Esekelo 3 - Baibo Busansulushi Bwa Libuku Ili

¹ Mpeeke Lesa wakaŋambila ayi, “Webo omuntu, kolya cakulembelaawo ici cili kunembo lyako. Wamanisha ndyeshi uye ukaambe kubene Isilaeli.”

² Aboobo ndakalakama alakwe wakampa cakulembelaawo ayi ndye.

³ Kuswawaawo wakaŋambila ayi, “Webo omuntu, kolya cakulembelaawo ici ncindakupa. Lifumo lyako lisushebo ncico.” Aboobo ndakacilya. Cakulembelaawo ico cakalinga kucite mise anga mbuuci pakucilya.

⁴ Mpomunyaawo wakaŋambila ayi, “Webo omuntu, ono koya kubene Isilaeli ukabaambile maswi angu.

⁵ Nshintookutuma kubantu baamba mulaka uyumu uyo ngooteshi, sobwe. Sombi nkumushobo wa bene Isilaeli.

⁶ Ncakwiila nindakatuma kumishobo ya bantu baamba mulaka uyumu

⁷ Sombi bene Isilaeli balo tabalibambite kukunyumfwila ceebo tabalibambite kunyumfwila anebo. Tabanyumfwili ceebo bene Isilaeli boonse mbayumu myoyo alimwi mbeshicimpamya.

⁸ Sombi awebo ndaakukulengesha kuba shishitaala alimwi utabooli pesule bweenka balo mbobacite myoyo iyumu itanyumfwili.

⁹ Ncakwiila ndaakukulengesha kuyumabo anga ndibwe alimwi akubula boowa. Utaloondi nshebaamba nabi kuloonda mbabo nakubi kwaamba ayi mbaashu.”

¹⁰ Lyalo wakaŋambila ayi, “Webo omuntu, nyumfwisha kabotu akubika maano kumaswi oonse ngweshi nkulwiite.

¹¹ Koya bweenka bulya kubene mishaanu bali mubusha ubalwiitebo maswi angu nebo neMwaami Lesa Shinkusu shoonse, nabi bakanyumfwe nabi batakanyumfwi.”

¹² Mpomunyaawo Mushimu wakwe Lesa wakanyamuna. Lyalo ndakanyumfwa liswi kwisule lyangu ilyo lyakalinga kunyumfwika anga ngumuuwo utoompuupila. Liswi ilyo lyakaamba ayi, “Abulumbaishikwe bulemu bwa Mwaami Lesa mumusena ngweekalaamo!”

¹³ Mpeeke ndakanyumfwa mapapaminwa a shilengwa shuumi shilya kaakwesana acoongo ca mawilo kumbasu sha nshisho. Coongo ico cakakomena abuumbi.

¹⁴ Lyalo Mushimu wakwe Lesa wakanyamuna akuntola. Ndakaya kaandi mubishi alimwi amoyo koocisa. Lyaansa lya nkusu lya Mwaami Lesa lyakalinga pali ndime.

¹⁵ Kuswawaawo ndakaya mukushika kuTelo Abibi kufwaafwi a Mulonga wa Keba uko kwakalinga kwikala basha. Kumusena uko ndakekalakobo nshiku shosanwe ashobilo kaancikankamana pasheesho nshendakabona.

Mwaami Lesa mbwaakasala Esekelo kuba shikulindilila

¹⁶ Ono nshiku shosanwe ashobilo ndishakeenda, liswi lya Mwaami Lesa lyakesa kuli ndime akwaamba ayi,

¹⁷ “Webo omuntu, ndaakubika kuba shikulindilila mushobo wa bene Isilaeli. Paceebo ceeco unoonyumfwa maswi ngweshi nokwaamba, awebo unooya mukubacenjesha kweelana amaswi angu.

¹⁸ Na ndaambila mucita shibi ayi, ‘Ndushinisho webo ulaakufwa,’ ono webo wabula kumucenjesha nabi kumwaambila kwaamba ayi aleke nshila shakwe shibiibi ayi atafwi, muntu uyo ulaakufwa ceebo ca shibiibi shakwe isho. Sombi awebo ulaakupekwa mulandu pabulowa bakwe.

¹⁹ Sombi na wamucenjesha mucita shibi, ono wabula kusanduka kuswa kububi bwakwe nabi kunshila shakwe shibiibi, ulaakufwa ceebo ca shibiibi shakwe, sombi webo ulaakupulusha buumi bwako.

²⁰ “Ono na muntu ululeme waswa mubululami bwakwe akutalika kucita shintu shibiibi, lyalo anebo ndamuletela mfumpu, ncakwiila ulaakufwa. Muntu uyo ulaakufwa ceebo ca shibiibi shakwe mukwiinga webo tookwe kumucenjesha. Shiluleme nshaakacita teshi shikayeeyekweewo tubili, Sombi awebo ulaakupekwa mulandu pabulowa bakwe.

²¹ Na ukacenjeshe muntu ululeme ayi atanoobisha alakwe wabula kubisha, ndushinisho muntu uyo ulaakupulusha buumi bwakwe ceebo cakunyumfwa kucenjeshekwa awebo ulaakupulusha buumi bwako.”

Esekelo mbwaakaba cibuulu

²² Uko nkusu sha Mwaami Lesa shakanselukila. Mpeeke wakaŋambila ayi, “Nyamuka, koya kucinyika uko nkweshi nje mbandike awebo.”

²³ Aboobo ndakanyamuka akuya kucinyika ico. Ono kulya ndakabona bulemu bwa Mwaami Lesa bweenka mbuli mbondakabona kuMulonga wa Keba. Ndindakabubona, ndakafukama cakushisha ciwa panshi.

²⁴ Mpomunyaawo Mushimu wakwe Lesa wakenjila muli ndime akunengesha kwiimikana. Mpeeke wakaŋambila ayi, “Koya ulicalile muŋanda yako.

²⁵ Ono webo omuntu balaakukwaanga antaambo. Ulaakwaangwa cakwaamba ayi utakakonshi kuya ceendeenda pakati ka bantu.

²⁶ Ndaakulengesha mulaka wako kucatilila kwiculu kwaamba ayi ukabule bwakubacenjesha bantu aba nakubi kwaamba ayi ngumushobo waashu.

²⁷ Sombi ndaakubandika andiwe, ndaakukulengesha kukonsha kwaamba alimwi. Lyalo ulaakubalwiita nebo neMwaami Lesa Shinkusu shoonse nsheshi nkaambe. Uyo woonse weshi akanyumfwile, aakanyumfwile. Alakwe uyo weshi akakake, aakakake ceebo aba mbantu baashu.”