Esekelo 25 - Baibo Busansulushi Bwa Libuku Ili

Esekelo mbwaakalaluka mapensho pabene Amoni

¹ Mpeeke Mwaami Lesa wakaŋambila ayi,

² “Webo omuntu, langa kucishi ca bene Amoni ulaluke mapensho.

³ Ubalwiite ayi nebo neMwaami Lesa ntokwaamba ayi, ‘Mwebo mwakasangalala kubona Ŋanda yangu ndiyakabishikwa, cishi ca Isilaeli ndicakanyonyoolwa alimwi abene Juda ndibakatolwa busha.

⁴ Paceebo ceeco ndaakumwaaba kubantu ba kwicwe ayi bamukoome. Balaakuyaka misumba yabo akwiimika matente abo pakati kanu. Balaakulya shisepo shanu alimwi akunwa mukupa wanu.

⁵ Ndaakusandula ndabala yanu ya laba kuba mafulo akweembelelamo ngamela acalo cishi ca Amoni kuba musena wakulaminako mbelele. Lyalo ndyeshi mukeshibe ayi nebo ndi Mwaami Lesa.’

⁶ “Nebo neMwaami Lesa Shinkusu shoonse ndaamba ayi, ‘Mwebo mwakakambilila, mwakasotooka alimwi akusangalala abuumbi pamapensho a cishi ca Isilaeli.

⁷ Ono ceebo cakwaamba ayi mwakacita boobo, anebo ndaakutambika lyaansa lyangu akulengesha ayi mukasaalwe kumishobo imwi. Ndaakumunyonyoola cakumaninina kwaamba ayi teshi mukabewo tubili mushobo nabi kuba acishi caanu. Lyalo ndyeshi mukeshibe ayi nebo ndi Mwaami Lesa.’ ”

Esekelo mbwaakalaluka mapensho pabene Moabu

⁸ Mwaami Lesa Shinkusu shoonse waamba ayi, “Mukwiinga bene Moabu bakaamba ayi, ‘Amubone, mushobo wa bene Juda waba anga njimishobo imwi yoonse,’

⁹ ndaakuleka mandabala afuna nyinsa ya Moabu kulwanikwa, kubikaawo amandabala eendaawo bulemu, nkokwaamba ayi ndabala ya Beti Jeshimoti, Baali Meyoni alimwi aya Kilyataimu.

¹⁰ Ndaakuleka cishi ca Moabu pantu pomwi aca Amoni kukomwa kubantu ba kwicwe, kwaamba ayi bene Moabu batakayeeyekwiwo tubili pakati ka mishobo imwi.

¹¹ Bene Moabu ndaakubapa mulandu. Lyalo ndyeshi bakeshibe ayi nebo ndi Mwaami Lesa.”

Esekelo mbwaakalaluka mapensho pabene Edomu

¹² Mwaami Lesa Shinkusu shoonse waamba ayi, “Bene Edomu bakapilusha cishole kumushobo wa bene Juda akuba a mulandu unene pakucita boobo.

¹³ Paceebo ceeco nebo neMwaami Lesa Shinkusu shoonse ndaamba ayi, ‘Cishi ca Edomu ndaakucipa mulandu akucaya bantu bekalaamo alimwi ashifubwa shabo. Ndaakucilengesha kuba luyanga kutalikila kundabala ya Temani kuya mukushika kundabala ya Dedani akucaya bantu ba mumo kunkondo.

¹⁴ Ndaakuboosha cishole kucishi ca Edomu kwiinda mubantu bangu bene Isilaeli. Balaakucita bene Edomu kweelana abukali bwangu buyoosha. Lyalo bene Edomu balaakwishiba mbocibete kubooshelwa cishole kuli ndime. Nebo neMwaami Lesa Shinkusu shoonse ndaamba.’ ”

Esekelo mbwaakalaluka mapensho pabene Filisiti

¹⁵ Mwaami Lesa Shinkusu shoonse waamba ayi, “Bene Filisiti bakaboosha cishole amyoyo yalunkutwe amfundilishi njebakalinga kucite kumyoyo ayi banyonyoole bene Juda balwani babo bakulukulu.

¹⁶ Paceebo ceeco nebo neMwaami Lesa Shinkusu shoonse ndaamba ayi, ‘Ndaakutambika lyaansa lyangu pabene Filisiti akubanyonyoola. Kuswawaawo ndaakunyonyoola bene Keleti abaabo boonse beshi bakacaale kuloombe lwa lweenge.

¹⁷ Ndaakubabooshesha cishole cinene akubapa mulandu mubukali bwangu buyoosha. Lyalo ndyeshi bakeshibe ayi nebo ndi Mwaami Lesa.’ ”