Esekelo 32 - Baibo Busansulushi Bwa Libuku Ili

Mwaami wa Ijipiti mbwaakakoshanishikwa ashinshimwe

¹ Mumwaaka walikumi ayobilo, pabushiku bwakutaanguna bwa mweenshi walikumi ayobilo, Mwaami Lesa Shinkusu shoonse wakaŋambila ayi,

² “Webo omuntu, imba lwiimbo lwa buumba kulilila Falawo mwaami wa Ijipiti ayi, ‘Webo ulibo anga ninkalamu pakati ka mishobo imwi, ulibo anga ngushinshimwe mulweenge, shinshimwe usamfoola maanshi mutulonga twakwe. Ulafundaanya maanshi amyeendo yako akulengesha tulonga kuba matipa.’

³ “Ono nebo neMwaami Lesa Shinkusu shoonse ndaamba ayi, ‘Ndaakubunganya bantu baanji akuwaala koombe kangu pali ndiwe ayi ucatwe abalo balaakukukwelela kwitala akoombe kangu.

⁴ Ndaakukusowela kumutunta alimwi ndaakukuwaala paliwesa. Ndaakuleka bayuni boonse kwikala pali ndiwe, akuleka banyama boonse kwisa mukukulya.

⁵ Ndaakutula nyama yako patulundu akususha shinyika atupanshapansha twako tweshi tukacaaleewo.

⁶ Ndaakutontosha bulongo abulowa bwako ubo bweshi bukanookunka kuya mukushika kutulundu. Tulonga tulaakusulabo nyama yako.

⁷ Bushiku ubo mbweshi nkakunyonyoole, ndaakufwekelesha liculu akushimya nyenyeenshi. Lisuba ndaakulifwekelesha alikumbi awalo mweenshi teshi ukapeewo mumuni wa nguwo.

⁸ Ndaakushimya mimuni yoonse ya mwiculu, akuleta munshinshe mucishi cako. Nebo neMwaami Lesa Shinkusu shoonse ndaamba.

⁹ “ ‘Ndaakupensha myoyo ya bantu baanji bushiku ndaakuluula shakunyonyooka kwako pakati ka mishobo imwi, ee, pakati ka shishi isho nshooteshi.

¹⁰ Ndaakulengesha bantu baanji kukankamana kuceeco nceshi nkacite. Bamaami babo balaakututuma kuboowa ceebo cako, ndaakushingulusha mupeeni kunembo lyabo. Pabushiku bwa kuwa kwako, womwi awomwi ulaakunootutumabo ciindi aciindi kuyeyeela buumi bwakwe.’ ”

¹¹ Paceebo ceeco Mwaami Lesa Shinkusu shoonse waamba ayi, “Mupeeni wa mwaami wa bene Babiloni ulaakwisa mukumulwana.

¹² Ndaakulengesha bantu bako boonse kucaikwa kumupeeni wa bantu bacite nkusu shiinji, ee, bantu beendaawo kubula nkumbu pamishobo yoonse. Balaakumanisha kulisumpula kwa cishi ca Ijipiti alimwi amakoto a bantu ba ncico boonse balaakukomwa.

¹³ Ndaakunyonyoola ŋombe shakwe kweenka nkoshinwita maanshi. Ncakwiila maanshi teshi akafundooshikwewo tubili kumyeendo ya muntu nabi kuba amatipa kushoondo sha ŋombe.

¹⁴ Lyalo ndaakuleka maanshi ako ayi akalile akulengesha tulonga kukunka anga ngamafuta. Nebo neMwaami Lesa Shinkusu shoonse ndaamba.

¹⁵ Bushiku ndaakusandula cishi ca Ijipiti kuba luyanga, akunyonyoola shoonse shili mucishi ico, alimwi ndaakucaya bantu boonse bekalaamo, balaakwishiba ayi nebo ndi Mwaami Lesa.

¹⁶ “Ulu ndolwiimbo lwa buumba lwakulila cishi ca Ijipiti. Banakashi ba mumishobo yoonse balaakwiimba lwiimbo ulu kulilila cishi ico alimwi amakoto oonse a bantu bakwe. Nebo neMwaami Lesa Shinkusu shoonse ndaamba.”

Musena wa bafu

¹⁷ Mumwaaka walikumi ayobilo wa busha bwesu, pabushiku bwalikumi ashosanwe bwa mweenshi wakutaanguna, Mwaami Lesa wakaŋambila ayi,

¹⁸ “Webo omuntu, lilila bantu baanji baanji ba cishi ca Ijipiti. Tuma bantu abo kumusena wa bafu. Ubatuume pantu pomwi abantu abo beshinkusu ba mumishobo imwi.

