Esekelo 23 - Baibo Busansulushi Bwa Libuku Ili

Banakashi bamukowa bobilo bamucita shibi

¹ Mpeeke Mwaami Lesa wakaŋambila ayi,

² “Webo omuntu, kwakalinga banakashi bobilo abo bakashalwa kuli nyinawabo womwi.

³ Banakashi abo bakatalika kucita bufuule muIjipiti kabacilibo bamyooye. Mucishi umo mobakalitwa shisungu shabo.

⁴ Munenebantu liina lyakwe wakalinga nguOola, mwanike wakwe wakalinga Ooliba. Ndakabeeba boonse akunshalila baana basankwa abanakashi. Oola wakalinga nguSamaliya, Ooliba wakalinga nguJelusalemu.

⁵ “Ono Oola lakwe wakalinga kucita bufuule kaacili mukaangu mukukumbwa bene Asilya basunikwi bakwe.

⁶ Bantu abo bakalinga bashilumamba abo bakalinga kufwala shakufwala shiboneka anga ndiculu, beendeleshi alimwi abamatanjilili ba bashilumamba. Boonse bakalinga basankwa babotu beshikulwanina pamaaki.

⁷ Wakalinga ngumufuule wa bacinenenene boonse ba bene Asilya. Wakalibisha mukulambila shibumbwabumbwa sha boonse abo mbwaakalinga kukumbwa.

⁸ Mwanakashi uyu taakwe kucileka bufuule ubu mbwaakatalikila muIjipiti basankwa ndibakalinga kukumanaakwe abo bakamulya cisungu akumulengesha kuba mufuule.

⁹ “Paceebo ceeco, anebo ndakamwaaba mumaansa a basunikwi bakwe bene Asilya abo mbwaakalinga kunookumbwa.

¹⁰ Bakamufuula akucaalabo matakosha. Bakatola bana bakwe basankwa abanakashi akumucaya kumupeeni. Wakaba kashimi pakati ka banakashinyina.

¹¹ “Ono nabi Ooliba mwanike wakwe wakalibonena shakacitika kumunene wakwe, nakubi boobo lakwe wakeenda pamukwabo bufuule.

¹² Alakwe wakalinga kukumbwa bene Asilya. Nkokwaamba ayi beendeleshi, bamatanjilili ba bashilumamba, bashilumamba bakalinga kufwala shakufwala shiboneka anga ndiculu alimwi abeshikulwanina pamaaki. Basankwa boonse abo bakalinga bacikula bwangu babotu.

¹³ Ndakabona kwaamba ayi boonse bakalibisha ceebo boonse bobilo bakaya nshila yomwi.

¹⁴ “Lakwe wakatolelela bufuule. Wakabona basankwa bakalinga kutalitwe palubumbu bene Babiloni abo bakalinga kutalitwe mumushobo usalala,

¹⁵ kabafwete amikopo mumakome abo ashisani shakufwala kumitwi shibotu. Boonse bakalinga kuboneka anga mbamatanjilili ba bashilumamba beshikulwanina pamaaki ba kucishi ca Babiloni.

¹⁶ Ndyaakababona wakabakumbwa akutumako beshinkombe kuli mbabo mucishi ca Babiloni.

¹⁷ Mpomunyaawo bene Babiloni bakesa kuli nguwe, bakumanaakwe akumubisha ceebo ca lunkumbwa lwabo. Pesule lya kukumanaakwe akumubisha, wakabashiya kaacimitwe.

¹⁸ Ono ndyaakatolelela kunoocita bufuule bwakwe patuba akutondesha matakoshaakwe, ndakamushiya kaancimitwe bweenka mbondakashiya munene wakwe.

¹⁹ Nakubi boobo wakeendilisha bufuule mukuyeeya nshiku sha bumooye bwakwe ndyaakalinga mufuule muIjipiti.

²⁰ Kwalo uko nkwaakalinga kucite lunkumbwa lwa pabasunikwi bakwe abo bakalinga kucite lunkumbwa lunene anga nimbongolo nabi anga ndiaki lisankwa.

²¹ Wakakumbwa kuboola munshiku ndyaakalinga mufuule cikula bwangu, ciindi basankwa ndibakalinga kumushobashoba nkolo akumulya cisungu.”

Lesa mbwaakoombolosha mwanikebantu

²² “Nebo neMwaami Lesa Shinkusu shoonse ndaamba ayi, ‘Webo Ooliba, ndaakusonkomona basunikwi bako abo mbowakashiya koocimitwe akubaleta ayi bakulwaane kuswa kumbasu shoonse.

²³ Ndaakuleta bene Babiloni, bene Kaludeya boonse, basankwa ba kuPekodi, Showa abene Kowa. Ndaakuleta basankwa babotu bene Asilya, nkokwaamba ayi beendeleshi, bamatanjilili ba bashilumamba, bacinenenene boonse alimwi abamatanjilili ba bashilumamba beshikulwanina pamaaki.

²⁴ Balaakwisa mukukulwana kuswa kumatwa ashikoci sha nkondo, shikocibo alimwi amulongo wa bantu. Balaakwiimikana mumisena yabo ya nkondo kumbasu shoonse kabacite mayawo anene aaniini alimwi ashimpoompo. Ndaakukwaaba mumaansaabo kwaamba ayi bakupe mulandu kweelana amilawo yabo.

