Esekelo 20 - Baibo Busansulushi Bwa Libuku Ili

Kuyanda kwa Mwaami Lesa abwaashu bwa bantu

¹ Pabushiku bwalikumi bwa mweenshi wasanu wa mwaaka wasanu ayobilo wa busha bwesu, bamaloba ba bene Isilaeli bamwi bakesa kuli ndime ayi banjipushe kuyanda kwa Mwaami Lesa. Mpeeke bakekala kunembo lyangu.

² Mpeeke Mwaami Lesa wakaŋambila ayi,

³ “Webo omuntu, lwiita bamaloba bene Isilaeli aba ayi nebo neMwaami Lesa Shinkusu shoonse waamba ayi, ‘Sa mwesa mukwiipusha kuyanda kwangu kuli ndime? Kweelana ambocibete lushinisho ayi ndi muumi, teshi musuminisheewo kunjipusha nabi comwi. Nebo neMwaami Lesa Shinkusu shoonse ndaamba.’

⁴ “Webo omuntu, sa te ulilibambite kubapa mulandu? Na ulilibambite, beebalushe shintu shilensha bunya isho shakalinga kucita bamashali babo bakulukulu.

⁵ Ubaambile ayi nebo neMwaami Lesa Shinkusu shoonse ndaamba ayi, ‘Bushiku mbondakasala bene Isilaeli, ndakashomesha cakulumbila alyaansa litambikitwe mwiculu kubamulunyungu lwakwe Jakobo akuliyubulula kuli mbabo muIjipiti. Kaantambikite lyaansa mwiculu, ndakabaambila ayi, ndi Mwaami Lesa, Lesa wanu.

⁶ Pabushiku ubo ndakashomesha cakulumbila kuli mbabo ayi ndaakubakusha mucishi ca Ijipiti akubatola kucishi ico ncendakabasalila, cishi umo muli bubile abulongo bubotu ico ciinda cishi cimwi cili coonse kubota.

⁷ Kuswawaawo ndakabalwiita kusowa shibumbwabumbwa shabo shilensha nsoni isho nshebakalinga kusuni. Ndakabakasha kulilengesha kutanoosalalite mukulambila balesa babubeshi ba bene Ijipiti ceebo ndime Mwaami Lesa, Lesa wabo.

⁸ “ ‘Sombi balo bakangashukila akukaka kunyumfwila. Tabakwe kusowa shibumbwabumbwa shilensha bunya isho nshebakalinga kusuni nabi kusuula balesa ba bene Ijipiti. Aboobo ndakalinga kulibambite kubalengesha kunyumfwa cilemeneshi ca bukali bwangu muIjipiti.

⁹ Sombi nshikwe kucita boobo ceebo ico necakalengesha liina lyangu kumana bulemu mukwiinga pameenso a baswamashi abo mbobakalinga kwikalaabo, ndakabashomesha bene Isilaeli ayi ndaakubakusha muIjipiti.

¹⁰ Paceebo ceeco ndakabakusha muIjipiti akubatola muluyanga.

¹¹ Ndakabapa milasho yangu akubeeisha milawo yangu iyo ipa buumi kumuntu uyo wiinyumfwila.

¹² Ndakabapa abushiku bwakookesha bwa Cibelu ayi bube keshibilo pakati kesu kwaamba ayi beshibe ayi nebo neMwaami Lesa ndime ndakabasalasha.

¹³ “ ‘Nakubi boobo bene Isilaeli bakangashukila muluyanga. Tabakwe kukonkela milasho yangu akukaka milawo yangu iyo ipa buumi kumuntu uyo wiinyumfwila. Bakabisha bushiku bomwi abomwi bwakookesha bwa Cibelu. Aboobo ndakalinga kulibambite kubalengesha kunyumfwa cilemeneshi ca bukali bwangu muluyanga.

¹⁴ Sombi nshikwe kucita boobo ceebo ico nicakalengesha liina lyangu kumana bulemu mukwiinga pameenso a baswamashi ndakakusha bene Isilaeli muIjipiti.

¹⁵ Ndakashomesha cakulumbila kuli mbabo kaantambikite lyaansa mwiculu kabali muluyanga kwaamba ayi teshi nkabatole mucishi ico ncendakabashomesha. Nkokwaamba ayi cishi umo muli bubile abulongo bubotu ico ciinda cishi cimwi cili coonse kubota.

¹⁶ Ndakacita boobo ceebo bakaka milawo yangu, tabakwe kukonkela milasho yangu, bakabisha bushiku bwangu bomwi abomwi bwakookesha bwa Cibelu mukwiinga bakabika myoyo yabo kushibumbwabumbwa shabo.

