Esekelo 22 - Baibo Busansulushi Bwa Libuku Ili

Shibiibi sha bene Jelusalemu

¹ Mpeeke Mwaami Lesa wakaŋambila ayi,

² “Webo omuntu, sa te ulilibambite kupa mulandu bamundabala iyo iswitebo bacayi? Na ulilibambite, beebalushe shintu shilensha bunya isho nshebakalinga kucita.

³ Ulwiite ndabala ya Jelusalemu ayi nebo neMwaami Lesa Shinkusu shoonse ndaamba ayi, ‘Webo ondabala nooliletela mapensho omwiine ceebo cakutila bulowa pakati ka bantu bako akulibisha mukupanga shibumbwabumbwa.

⁴ Ulicite mulandu ceebo ca bulowa mbowakatila alimwi akulibisha kushibumbwabumbwa nshewakapanga. Walilengesha nshiku shako kushika kumamanino. Ciindi canu camana. Paceebo ceeco, ndaakumulengesha kuba cintu ceelete kushibulukwa alimwi akuba cintu ceelete kusekwa kushishi shoonse.

⁵ Abo mbooshiitaabo pafwaafwi alimwi abekala kulaamfu balaakunookuseka, webo ondabala ipukite iswitebo shintu shipilingene.

⁶ “ ‘Mutanjilili womwi awomwi wa bene Isilaeli uli muli ndiwe ulasebensesha nkusu shakwe kutila bulowa.

⁷ Muli ndiwe taamu nabi womwi uyo ulemeka baishi nabi banyina. Muli ndiwe bantu balacenjeeka baswamashi akupensha bana banshiwa alimwi abamukalubinje.

⁸ Wakanyansha misena yangu isalalite akubisha bushiku bwangu bwakookesha bwa Cibelu.

⁹ Muli ndiwe muli bantu babeca kwaamba ayi bulowa bwa babyaabo butilwe. Muli bantu balya milambu yakabengwa kushibumbwabumbwa. Bamwi balacita bufuule mukumana shiyanda mibili yabo.

¹⁰ Bamwi balakumana abamuka bamashali babo, abalo bamwi balakakatisha banakashi ayi bakumanaabo muciindi cabo cakukubala kakuli tabasalalite kweelana aMilawo.

¹¹ Muli ndiwe muli bantu bamwi bacita shintu shilensha bunya abamukashikamukobonyinaabo, bamwi balacita cintu cilensha nsoni cakukumana abamalokashi babo, abalo bamwi balakumana abamanankashi shabo abo mbobapusenebo kubamanyinawabo, sombi ishiwabo ngomwibo.

¹² Muli ndiwe bamwi bantu balatambula makulo kwaamba ayi bacaye bantunyinaabo. Bamwi balasesa cinyona mucila pankongole nshebapa bene Isilaelinyinaabo. Bamwi balacana mpindu akubila ceebo cakucenjeeka babyaabo. Ncakwiila bantu abo banduba nebo neLesa. Nebo neMwaami Lesa Shinkusu shoonse ndaamba.

¹³ “ ‘Ndushinisho ndaakukamba mapaka angu ceebo ca bukali pabuboni ubo mbowakabilila munshila italuleme alimwi apabulowa mbowakatila bwa babyo.

¹⁴ Sa ulaakunoocicite nkusu nabi kuba ankusu shakusebensesha maansaako bushiku mbweshi nkakulwaane? Nebo neMwaami Lesa ndaamba alimwi ndaakucicita.

¹⁵ Ndaakutandila bantu bako pakati ka mishobo ya mucishi ca panshi coonse alimwi akumanisha micito yanu yoonse ishipite.

¹⁶ Mwaakutongoolwa kunembo lya mishobo imwi, ndyeshi mukeshibe ayi nebo ndime Mwaami Lesa.’ ”

Munyumbi wakwe Lesa wakubotesha

¹⁷ Mpeeke Mwaami Lesa wakaŋambila ayi,

¹⁸ “Webo omuntu, bene Isilaeli tabacite ncito kuli ndime. Boonse balibo anga ngumukuba, ceela, nshimbi amuntomfwe isho shicaala mumunyumbi pakubotesha silifa.

¹⁹ Paceebo ceeco nebo neMwaami Lesa Shinkusu shoonse ndaamba ayi, ‘Ono ceebo cakwaamba ayi noonse mwaba anga ngamatombe acaala mumunyumbi, ndaakumubunganishisha muJelusalemu.

²⁰ Bweenka bantu mbobabunganya silifa, mukuba, nshimbi, muntomfwe aceela akushibika mumunyumbi akushisungulula amulilo ukali, mbweeke ubo mubukali bwangu abukali buyoosha mbweshi nkamubunganye mundabala akumusungulula.

²¹ Ncakwiila ndaakumubunganya muJelusalemu akumufulitila aceeselela ca bukali bwangu buyoosha akumusungulula.

²² Bweenka silifa mboosungululwa mumunyumbi, mbweeke ubo mbweshi mukasungululwe mundabala ya Jelusalemu. Lyalo mulaakwishiba ayi nebo neMwaami Lesa ndime ndatila bukali bwangu pali ndimwe.’ ”

Shibiibi sha bamatanjilili ba bene Isilaeli

²³ Mpeeke Mwaami Lesa wakaŋambila alimwi ayi,

²⁴ “Webo omuntu, ambila Isilaeli ayi, ‘Webo uli cishi citakwe kulokelwaawo mfula ceebo ntoocipa mulandu mubukali bwangu buyoosha.

²⁵ Muli ndiwe muli bamatanjilili abo batoopinga kucaya babyaabo anga ninkalamu itoobuluma pakukwaamoona munyama ngoyacata. Balanyonyoola bantu, kubwesa buboni ashintu shibotu alimwi akulengesha banakashi baanji kucaala bumukalubinje.

²⁶ Bapailishi balapwaya milawo yangu akutalemeka shintu shangu shisalalite. Tabacishi kupansaanya shintu shisalalite ashitasalalite pakulambila. Balo baleeisha ayi taapu bupusano pakati ka shintu shisalalite kweelana aMilawo ashitasalalite. Tabalami abushiku bomwi abomwi bwakookesha bwa Cibelu. Paceebo ceeco bene Isilaeli tabandemeki.

²⁷ Abalo bacinenenene bali muli ncico bali anga mbaumpe batookwamoona munyama ngobacata. Balatila bulowa mukucaya bantu ayi babile.

²⁸ Balaluki abalo balashisa shibiibi ishi anga ngumuntu utooshingula lubumbu abulongo butuba. Balabona shili anga nshiloto shabubeshi alimwi ashisondo shakubeca akwaambila bantu. Balaamba ayi batokwaamba maswi aMwaami Lesa Shinkusu shoonse, sombi nebo neMwaami Lesa kaantana kwaambaabo.

²⁹ Bantu ba mucishi balacenjeeka babyaabo alimwi akwiipa, balalyatilila bakandu abataaku mbobabete. Balapensha beensu akubanyengelela.

³⁰ “ ‘Mpeeke ndakayandoola muntu pakati kabo uyo weenga wayaka lubumbu akwiimikana kunembo lyangu mumusena apo lubumbu mpolwakamwayuluka ayi afune cishi kwaamba ayi ntakacinyonyooli. Sombi ndakacana kwaamba ayi taakuuwo nabi womwi.

³¹ Paceebo ceeco ndaakubatila bukali bwangu buyoosha akubanyonyoola kuceeselela ca bukali bwangu ceebo ca sheesho nshebakacita beene beenka. Nebo neMwaami Lesa Shinkusu shoonse ndaamba.’ ”