Esekelo 21 - Baibo Busansulushi Bwa Libuku Ili

Mupeeni wa Mwaami Lesa

¹ Mpeeke Mwaami Lesa wakaŋambila ayi,

² “Webo omuntu, langa kuJelusalemu akushimika cakukalalila musena usalalalite. Laluka mapensho pacishi ca Isilaeli

³ akucilwiita ayi nebo neMwaami Lesa ndaamba ayi, ‘Ntooyanda kumulwana. Ntookusha mupeeni wangu kuswa mucipokolo mookala ayi ncaisheko bantu bako boonse baluleme abamucita shibi.

⁴ Ncakwiila ndaakukusha mupeeni wangu mucipokolo akucaya bantu bako boonse kumalenge kuya mukushika kumatwa ceebo ntooyanda kunyonyoola baluleme abamucita shibi.

⁵ Bantu boonse balaakwishiba ayi anu nebo neMwaami Lesa ndime ndakusha mupeeni wangu mucipokolo ca nguwo alimwi teshi ukabooleleemo, sobwe.’

⁶ “Paceebo ceeco, webo omuntu tongela! Utongele kunembo lyabo amoyo utyongookite alimwi ucite buumba bunene.

⁷ Ono na bakwiipushe ayi, ‘Utootongelanshi?’ Ubakumbule ayi, ‘Ntootongela ceebo ca makani ayo eshi akese. Myoyo yabo boonse ilaakuswa kuboowa, maansaabo alaakubabo lempwete, balaakutyongola amumanungo abo moonse mulaakuboolabo tontolo.’ Makani ayo alaakucitika cancinencine. Nebo neMwaami Lesa Shinkusu shoonse ndaamba.”

⁸ Mpeeke Mwaami Lesa wakaŋambila ayi,

⁹ “Webo omuntu, laluka ubalwiite nshentokwaamba nebo neMwaami Lesa. Waambe ayi, ‘Mupeeni, mupeeni, ukolete alimwi wakafulwa.

¹⁰ Ulinonetwe kwaamba ayi ucaye, ulifulitwe kwaamba ayi unoobekabeka anga nkubeka kwa mfula. Takukoonshi kuba kusangalala mucishi ceebo bantu bangu basuula kucenjesha kwangu koonse.

¹¹ Mupeeni wafulwa kwaamba ayi unoolindilabo kusebenseshekwa. Wanonwa akufulwa kwaamba ayi upekwe mumaansa a shikucaya.

¹² Ono ulile cakooloma, webo omuntu, ceebo mupeeni uyo utoosita bantu bangu abamatanjilili boonse ba bene Isilaeli. Lyuume pacaamba ceebo ca buumba!

¹³ “ ‘Ono ntokweelesha bantu bangu na batasanduki kuswa kushibiibi shabo shoonse ishi shilaakucitika kuli mbabo.’

¹⁴ “Aboobo webo omuntu, laluka. Kamba mapakaako kubuumba. Mupeeni uyase mankanda obilo, nabibo otatwe. Ngumupeeni wakucaishaako alimwi ulaakubashinkila kumbasu shoonse.

¹⁵ Ulaakucita boobo kwaamba ayi myoyo ya bantu ityongole akulengesha baanji kuwa. Ndateya mupeeni uyo kuminjililo yabo yoonse kwaamba ayi ucaye. Ncakwiila wakapangilwa kubekabeka, ee, wakacatilwa kucaya.

¹⁶ Webo omupeeni timboola kulubasu lwalulyo, timboola kulubasu lwakucipiko, ee, utimboole kuli koonse nkweshi usandulukile.

¹⁷ Anebo ntookamba mapaka angu, lyalo bukali bwangu buyoosha butoomana. Nebo neMwaami Lesa ndaamba.”

Mupeeni wa mwaami wa bene Babiloni

¹⁸ Mpeeke Mwaami Lesa wakaŋambila ayi,

¹⁹ “Webo omuntu, bika shitondesho pamikwakwa yobilo umo mweshi mukeende mupeeni wa mwaami wa bene Babiloni. Mikwakwa yoonse ikanooswa mucishi comwi. Ubike cishibilo papansaanina mikwakwa kuya mundabala inene.

