Esekelo 28 - Baibo Busansulushi Bwa Libuku Ili

Esekelo mbwaakalaluka mapensho pamwaami wa Taya

¹ Mpeeke Mwaami Lesa wakaŋambila ayi,

² “Webo omuntu, lwiita mwaami wa Taya ayi nebo neMwaami Lesa Shinkusu shoonse ndaamba ayi, ‘Mukulisumpula kwa moyo wako ulaamba ayi, Ndi lesa. Ndekala pacuuna ca bwaami cakwe lesa pakati ka lweenge. Sombi webo uli muntubo, teshi ndiwe lesa, sobwe, nakubi kwaamba ayi ulalibona anga uli musongo mbuli lesa.

³ Sa webo uli musongo kwiinda Danyelo? Sa shabushishi shoonse ulishishi?

⁴ Wakabila ceebo ca busongo alushibo lwako akuba asilifa alimwi agolodi mumaanda ako akusungilaako buboni.

⁵ Ceebo ca lushibo lwako lunene mumakwebo, wakafusha buboni bwako. Lyalo wakatalika kulisumpula ceebo ca buboni ubo.’

⁶ “Paceebo ceeco, nebo neMwaami Lesa Shinkusu shoonse ndaamba ayi, ‘Mukwiinga ulayeeya ayi uli musongo anga ngulesa,

⁷ ndaakukuletela baswamashi, ee, mushobo wiindaawo kubula nkumbu pamishobo yoonse. Balaakwisa mukunyonyoola shintu shako shibotu isho nshewakacana kwiinda mulushibo abusongo bwako. Ncakwiila bulemu bwako balaakubumana.

⁸ Balaakukucaya alimwi ulaakufwa lufu luyoosha mumaanshi alaamfu.

⁹ Sa ulaakunoocaamba ayi uli lesa pameenso abeshikukucaya? Ulaakunooli muntubo, kuteshi lesa mumaansa a baabo beshi bakakucaaye.

¹⁰ Ulaakufwa lufu lwa muntu utana kupalulwa mumaansa a baswamashi abo. Nebo neMwaami Lesa Shinkusu shoonse ndaamba.’ ”

Lwiimbo lwakulila mwaami wa Taya

¹¹ Mpeeke Mwaami Lesa wakaŋambila ayi,

¹² “Webo omuntu, imba lwiimbo lwa buumba pamwaami wa Taya umwaambile ayi nebo neMwaami Lesa Shinkusu shoonse ndaamba ayi, ‘Wakalinga citondesho ca bubotu bwancinencine, kooswite busongo alimwi akuboneka kabotu.

¹³ Wakalinga muEdeni, ee, mumuunda wakwe Lesa. Mabwe amakwebo oonse akalinga kukubotesha. Nkokwaamba ayi mabwe amakwebo eetwa ayi lubi, topasi alimwi aemalodi, kilisolaiti, onekisi alimwi ajasipa, safaya, tekoisi alimwi abelilu. Shakubikaamo mabwe aya shakalinga sha golodi. Pabushiku ndiwakalengwa ashalo ndishakapangwa.

¹⁴ Ndakananika kelebu wakukutabilila. Wakalinga pakalundu kasalalite kakwe Lesa, Webo wakalinga kweenda pakati ka mabwe amakwebo, mabwe abekabeka.

¹⁵ Tewakalinga kucitewo kampenda munshila shako kuswabo bushiku mbowakalengwa, kushikila ndiwakatalika kucita shibiibi.

¹⁶ Kwiinda mumakwebo ako ngowakalinga kucita mucishi coonse, wakaba shilunkutwe alimwi mucita shibi. Paceebo ceeco ndakakutanda kuswa kuKalundu kangu kasalalite. Ncakwiila kelebu wakukutabilila wakakutanda kuswa pakati ka mabwe abekabeka.

¹⁷ Wakaba shikulisumpula ceebo ca bubotu bwako alimwi wakalengesha busongo kumana ncito ceebo ca bulemu bwako. Aboobo ndakakusowela pacishi ca panshi akukulengesha kuba cakucenjesheshaako bamaami bamwi.

¹⁸ Shibiibi shako shiinji amakwebo ataluleme shakalengesha misena yako isalalite kubica. Aboobo ndakakumika mulilo kundabala yako akwiitenta cakubabo milota. Ono boonse beelangilisha bulya, balabona ayi yakacaalabo milota panshi.

¹⁹ Beshimakwebo ba mumishobo imwi batookuseka. Meelelesho ako abica abuumbi, ncakwiila walobela limwi.’ ”

Esekelo mbwaakalaluka pandabala ya Sidoni

²⁰ Mpeeke Mwaami Lesa wakaŋambila ayi,

²¹ “Webo omuntu, langa kundabala ya Sidoni ulaluke mapensho

²² akwiilwiita ayi nebo neMwaami Lesa Shinkusu shoonse ndaamba ayi, ‘Webo Sidoni, ntooyanda kukulwana alimwi ndaakuba abulemu ceebo ca sheesho nsheshi nkakuciite. Ndaakumana kukupa mulandu akulitondesha ayi ndisalalite, bantu balaakwishiba ayi nebo ndi Mwaami Lesa.

²³ Ndaakutuma mwaalu muli ndiwe akulengesha bulowa kukunka mumikwakwa yako. Bantu bako balaakucaikwa muli ndiwe. Inkondo ilaakukupolela kuswa kumbasu shoonse. Lyalo bantu ndyeshi bakeshibe ayi nebo ndi Mwaami Lesa.’ ”

Bene Isilaeli balaakupekwa coolwe

²⁴ Mwaami Lesa waamba ayi, “Bene Isilaeli teshi bakabewo tubili abeshikamukobonyinaabo babapatite bali anga nshisonsoonya shicisa amyuumfwa ikolete. Lyalo ndyeshi bakeshibe ayi nebo ndi Mwaami Lesa Shinkusu shoonse.”

²⁵ Mwaami Lesa Shinkusu shoonse waamba ayi, “Ndaakubunganya bene Isilaeli kuswa mumishobo iyo njendakabapalanganishilaamo. Ndaakulitondesha ayi ndisalalite pakati kabo pameenso a mishobo imwi. Kuswawaawo balaakunookala mucishi cabo ico ncendakapa musebenshi wangu Jakobo.

²⁶ Balaakunookala mucishi ico kwakubula cakulisukama. Balaakuyaka maanda akushanga myuunda ya minyansa. Balaakunookala kwakubula cakulisukama bushiku ndaakupa mulandu beshikamukobonyinaabo boonse balya bakalinga kubacobola. Lyalo ndyeshi bakeshibe ayi nebo ndi Mwaami Lesa, Lesa wabo.”