¹⁷ “ ‘Nakubi boobo ndakabafwita nkumbu, nshikwe kubanyonyoola nabi kubalobya muluyanga.

¹⁸ Lyalo ndakaambila bana babo muluyanga ayi, Mutanookonkela milasho ya bamashali banu bakulukulu nabi kulama milawo yabo nabi kulibisha nobeene mukulambila shibumbwabumbwa shabo.

¹⁹ Nebo ndime Mwaami Lesa, Lesa wanu, amukonkele milasho yangu alimwi akubona kwaamba ayi mutoolama kabotu milawo yangu.

²⁰ Amulame bushiku bwangu bomwi abomwi bwakookesha bwa Cibelu ayi mbushiku busalalite kwaamba ayi bube keshibilo pakati kesu. Lyalo ndyeshi mukeshibe ayi nebo ndime Mwaami Lesa, Lesa wanu.

²¹ “ ‘Nakubi boobo lishalane ilyo alyalo lyakangashukila. Tabakwe kukonkela milasho yangu akukaka milawo yangu iyo ipa buumi kumuntu uyo wiinyumfwila. Bakabisha bushiku bomwi abomwi bwakookesha bwa Cibelu. Aboobo ndakalinga kulibambite kubalengesha kunyumfwa cilemeneshi ca bukali bwangu muluyanga.

²² Sombi nshikwe kucita boobo ceebo ico necakalengesha liina lyangu kumana bulemu mukwiinga pameenso a baswamashi ndakakusha bene Isilaeli muIjipiti.

²³ Paceebo ceeco, ndakashomesha cakulumbila alimwi kuli mbabo kaantambikite lyaansa mwiculu kabali muluyanga kwaamba ayi ndaakubatandila pakati ka mishobo ya mucishi ca panshi coonse.

²⁴ Ndakacita boobo ceebo bakaka milawo yangu, tabakwe kukonkela milasho yangu, bakabisha bushiku bwangu bomwi abomwi bwakookesha bwa Cibelu akubika maano kushibumbwabumbwa isho bamashali babo bakulukulu nshebakalinga kulambila.

²⁵ “ ‘Kuswawaawo ndakabapa milasho ibiibi amilawo italeteli buumi.

²⁶ Ndakabaleka ayi balibiishe kwiinda mumilambu yabo, bunene bunene pakubenga bana babo bakwiiya ayi njimilambu. Ndakacita boobo kwaamba ayi bakaloonde akwishiba ayi nebo ndi Mwaami Lesa.’

²⁷ “Paceebo ceeco, webo omuntu lwiita bene Isilaeli ayi nebo neMwaami Lesa Shinkusu shoonse ndaamba ayi, ‘Munshila njemunya iyi bamashali banu bakulukulu bakancobola kwiinda mukutashomeka kwabo.

²⁸ Ndakabashisha mucishi ico ncendakashomesha cakulumbila ayi ndaakubapa. Ono ndibakabona tulundu tulaamfu ashisamu shicite matewu aanji, bakatalika kubenga milambu, kupa shipo isho shakasonkomona bukali bwangu, kupa tununkila kabotu akutila shipo sha cakunwa patulundu toonse ashisamu shoonse.’

²⁹ Mpeeke ndakabeepusha ayi, ‘Ino misena yakulambililaako ya patulundu iyo njemuyaako, nshiinshi?’ Kuswawaawo misena iyo ileetwa ayi, ‘Misena yakulambililaako ya patulundu.’

³⁰ “Ono lwiita bene Isilaeli ayi nebo neMwaami Lesa Shinkusu shoonse ndaamba ayi, ‘Sa amwebo mutooyanda kulibisha anga mbamashali banu bakulukulu akubika myoyo yanu kushibumbwabumbwa shabo shilensha nsoni?

³¹ Ono abobulya mucipa shipo nshemunya akulibisha nobeene kushibumbwabumbwa nshemunya mukubenga bana banu kuli nshisho mumulilo. Ino sa inga ndamusuminisha ayi mwise mukunjipusha kuyanda kwangu mwebo nobene Isilaeli? Kweelana ambocibete lushinisho ayi ndi muumi, teshi musuminisheewo kunjipusha nabi comwi. Nebo neMwaami Lesa Shinkusu shoonse ndaamba.

³² Mwebo nobeene mulisuni kuba mbuli mishobo imwi, ee, mbuli bantu ba mushishi shimwi abo balambila shisamu amabwe. Sombi miyeeyo yanu iyo teshi ikacitikewo, sobwe.’

