Esekelo 27 - Baibo Busansulushi Bwa Libuku Ili

Lwiimbo lwa malilo lwa Taya

¹ Mpeeke Mwaami Lesa wakaŋambila ayi,

² “Webo omuntu, imba lwiimbo lwa malilo pacishi ca Taya.

³ Lwiita cishi ici ciyakitwe kweela lweenge ico cicita makwebo abantu baanji bekala muloombe lwa lweenge ayi nebo neMwaami Lesa Shinkusu shoonse ndaamba ayi, ‘Webo Taya, wakalilumbaisha ceebo ca kubota kwako.

⁴ Bweendeleshi bwako bwakalinga palweenge, abalo bayaki bako bakakuboteshabo anga mbwaato bunene bubotu.

⁵ Mapulanga ako oonse akabeswa kushisamu sha mapaini shiswa kuKalundu ka Emoni. Cisamu cakwiimikako nsalu yakweensheshako bwaato cakabeswa kucisamu ca sida kuswa kuLebanoni.

⁶ Bakabesa ntapwisho shako kuswa kushisamu sha mubanga wa kuBashani Shipinda shiilinkene sha mbubo bakashipangisha shisamu sha saipulesi alimwi shakaboteshekwa ameeca a nsofu.

⁷ Insalu shakweensheshako bwaato shakalinga kuteshimite, ee, nsalu iteshimite yakatungwa shakubotesha iyo yakaswa kuIjipiti. Shakalingabo anga nimbembela yako. Shakufweka peculu pabwaato shakalinga sha mushobo wa liculu alimwi shifubelafubela isho shakaswa kuloombe lwa lweenge lwa kuElisha.

⁸ Basankwa ba kuSidoni a kuAfadi mbobakalinga beshikooba. Webo oTaya, bantu bako bacibwene mbobakalinga beshikweensha bwaato.

⁹ Beshikupanga sha mapulanga bako bakalinga bantu bacibwene kuswa kuBibilosi. Bantu abo mbobakalinga kubamba bwaato bwako. Beshikweensha maato boonse bakalinga kwisa kuli ndiwe mukucita makwebo andiwe.

¹⁰ “ ‘Bantu ba kuPesha, Lidiya alimwi aLibya mbobakalinga bashilumamba bako. Bakalinga kwaanjika mayawo ashimpoompo sha nkondo kulubumbu lwako. Bashilumamba abo bakalinga kukuletela bulemu.

¹¹ Bashilumamba ba kuAfati akuEleki mbobakalinga kulindilila lubumbu lwako kumbasu shoonse, bashilumamba ba kuGamadi mbobakalinga mumaanda ako alaamfu. Bantu abo bakalinga kwaanjika mayawo abo kushingulusha lubumbu lwako. Ncakwiila bashilumamba abo bakakulengesha kubota abuumbi.

¹² “ ‘Bene Tashishi bakalinga kucita makwebo andiwe ceebo ca buboni bwako buunji. Bakalinga kuleta silifa, nshimbi, ceela alimwi amuntomfwe mukushintana amakwebo ako.

¹³ “ ‘Wakalinga kucita makwebo abene Gilisi, Tubali abene Mesheki abo bakalinga kuleta basha ashintu shakapangwa kubulonse mukushintana amakwebo ako.

¹⁴ “ ‘Abalo basankwa ba kuBeti Togama bakalinga kuleta maaki akusebensesha, maaki ankondo alimwi ashifubwa shili anga nimbongolo mukushintana amakwebo ako.

¹⁵ “ ‘Basankwa ba kuLodesi bakalinga kucita makwebo andiwe. Bantu ba mushishi shiinji sha kuloombe lwa lweenge bakalinga kuleta meeno a nsofu ashisamu shishiya mbi mukushintana amakwebo ako.

¹⁶ “ ‘Bene Silya bakalinga kucita makwebo andiwe ceebo ca shintu shiinji nshewakalinga kupanga. Bakalinga kuleta mabwe amakwebo eetwa ayi emalodi, shisani shifubelafubela, shisani shakatunga shakubotesha, nsalu shiteshimite, kolali amabwe amakwebo eetwa ayi lubi mukushintana amakwebo ako.

