalabo tuu cakwaamba ayi taaku muntu eshi akanokwiindaamo.

²⁹ Ndaakunyonyoola cishi akucilengesha kuba luyanga ceebo ca shintu shilensha bunya shoonse shakacita bantu. Lyalo ndyeshi bakeshibe ayi nebo ndi Mwaami Lesa.’ ”

Shakaswa mumaswi a mulaluki Esekelo

³⁰ Mpeeke Mwaami Lesa wakaŋambila ayi, “Ono webo omuntu, bene mishaanu batoobandika pali ndiwe kweela lubumbu lwa ndabala alimwi apamilyango ya maanda ayi, ‘Amwise munyumfwe makani aswa kuMwaami Lesa.’

³¹ Bantu bangu balesa kuli ndiwe bweenka mbobacita lyoonse akwikala kunembo lyako ayi bakutike maswi ako, sombi tabaciti nshoobaambila, sobwe. Balaamba ayi balashomeka kuli ndime, sombi myoyo yabo ilibo mukubilila munshila italuleme.

³² Ncakwiila kuli mbabo ulabonekabo anga ngumuntu ubeembila nyimbo shalusuno akulisha kabotu kalumbu. Balakutika maswi ako, sombi tabaciti nshoobaambila.

³³ “Shoonse ishi shaakucitika, alimwi ndushinisho shilaakucitika, lyalo balaakwishiba ayi mulaluki walingaawo pakati kabo.”