²⁵ Ndaakukulwana abukali bwangu buyoosha abalo balaakumutakoosha mubukali bwabo. Balaakumutimbula mashono amatwi anu akucaya baabo beshi bakacaleewo amupeeni. Balaakutola bana banu basankwa abanakashi akutenta baabo beshi bakacaaleewo mumulilo.

²⁶ Balaakumufuula shakufwala akutola shakulibotesha shanu shamakwebo.

²⁷ Munshila iyo ndaakumanisha lunkumbwa lwako abufuule isho nshewakalinga kucita muIjipiti. Teshi ukashikumbweewo tubili shintu ishi, sobwe, nabi kuyeeyawo tubili muIjipiti.’ ”

²⁸ Ono Mwaami Lesa Shinkusu shoonse waamba ayi, “Ntooyanda kukwaaba mumaansa a bantu abo mboopatite, ee, abo mbowakashiya koocimitwe.

²⁹ Balaakubwesa shoonse nshewakasebensela akukushiyabo matakosha anga ngumufuule ceebo balikupatite. Lunkumbwa lwako abufuule

³⁰ nsheshakuletelela. Ncakwiila webo wakakumbwa mishobo imwi akulibisha mukulambila shibumbwabumbwa shabo.

³¹ Wakakonkela nshila yeenka yakeendamo munene wako, aboobo ntookupa nkomeshi ya mulandu yeenka njendakapa nguwe.”

³² Mwaami Lesa Shinkusu shoonse waamba ayi, “Ulaakunwa munkomeshi yeenka ya munene wako. Nkomeshi iyo njinene alimwi njilaamfu. Ilaakukuletela kushibulukwa akusekwa ceebo ilinyamwite shiinji.

³³ Ulaakukolwa akuba abuumba. Nkomeshi iyo iliswite shiloondesha akunyonyooka. Ncakwiila ninkomeshi ya mukwanu mwanakashi Samaliya.

³⁴ Ulaakunwa shiliimo akushimanisha. Lyalo ulaakwiipwayoola mutupanshapansha akunengoola nkolo shako atupanshapansha uto. Nebo neMwaami Lesa Shinkusu shoonse ndaamba.”

³⁵ Mwaami Lesa Shinkusu shoonse waamba ayi, “Ono ceebo ca kundubaako akumfutatila ulaakupenga ceebo ca lunkumbwa abufuule bwako.”

³⁶ Mpeeke Mwaami Lesa wakandwiita ayi, “Webo omuntu, sa te ulilibambite kupa mulandu Oola alimwi aOoliba? Na ulilibambite, ubashinine shintu shilensha bunya isho nshebakacita.

³⁷ Bakacita bufuule abucayi. Bakacita bufuule mukulambila shibumbwabumbwa shabo abucayi mukubenga baana mbobakanshalila kushibumbwabumbwa ayi babe cakulya ca nshisho.

³⁸ Tabakwe kucitabo sheenka ishi, sobwe. Paciindi ceenka ico bakabisha amusena wangu usalalite akutyola bushiku bwangu bwakookesha bwa Cibelu.

³⁹ Bushiku bweenka ubo mbobakabenga bana babo ayi ngumulambu kushibumbwabumbwa, bakesa kuŊanda yangu akwiibisha.

⁴⁰ “Bakalinga kutuma beshinkombe kuya mukwiita basankwa baswa kulaamfu. Ono na besa banakashi abo bakalinga kubasambila, banana shakunanika kunkoye shabo akufwala shakulibotesha.

⁴¹ Mpeeke bakalinga kwikala pacuuna cibotu, kunembo kakuli tebulu apo mpobakalinga kubika tununkila kabotu amafuta isho shakapekwa kuli ndime.

⁴² Lyalo kwakalinga kunyumfwika coongo ca likoto lya bantu batacite cakulisukama nabi comwi, bacakolwa, abo bakalinga kwiitwa kuswa muluyanga pantu pomwi abasankwa bamwi. Basankwa abo bakalinga kufwalika banakashi abo makosa kumaansa amishini ibotu kumitwi.

⁴³ Nebo ndakalyaamboosha ayi, ‘Banakashi aba bamana ncito kubufuule, nakubi boobo basankwa baciciteekobo kubaminina mate.’

⁴⁴ Ncakwiila basankwa bakalinga kuboola lyobilo lyobilo kubanakashi abo, nkokwaamba ayi kuli Oola aOoliba banakashi bafuule.

⁴⁵ Sombi basankwa baluleme balaakubapa mulandu wa bulale alimwi akutila bulowa mukwiinga balacita bulale akutila bulowa.”

⁴⁶ Ono Mwaami Lesa Shinkusu shoonse waamba ayi “Amulete likoto lya bashilumamba ayi bese babalwaane akubalengesha kuloonda akusaalwa.

⁴⁷ Likoto ilyo lilaakubafusa mabwe akubacaya amipeeni. Lilaakucaya bana babo basankwa abanakashi akubatentela maandaabo.

⁴⁸ “Lyalo ndaakumanisha bufuule mucishi munshila iyo. Banakashi boonse balaakucenjelelaawo cakutakonkelawo tubili micito yabo.

⁴⁹ Banakashi abo ndaakubapa mulandu ceebo ca bufuule bwabo alimwi akulambila shibumbwabumbwa kwabo. Lyalo ndyeshi mukeshibe ayi nebo ndi Mwaami Lesa.”