¹⁷ “ ‘Bene Juda abene Isilaeli bakalinga kucita makwebo andiwe. Balo bakalinga kuleta witi kuswa kuMiniti, shinkwa wamise, buuci, mafuta a olifi alimwi atununkila kabotu mubuyani mukushintana amakwebo ako.

¹⁸ “ ‘Bene Damasikasi bakalinga kucita makwebo andiwe ceebo ca shintu shiinji nshewakalinga kupanga abuboni bwako buunji. Bakalinga kuleta waini kuswa kuEloboni abooya bwa mbelele bwa kuSaya mukushintana amakwebo ako.

¹⁹ “ ‘Bene Dani abaGiliki ba kuUsalu bakalinga kucita makwebo andiwe. Bakalinga kuleta sheela, busu bwa kasya, kalamasi mukushintana amakwebo ako.

²⁰ “ ‘Bene Dedani bakalinga kuleta shisani shibikwa munshaacakwikalaawo pamaaki mukushintana amakwebo ako.

²¹ “ ‘Bene Alebya abamaami boonse bene Keda bakalinga kuleta bana ba mbelele, mbelele shisankwa alimwi ampongo mukushintana amakwebo ako.

²² “ ‘Beshimakwebo ba kuSheba aLaama bakalinga kuleta tununkila kabotu mubuyani twiindaawo kubota, mabwe amakwebo alimwi agolodi mukushintana amakwebo ako.

²³ “ ‘Beshimakwebo ba kuAlani, Kane, Edeni, Sheba, Ashuli alimwi aKilumadi boonse bakalinga kucita makwebo andiwe.

²⁴ Bakalinga kukuulisha shakufwala shibotu, shisani shiboneka anga ndiculu, shisani shakatungwa shakubotesha, shisani shakulyatawo sha mibala ipusenepusene, ntambo shiniini ashinene shakooswa kabotu.

²⁵ “ ‘Maato a kuTashishi ngaakalinga kunyamuna makwebo ako. Wakalinga anga mbwaato buli palweenge buswite shintu shilemu.

²⁶ Beshikooba bakakutola kulaale palweenge lulaamfu, sombi muuwo wakwicwe wakakupasoola mutupansha tuniininiini pakati ka lweenge.

²⁷ Bubile bwako amakwebo ako, beshikweensha bwaato bwako boonse, beshimakwebo alimwi abeshikupanga shamapulanga bako boonse, Bashilumamba abantu bamwi boonse bakalinga mubwaato, bakepila pakati ka lweenge bushiku bwaato bwako ndibwakanyonyooka

²⁸ Koolobesha kwa beshikweensha bwaato abo bakalinga kuya bupila, kwakanyumfwika kuloombe lwa lweenge.

²⁹ “ ‘Bwaato bomwi abomwi bwacaala cisuukila. Beshikooba abeshikweesha maato boonse baya mukwiimikana petala lya lweenge.

³⁰ Batookooloma akulila abuumbi pali ndiwe. Batoolitukweeta lusuko pamitwi akwaalabangana mumilota.

³¹ Batookulula mitwi yabo ceebo ca ndiwe akufwala masaka. Batookulilila buumpute ceebo ca kupeenga kwa myoyo yabo alimwi akulila bunene.

³² Batookulilila cakooloma abuumba, batokwiimba lwiimbo lwa buumba ayi, Ngani wakoomunishikwa anga nindabala ya Taya iyo yalobela panshi peene palweenge?

³³ Makwebo ako ndyaakalinga kuya palweenge, wakalengesha mishobo yoonse kuba ashiyandika. Wakabilisha bamaami ba mucishi ca panshi kububoni bwa makwebo ako.

³⁴ Ono bulya wasansoolwa mulweenge, ee, wepiila panshi peene pamaanshi alaamfu. Makwebo ako abantu bako boonse balobela pantu pomwi awebo mulweenge.

³⁵ Boonse bekala muloombe lwa lweenge bakankamana pashakucitikila, Bamaami babo batootutuma mukuloonda, shiwa shababo bumbi bumbi ceebo cakuloonda.

³⁶ Beshimakwebo ba mumishobo imwi batookuseka. Meelelesho ako abica abuumbi, ncakwiila walobela limwi.’ ”