Esekelo 31 - Baibo Busansulushi Bwa Libuku Ili

Cishi ca Ijipiti mbocakakoshanishikwa acisamu ca Sida

¹ Mumwaaka walikumi awomwi wa busha bwesu, pabushiku bwakutaanguna bwa mweenshi watatu, Mwaami Lesa wakaŋambila ayi,

² “Webo omuntu, lwiita Falawo mwaami wa bene Ijipiti abantu bakwe ayi, ‘Webo ulicite bulemu buunji abuumbi! Anu webo inga ndakukoshanisha anshi?

³ Webo uli anga ncisamu ca sida ca kuLebanoni ico cakalinga kucite misampi ibotu yakalinga kupa cimfule cinene pamusaansa woonse. Cakalinga cilaamfu abuumbi kuya mukushika amumakumbi.

⁴ Maanshi akacilengesha kukomena kabotu, Tuntupu tulaamfu twakacilengesha kulaampa. Tulonga twa ntuto twakalinga kukunka kushinguluka cisamu ico akutuma maanshi kushisamu sha muluundu shoonse.

⁵ Aboobo cakalaampa kuya mwiculu kwiinda shisamu sha muluundu shoonse. Misampi ya ncico yakakomena abuumbi ceebo ca maanshi kufula.

⁶ Bayuni boonse bakalinga kupanga shinswa mumisampi ya ncico. Abalo banyama ba muluundu boonse bakalinga kwisa mukushalila munshaacisamu ico. Mishobo yoonse inene yakalinga kwikala mucimfule ca ncico.

⁷ Cabota cisamu nceeci mwebo! Cakalinga cisamu cicite misampi ilaamfu ceebo miyanda yakalinga kuya panshi peene akushika kumaanshi aanji.

⁸ Taaku cisamu ca sida cakalinga mumuunda wakwe Lesa cikonsha kweelanishikwa a ncico. Taaku cisamu ca mapaini cakalinga kucite misampi ya mushobo uyo. Taaku cisamu cimwi cili coonse cakalinga kucite matewu a mushobo uyo. Ncakwiila taaku cisamu nabi comwi mumuunda wakwe Lesa cakalinga cibotu mbuli ceeco.’

⁹ Ndakacilengesha kuboneka kabotu abuumbi mukucipa misampi iinji. Ncakwiila shisamu shoonse sha mumuunda wa Edeni shakalinga kukumbwa kuba mbuli cisamu ico.

¹⁰ “Paceebo ceeco nebo neMwaami Lesa Shinkusu shoonse ndaamba ayi, ‘Ono ceebo cakwaamba ayi cakalaampa cakuyanda kushika amumakumbi alimwi akulisumpula kwa ncico ceebo ca kulaampa,

¹¹ ndakacaaba mumaansa a mweendeleshi muswamashi kwaamba ayi aciciite kweelana abubi bwa ncico. Ono ndacikaka

¹² alimwi ndaakusuminisha baswamashi beendaawo kubula nkumbu pamishobo yoonse ayi bakaciteeme akucishiya. Misampi ya ncico amatewu alaakulokela patulundu toonse amushinyika shoonse sha mucishi. Lyalo mishobo ya mucishi coonse iyo yakalinga kwikala mucimfule ca cisamu ico ilaakuswaamo akuya.

¹³ Bayuni boonse balaakwikala pacisamu ico ceshi cikawe, alimwi abanyama boonse balaakweenda pakati ka misampi ya ncico.

¹⁴ Paceebo ceeco taakuuwo shisamu shimwi shili kufwaafwi amaanshi sheshi shikalaampe mbuli ceeco alimwi mukushika mumakumbi. Taaku cisamu cimwi citililwa kabotu ceshi cikalaampe mbuli cisamu ico. Shoonse shilaakufwa bweenka bufwa bantu, ee, bweenka buya baabo baya kumusena wa bafu.’ ”

¹⁵ Mwaami Lesa Shinkusu shoonse waamba ayi, “Bushiku mbweshi cikaye kumusena wa bafu, ndaakucifwekelesha amaanshi a mutuntupu tulaamfu ayi ncitondesho cakulila. Ndaakushinka tulonga tuyaako akukasha maanshi aanji a ntuto kukunka. Pakuyuma cisamu ico, ndaakubika munshinshe ushiya mbi patulundu twa Lebanoni akulengesha shisamu sha muluundu shoonse kuyuma.

¹⁶ Ndaakulengesha mishobo ya bantu kututuma kumushinga wa ncico bushiku ndaakutuma cisamu ico kumusena wa bafu. Lyalo shisamu shoonse sha muEdeni, shisamu shiindaawo kubota sha muLebanoni, nkokwaamba ayi shisamu shoonse shakalinga kutililwa kabotu isho shakaya kumusena wa bafu shilaakusangalala ceebo ca kuwa kwa ncico.

¹⁷ Abo bakalinga kwikala mucimfule ca ncico, nkokwaamba ayi abo bakalinga kucafwanaaco munkondo pakati ka mishobo, balaakuya a ncico kumusena wa bafu mukusenkana abaabo bakacailwa munkondo.

¹⁸ “Anu ncisamunshi ca mumuunda wa Edeni ceenga ceelanishikwa andiwe kubulemu alimwi ankusu? Nakubi boobo, awebo ulaakubooshekwa kumusena wa bafu pantu pomwi ashisamu sha muEdeni. Ulaakufukilwa pantu pomwi abaabo batapalwitwe abo bakacailwa munkondo. Ici cilaakucitikila Falawo abantu bakwe boonse. Nebo neMwaami Lesa Shinkusu shoonse ndaamba.”