Esekelo 26 - Baibo Busansulushi Bwa Libuku Ili

Esekelo mbwaakalaluka mapensho pabene Taya

¹ Mumwaaka walikumi awomwi wa busha bwesu pabushiku butaanshi bwa mweenshi, Mwaami Lesa wakaŋambila ayi,

² “Webo omuntu, bene Taya bakaseka ndabala ya Jelusalemu mukwaamba ayi, ‘Amubone! Ndabala ya Jelusalemu yamwayoolwa! Nkusu shakucita makwebo shamana! Teshi tukapikishanye akwe tubili.’

³ Paceebo ceeco Mwaami Lesa Shinkusu shoonse waamba ayi, ‘Ndaakukulwana ondabala ya Taya akukuletela mishobo imwi kwisa mukukulwana bweenka bunyamuka maaba a mulweenge.

⁴ Balaakunyonyoola lubumbu lwako akumwayoola maandaako alaamfu. Lyalo ndaakupyanga lusuko lwa shakuyakisha akushiyabo mwaandami weenka.

⁵ Beshikucaya nswi balaakunooyanika toombe twabo pamwaandami uyo kulubasu koobetele mulweenge. Nebo neMwaami Lesa Shinkusu shoonse ndaamba. Mishobo imwi ilaakukusaala

⁶ alimwi akucaya bantu bekala mumishi yako ili kuloombe lwa lweenge kumipeeni. Lyalo ndyeshi bakeshibe ayi nebo ndi Mwaami Lesa.’

⁷ “Nebo neMwaami Lesa Shinkusu shoonse ndaamba ayi, ‘Kuswa kumatwa ndaakuleta Nebukadinesa mwaami wa bene Babiloni, mwaami wiinda bamaami boonse kwisa mukulwana Taya. Ulaakwisa amaaki ashikoci, bashilumamba beshikulwanina pamaaki alimwi alikoto linene lya bashilumamba.

⁸ Ulaakucaya bantu bekala mumishi yako ili kuloombe lwa lweenge kumipeeni. Balaakukaba shilindi akuyaka shitunta shakutantaawo pakulwana. Pakukulwana, balaakunyamuna mayawo abo akulishitilisha kuli ndiwe cakubabo anga ndubumbu.

⁹ Balaakupwaya lubumbu lwako kuminkulwa akumwayoola maanda ako alaamfu kumingwala.

¹⁰ Maaki abo alaakunooli aanji cakwaamba ayi alaakushiya akutukulwita lusuko. Lubumbu lwako lulaakutenkaana kucongo ca maaki ankondo, shikoci sha shintu asha nkondo baakunokwiinda pamwinjililo bweenka bantu mbobenjila mundabala icite lubumbu lupwaikite.

¹¹ Bashilumamba beshikulwanina pamaaki balaakuwuumuka mumikwakwa yoonse akucaya bantu bako kumupeeni. Macinko ako ayumu alaakuwishikwa.

¹² Balaakusaala bubile bwako akutola makwebo ako. Balaakupwaya lubumbu lwako, kuwisha maanda ako abotu akusowa mabwe, mapulanga alusuko lwa shakuyakisha shimwi mulweenge.

¹³ Ndaakumanisha nyimbo shako shoonse alimwi mukumo wa tulumbu twako teshi ukanyumfwikewo tubili.

¹⁴ Ndaakushiyabo mwaandami apo beshikucaya nswi mpweshi bakanooyanikabo toombe twabo. Teshi ukayakululweewo tubili, Nebo neMwaami Lesa Shinkusu shoonse ndime ndaamba.’

¹⁵ “Nebo neMwaami Lesa Shinkusu shoonse ndaambila Taya ayi, ‘Sa bantu bekala kuloombe lwa lweenge teshi bakatutumeewo kumushinga ngweshi ukawiteemo, abo beshi bakacishikwe ndyeshi bakatongele abantu bamwi baakucaikwa muli ndiwe?

¹⁶ Lyalo bamaami bali kuloombe lwa lweenge balaakuswa pashuuna shabo sha bwaami, bakafuule mingaanjo yabo ashakufwala shabo shakatungwa shakubotesha. Balaakwikala panshi kabaloondete alimwi kabatutuma cakutacilekaawo ceebo ca mapensho ako.

¹⁷ Kuswawaawo balaakulila buumba pali ndimwe akwaamba ayi, Ino wanyonyooka buyani ondabala icite mpuwo! Bantu bako bakalinga kweendela mumaato palweenge! Ncakwiila bantu bako mbobakalinga kulela lweenge, alimwi bakalengesha baabo bakalinga muloombe lwa lweenge kuloonda abuumbi.

¹⁸ Bulya bantu ba muloombe lwa lweenge batutuma, ee, batutuma pabushiku bwakuwa kwako. Abalo bantu ba pansumbu mulweenge bakankamana pakunyonyooka kwa mushobo uyo.’

¹⁹ “Nebo neMwaami Lesa Shinkusu shoonse ndaamba ayi, ‘Ndaakukulengesha kuba matongo mulya mutekaliiwo muntu nabi womwi bushiku ndyeshi nkakufwekeleshe amaanshi a mulweenge lunene.

²⁰ Ndaakukutuma kumusena wa bafu kuya mukuba pantu pomwi abaabo bakafwa kalekale. Ndaakukulengesha kuya mukwikala kunshi lya cishi mumatongo akulukulu mukusenkana abafu. Aboobo bantu teshi bakekale tubili muli ndiwe nabi webo kuboola mucishi ca bantu boomi.

²¹ Ndaakukulengesha kuba citondesho ciloondesha alimwi teshi ukabewo tubili. Bantu balaakukulangoola, sombi teshi bakakuboneewo. Nebo neMwaami Lesa Shinkusu shoonse ndaamba.’ ”