Esekelo 29 - Baibo Busansulushi Bwa Libuku Ili

Esekelo mbwaakalaluka mapensho pacishi ca Ijipiti

¹ Mumwaaka walikumi wa busha bwesu, mumweenshi walikumi, pabushiku bwalikumi ashobilo, Mwaami Lesa wakaŋambila ayi,

² “Webo omuntu, langa kuli Falawo mwaami wa cishi ca Ijipiti akulaluka mapensho pali nguwe apabene Ijipiti boonse.

³ Umulwiite ayi nebo neMwaami Lesa Shinkusu shoonse ndaamba ayi, ‘Webo Falawo mwaami wa bene Ijipiti, nebo ntooyanda kukulwana, ee, kulwana ndiwe oshinshimwe ukala mumulonga wako. Ulaamba ayi Mulonga wa Nailo ngwaako alimwi ayi ndiwe wakoopanga omwiine.

⁴ Ono ndaakubika ndobo mumicendwa yako, akulengesha nswi sha mumulonga wako kucatilila kumaamba ako. Ndaakukukwela kuswa muMulonga wa Nailo answi shoonse kashicatilite kumaamba ako.

⁵ Ndaakukuwaala muluyanga akukushiya mumo pantu pomwi answi shoonse sha mumulonga wako. Ulaakufwita muluyanga mweenka umo, ulaakucaalabo cakutabikwa, sobwe. Ndaakukulengesha kuba cakulya ca banyama abayuni.

⁶ Lyalo boonse bekala mucishi ca Ijipiti ndyeshi bakeshibe ayi nebo ndi Mwaami Lesa.’ ” Mwaami Lesa waamba ayi, “Bene Isilaeli bakacinka manungo mubene Ijipiti, sombi ico cakalingabo anga nkushimpila kulitete.

⁷ Ndibakashimpila kuli ndiwe, wakatyoka akubayasoola shifushi shabo akulengesha misana yabo kutunsuka.

⁸ “Paceebo ceeco nebo neMwaami Lesa Shinkusu shoonse ndaamba ayi, ‘Ndaakuleta mupeeni kwisa mukucaya bantu bako ashifubwa shako.

⁹ Cishi ca Ijipiti cilaakunyonyooka akuba luyanga. Lyalo ndyeshi bakeshibe ayi nebo ndi Mwaami Lesa. “ ‘Mukwiinga wakalinga kwaamba ayi Mulonga wa Nailo ngwaako alimwi ayi ndiwe wakoopanga omwiine,

¹⁰ ntookulwana akulwana Mulonga wako wa Nailo alimwi ntoonyonyoola cishi ca Ijipiti akucilengesha kuba luyanga kuswa kundabala inene ya Migidolu kumatwa kuya mukushika kundabala ya Aswani kumalenge kweela nyinsa ya cishi ca Kushi.

¹¹ Taaku muntu nabi munyama weshi akeendemo tubili. Taaku ceshi cikekaaleemo kwamyaaka makumi one.

¹² Ndaakulengesha cishi ca Ijipiti kuba musena wiindaawo kubula bantu pashishi sha pacishi ca panshi. Mandabala aliimo alaakuba matongo eene eene kwamyaaka makumi one. Bene Ijipiti ndaakubapalanganishisha pakati ka mishobo ya mucishi ca panshi coonse.’ ”

¹³ Mwaami Lesa Shinkusu shoonse waamba ayi, “Myaaka makumi one iyo yaakwiinda, ndaakubunganya bene Ijipiti kuswa mumishobo iyo njebakapalanganishilwaamo.

¹⁴ Ndaakubakusha mubusha akubaboosha kucishi ca Patilosi, cishi ca bamashali babo bakulukulu. Uko balaakuya mukuba bulelo butacite nkusu,

¹⁵ ee, butacite nkusu kwiinda malelo amwi oonse. Teshi bakalelewo tubili mushobo umwi uli woonse. Ndaakulengesha bulelo bwabo kubula nkusu cakwaamba ayi teshi bakalisumpulewo tubili pamushobo umwi uli woonse.

¹⁶ Bene Isilaeli teshi bakacinkewo tubili manungo mucishi ca Ijipiti, sombi mapensho a ncico alaakunoobeebalushabo mbocibete cibiibi kusenga lucafwo kuli ncico. Lyalo ndyeshi bakeshibe ayi nebo ndi Mwaami Lesa Shinkusu shoonse.”

Mwaami Nebukadinesa mbweshi akakome cishi ca Ijipiti

¹⁷ Mumwaaka wamakumi obilo amyaaka yosanwe ayobilo wa busha bwesu, pabushiku bwakutaanguna bwa mweenshi wakutaanguna, Mwaami Lesa wakaŋambila ayi,

¹⁸ “Webo omuntu, Nebukadinesa Mwaami wa bene Babiloni wakasebensesha bashilumamba bakwe cankusu kuya mukulwana Taya. Wakabasebensesha kunyamuna mikuli ilemu cakwaamba ayi misusu yabo yakamana pamitwi yabo akupya cakubobela pashifushi shabo. Nakubi boobo mwaami uyo abashilumamba bakwe abo bakalipenshabo, taaku ncebakacana mukulwana ndabala ya Taya.

¹⁹ Paceebo ceeco nebo neMwaami Lesa Shinkusu shoonse ndaamba ayi, ‘Ntokwaaba cishi ca Ijipiti mumaansaakwe Nebukadinesa mwaami wa bene Babiloni. Ulaakusaala akubwesa buboni bwa cishi ca Ijipiti. Buboni ubo alaakubutola ayi akabusebenseshe kuba malipilo a bashilumamba bakwe.

²⁰ Ndamupa cishi ca Ijipiti ayi ngomalipilo akwe pancito njaakancitila ceebo lakwe alikoto lya bashilumamba bakwe bakasebensela ndime. Nebo neMwaami Lesa Shinkusu shoonse ndaamba.

²¹ “ ‘Pabushiku ubo ndaakupa nkusu shiinji mushobo wa bene Isilaeli, awebo Esekelo ndaakukucalula mulomo ayi ukaambe pakati kabo. Lyalo ndyeshi bakeshibe kwaamba ayi nebo ndi Mwaami Lesa.’ ”