Esekelo 30 - Baibo Busansulushi Bwa Libuku Ili

Lwiimbo lwa buumba pacishi ca Ijipiti

¹ Mpeeke Mwaami Lesa wakaŋambila ayi,

² “Webo omuntu, laluka ubalwiite kwaamba ayi nebo neMwaami Lesa Shinkusu shoonse ndaamba ayi oolobeshe maswi akwaamba ayi, ‘Maawe pabushiku ubo!

³ Bushiku bwashikila, ee, bushiku bwa Mwaami Lesa buli pafwaafwi, mbushiku bwa makumbi amapensho kumishobo yoonse.

⁴ Mulaakuba nkondo mucishi ca Ijipiti amapensho ayoosha mucishi ca Kushi. Bene Ijipiti baakumana kufwa, buboni buliimo bulaakutolwa, acalo cishi coonse cilaakuba matongo.

⁵ “ ‘Bashilumamba ba muKushi, Puti, Lidiya, Alebya oonse, Libya abantu bangu bakaswa kucishi ca cipangano balaakufwita munkondo pantu pomwi abene Ijipiti.’ ”

⁶ Mwaami Lesa waamba ayi, “Boonse abo bacafwana abene Ijipiti munkondo balaakucaikwa ashalo nkusu nshaalisumpwitaawo shilaakumana. Bantu balaakufwa munkondo kuswabo kundabala ya Migidolu kumatwa kuya mukushika kundabala ya Aswani kumalenge. Nebo neMwaami Lesa Shinkusu shoonse ndaamba.

⁷ Cishi cilaakuba musena wiindaawo kubula bantu pashishi sha pacishi ca panshi. Mandabala aliimo alaakuba matongo eene eene.

⁸ Bushiku ndaakukumika mulilo mucishi ca Ijipiti alimwi boonse beshikucitabilila baakumana kucaikwa, bantu balaakwishiba ayi nebo ndi Mwaami Lesa.

⁹ “Bushiku ubo bwaakushikila alimwi cishi ca Ijipiti caakunyonyoolwa, ndaakutuma beshinkombe bangu mumaato kuya mukuloondesha bene Kushi bashiite kwakubula cakulisukama kwiinda mukubalwiita ayi kunyonyooka kwabo kulaakwisa. Bushiku ubo ncakwiila bulaakwisa.

¹⁰ “Nebo neMwaami Lesa Shinkusu shoonse ndaamba ayi, ‘Ndaakusebensesha Nebukadinesa mwaami wa bene Babiloni ayi akamanishe likoto lya bashilumamba bene Ijipiti.

¹¹ Lakwe alikoto lya bashilumamba bakwe, bamumushobo wiindaawo kubula nkumbu pamishobo yoonse, balaakwisa mukunyonyoola cishi. Balaakulwana cishi ca Ijipiti amipeeni yabo akucisusha mituntu.

¹² Ndaakuyumya Mulonga wa Nailo akuulisha cishi kubantu babiibi. Ndaakusebensesha baswamashi kunyonyoola cishi ashoonse shiliimo. Nebo neMwaami Lesa ndaamba.’

¹³ “Nebo neMwaami Lesa Shinkusu shoonse ndaamba ayi, ‘Ndaakunyonyoola shibumbwabumbwa akumanisha shikoshanyo sha mucishi ca Memfisi. MuIjipiti teshi mukabewo tubili mwaami alimwi ndaakuloondesha bamucishi ico coonse.

¹⁴ Ndaakunyonyoola cishi ca Patilosi, ndaakukutenta ndabala ya Sowani. Ndaakupa mulandu ndabala inene ya Tebesi.

¹⁵ Ndaakutila bukali bwangu buyoosha pali Pelusyumu, ndabala icite lilinga mucishi ca Ijipiti. Ndaakunyonyoola bashilumamba boonse bali kuTebesi.

¹⁶ Ndaakutenta cishi ca Ijipiti akushiya Pelusyumu mumapensho anene. Lubumbu lwa Tebesi lulaakumwayuluka Ndabala ya Memfisi ilaakunoolibo mubuumba lyoonse.

¹⁷ Bacikula bwangu basankwa ba muEliopolisi aBubasitasi, balaakucaikwa munkondo. Balo bantu ba mumandabala ayo balaakutolwa mubusha.

¹⁸ MuTapanesi mulaakuboolabo mbi ndaakunyaya nkusu cishi ca Ijipiti, akumanisha nkusu nshebakalinga kulisumpwitaawo. Cilaakufweekeleshekwa amakumbi, abalo bamumishi ya ncico balaakutolwa mubusha.

¹⁹ Anu ubo mbweshi nkape mulandu cishi ca Ijipiti. Lyalo bantu ndyeshi bakeshibe ayi nebo ndi Mwaami Lesa.’ ”

Nkusu sha mwaami wa bene Ijipiti mboshakamanishikwa

²⁰ Mumwaaka walikumi awomwi wa busha bwesu, pabushiku bwasanu ashobilo bwa mweenshi wakutaanguna, Mwaami Lesa wakaŋambila ayi,

²¹ “Webo omuntu, ndatyola lyaansa lyakwe Falawo mwaami wa bene Ijipiti. Talyaangitwe ayi lyooshe nabi kulikobeka mumukopo kwaamba ayi inga lyayuma cakupakata mupeeni alimwi.

²² Paceebo ceeco nebo neMwaami Lesa Shinkusu shoonse ndaamba ayi, ‘Ndaakulwana Falawo mwaami wa bene Ijipiti. Ndaakumutyola maansaakwe oonse, nkokwaamba ayi liyumu alityokete, akulengesha mupeeni kuloka kuswa mumaansaakwe.

²³ Bene Ijipiti, ndaakubapalanganishisha pakati ka mishobo ya mucishi ca panshi coonse.

²⁴ Lyalo ndaakupa nkusu maansa a mwaami wa bene Babiloni akubika mupeeni wangu mumaansaakwe, sombi lakwe Falawo mwaami wa bene Ijipiti ndaakumutyoloola maansa cakwaamba ayi ulaakunootongelabo kunembo lyakwe anga ngumuntu wacisikwa calufu.

²⁵ Ndaakupa nkusu mwaami wa bene Babiloni, sombi Falawo lakwe maansaakwe alaakuba cifwe. Ndaakupa mwaami wa bene Babiloni mupeeni ayi akoosebenseshe mukulwana cishi ca Ijipiti. Lyalo ndyeshi bakeshibe ayi nebo ndi Mwaami Lesa.

²⁶ Ndaakupalanganishisha bene Ijipiti pakati ka mishobo ya mucishi ca panshi coonse. Lyalo ndyeshi bakeshibe ayi nebo ndi Mwaami Lesa.’ ”