Lesa ulapa mulandu akulekelela

³³ “Nebo neMwaami Lesa Shinkusu shoonse ndaamba ayi, ‘Kweelana ambocibete lushinisho ayi ndi muumi, ndaakumulela alyaansa lyangu lyankusu, lyaansa litambikitwe alimwi abukali buyoosha.

³⁴ Ndaakumuboosha kuswa kumishobo imwi alimwi amushishi umo momwakapalanganina alyaansa lyangu lyankusu, lyaansa litambitwe alimwi abukali buyoosha.

³⁵ Kuswawaawo ndaakumuleta muluyanga lwa mishobo imwi uko nkweshi nkamupe mulandu katulangene.

³⁶ Bweenka mbuli mbondakapa mulandu bamashali banu bakulukulu muluyanga lwa mucishi ca Ijipiti, mbweeke ubo amwebo mbweshi nkamupe mulandu. Nebo neMwaami Lesa ndaamba.

³⁷ “ ‘Ndaakumubelenga ankooli ya mweembeshi akumulengesha ayi mulame cipangano cangu.

³⁸ Abo boonse baashu batanyumfwili ndaakubakusha pakati kanu. Nakubi kwaamba ayi ndaakubakusha mucishi mobekala, sombi teshi bakenjileemo mucishi ca Isilaeli. Lyalo ndyeshi mukeshibe ayi ndi Mwaami Lesa.’

³⁹ “Nebo neMwaami Lesa Shinkusu shoonse ndaamba ayi, ‘Mwebo nobene Isilaeli noonse, kamuya mukasebensele shibumbwabumbwa shanu! Sombi pesule mulaakunyumfwila alimwi teshi mukacobolewo tubili liina lyangu lisalalite mukupa shipo kushibumbwabumbwa shanu.

⁴⁰ Mucishi ico, pakalundu kangu kasalalite, ee, kalundu kalaamfu ka Isilaeli, mwebo nobene Isilaeli noonse mulaakunambila. Uko ndaakusangalala pali ndimwe alimwi uko mulaakunooyandika kuleta shipo shimwi, shipo shanu shipuseneeko alimwi amilambu yanu isalalite.

⁴¹ Ono pesule lya kumukusha mushishi umo momwakapalanganishilwa akumubunganya pomwi, ndaakusangalala muli ndimwe bweenka mboonsangalala patununkila kabotu uto ntoomuntentela. Lyalo ndyeshi nkalitondeshe ayi ndisalalite pameenso a mishobo imwi yoonse.

⁴² Mulaakwishiba ayi anu ndi Mwaami Lesa na nkamubooshe mucishi ca Isilaeli, cishi ico ncendakashomesha cakulumbila kaantambikite lyaansa mwiculu ayi ndaakucipa bamashali banu bakulukulu.

⁴³ Mpeeke mulaakuyeeya bwikaalo bwanu amicito iyo njemwakalibishishaamo akunyumfwa bunya ceebo ca bubi boonse ubo mbomwakacita.

⁴⁴ Mulaakwishiba ayi anu ndi Mwaami Lesa ciindi ndaakumucitila shintu ceebo ca liina lyangu kuteshi kweelana anshila shanu shibiibi alimwi amicito yanu ibiibi, mwebo nobene Isilaeli. Nebo neMwaami Lesa Shinkusu shoonse ndaamba.’ ”

Mulilo weshi ukanyake kumalenge

⁴⁵ Mpeeke Mwaami Lesa wakaŋambila ayi,

⁴⁶ “Webo omuntu, langa kumalenge. Shimikila cakukalalila cishi ca kumalenge akulaluka mapensho kumisaansa ya nkuko.

⁴⁷ Lwiita misaansa ya kumalenge ayi nebo neMwaami Lesa Shinkusu shoonse ndaamba ayi, ‘Bona, ntooyanda kukumika mulilo uyo weshi ukatente shisamu shako shoonse, shitontola ashiyumu. Mulilo uyu teshi ukakonsheke kuushimya alimwi bantu boonse kuswa kumalenge kuya kumatwa balaakunyumfwa cikasaashi ca nguwo.

⁴⁸ Lyalo muntu womwi awomwi ulaakubona kwaamba ayi nebo neMwaami Lesa ndime ndaukumika alimwi taaku weshi akaushimyeewo, sobwe.’ ”

⁴⁹ Mpomunyaawo ndakaamba ayi, “Sobwe noBaami baLesa Beshinkusu shoonse! Sa te bantu batootongooka kale ayi lyoonse ndaambabo mushikoshanyo?”