¹⁹ Ubeepushe ayi, ‘Sa mwebo mulisunikwi kwiinda bamwi? Mulaakuya kumusena wa bafu akoona pantu pomwi abaabo batapalwitwe.’

²⁰ Bene Isilaeli balaakufwita pakati ka baabo beshi bakacaikwe munkondo. Mupeeni weelekwa kale. Cishi ca Ijipiti acikwelelwe pantu pomwi abantu baanji baanji ba ncico.

²¹ Bamatanjilili beshinkusu balaakwaamba pabene Ijipiti apabaabo mbobakalinga kucafwanaabo munkondo ayi, ‘Abalo besa mukoona pantu pomwi abaabo batapalwitwe abo bakacailwa munkondo.’

²² “Asilya alakwe nkwaabete pantu pomwi alikoto lya bashilumamba bakwe boonse. Ulishingulukitwe ashuumbwe sha bantu boonse abo bakacailwa munkondo.

²³ Ashuumbwe shabo shilibo panshi peene pamusena wa bafu. Bashilumamba bakwe balilete kushinguluka cuumbwe cakwe. Boonse balya bakalinga kuloondesha bamwi mucishi ca boomi abo bakacailwa munkondo.

²⁴ “Ilamu alakwe nkwaabete ashuumbwe sha bashilumamba bakwe shilishingulukite cuumbwe cakwe. Boonse abo bakacailwa munkondo. Boonse bakalinga kuloondesha bamwi mucishi ca boomi bakaya cakubula kupalulwa mumusena wa bafu. Bulya balifwite munsoni shabo beene.

²⁵ Wakayalilwa kale bulo pakati ka baabo bakacailwa munkondo ashuumbwe sha bashilumamba bakwe shilishingulukite cuumbwe cakwe. Bantu aba boonse tabapalwitwe, sobwe. Boonse abo bakacailwa munkondo. Balo bakalinga kuloondesha bamwi mucishi ca boomi, sombi bulya balifwite munsoni shabo beene pantu pomwi abaabo bakacailwa munkondo.

²⁶ “Mesheki aTubali nkobabete kweenka uko ashuumbwe sha bashilumamba babo shilishingulukite shuumbwe shabo. Boonse abo tabapalwitweewo alimwi boonse bakacailwa munkondo ceebo bakalinga kuloondesha bamwi mucishi ca boomi.

²⁷ Sa tabalete pantu pomwi abashilumamba bamwi balya batapalwitwe bafwite abo bakaya kumusena wa bafu ashilwanisho shabo shoonse, ee, bakabikilwa mipeeni yabo kumitwi? Mulandu wa shibiibi shabo wakalimbilila mafuwa abo. Nakubi kwaamba ayi bashilumamba aba bakalinga beshinkusu abo bakalinga kuloondesha bamwi mucishi ca boomi.

²⁸ “Amwebo nobene Ijipiti mulaakupwayoolwa akoona pantu pomwi abatapalwitwe abo bakacailwa munkondo.

²⁹ “Alakwe Edomu nkwaabete uko pantu pomwi abamaami alimwi abaleli bakwe. Nakubi kwaamba ayi bakalinga kucite nkusu shiinji, balilete pantu pomwi abaabo bakacailwa munkondo. Balibo pantu pomwi abatapalwitwe abo bali mumusena wa bafu.

³⁰ “Banaabaami boonse ba kumatwa abene Sidoni boonse nkobabete kweenka uko. Bakaya kooko pantu pomwi abakacaikwa lufu lulensha nsoni nakubi kwaamba ayi mbobakalinga kuloondesha bamwi kunkusu shabo. Bakafwa lufu lwa kutapalulwa pantu pomwi abaabo bakacailwa munkondo akoona munsoni shabo beene pomwi abaabo bamwi baya kumusena wa bafu.

³¹ “Falawo alikoto lya bashilumamba bakwe ulaakubabona boonse abo akuumbulushikwa pabantu bakwe baanji baanji bakacailwa munkondo. Nebo neMwaami Lesa Shinkusu shoonse ndaamba.

³² Nakubi kwaamba ayi ndakalinga kumuleka kaaloondesha bamwi mucishi ca boomi, lakwe abantu bakwe balaakoonekwa pakati ka bantu batapalwitwe abo bakacailwa munkondo. Nebo neMwaami Lesa Shinkusu shoonse ndaamba.”