²⁰ Ubike citondesho mukwakwa womwi kwaamba ayi mupeeni ukaye mukulwana bene Amoli ba kuLaba, acitondesho muumwi kwaamba ayi mupeeni ukaye mukulwana cishi ca Juda alimwi andabala inene ya Jelusalemu iyo icite lilinga.

²¹ Ceebo mwaami wa bene Babiloni ulaakwiimikana papansaanina mikwakwa apo akuuma cisolo kwaamba ayi eshibe mukwakwa ngweshi atole. Ulaakusebensesha mifwi kuuma cisolo ico, ulaakwiipusha shibumbwabumbwa akulangalanga kulini lya mulambu wakabengwa kuli nshisho.

²² Ono cisolo cilaakuwita kumufwi wa kululyo uyo weshi ukanokwiimikanina ndabala ya Jelusalemu. Mwaami wa bene Babiloni ulaakuya kundabala iyo akuya mukutula minkulwa yakupwaishako lubumbu, kuya mukucitilako ciyobeyobe ca nkondo, kuya mukuyaamika minkulwa yakupwaishaako kuminjililo ya njiyo, kuyakako shitunta shakutantaawo pakulwana alimwi akukabako shilindi sha nkondo.

²³ Cilaakuboneka anga cisolo ici ncabubeshi kubantu ba muJelusalemu ceebo ca cipangano ncebakapanga amwaami uyo, sombi lakwe ulaakulengesha kwiibaluka shibiibi shabo akubatola busha.

²⁴ “Paceebo ceeco, nebo neMwaami Lesa Shinkusu shoonse ndaamba ayi, ‘Shibiibi shayubuluka. Ncakwiila womwi awomwi ulishi mulandu ngomucite. Mulatondesha shibiibi shanu mumicito yanu yoonse. Ndushinisho mwebo mulicite mulandu alimwi ndaakumwaaba mumaansa a balwani banu.

²⁵ “ ‘Awebo omuleli wa bene Isilaeli mucita shibi alimwi utasalalite, bushiku bwako bwashikila, ciindi cako cakupekwa mulandu wakweelaako cilibo muliimfwa.

²⁶ Nebo neMwaami Lesa Shinkusu shoonse ndaamba. Ono fuula cisani cako cakufwala kumutwi, ukusheko amushini. Shintu teshi shikabe mbuli mboshibete sunu. Bantu balibombya mbweshi bakasumpulwe, abalo balisumpula mbweshi bakatolwe panshi.

²⁷ Matongo! Matongo! Ee, ndaakulengesha ndabala inene kuba matongo. Ici teshi cikacitike kushikila uyo ngondakasala akese mukupa ndabala iyi mulandu. Lyalo ndaakwiipa kuli nguwe.’

Mupeeni alimwi abene Amoni

²⁸ “Ono webo omuntu, laluka akwaambila bene Amoni isho nebo neMwaami Lesa Shinkusu shoonse nshentokwaamba. Nebo ntokwaamba ayi, ‘Mupeeni, mupeeni, wasomwetwa kucaya, wafulwa ayi unyonyoole akubekabeka anga nkubeka kwa mfula!

²⁹ Nakubi kwaamba ayi kuli shili anga nshiloto shabubeshi shimukumite ashisondo shabubeshi shapali ndimwe, mupeeni ulaakumana kwiinda bamucita shibi panshingo abo beshi bakacaikwe. Bushiku bwabo bwashikila, ciindi cabo cakupekwa mulandu wakweelaako cilibo muliimfwa.

³⁰ “ ‘Boosha mupeeni mucipokolo ca nguwo. Mwebo ndaakukupa mulandu kumusena kweenka uko nkomwakashalilwa, mucishi ca bamashali banu bakulukulu.

³¹ Ndaakumupoomweta bukali bwangu buyoosha akumukalalila cabukali. Ndaakumwaaba kubantu beshilunkutwe abo beshi kabotu bwakunyonyoola.

³² Mulaakuba nkuni shakukunkisha mulilo. Bulowa bwanu bulaakutilwa mucishi canu alimwi teshi mukayeeyekwewo tubili. Nebo neMwaami Lesa ndaamba.’ ”