Esekelo 2 - Baibo Busansulushi Bwa Libuku Ili

Lesa mbwaakeeta Esekelo kuba mulaluki

¹ Mpomunyaawo wakaŋambila ayi, “Webo omuntu, nyamuka mbandike kuli ndiwe.”

² Kaacaamba, Mushimu wakwe Lesa wakenjila muli ndime akunengesha kwiimikana. Lyalo ndakamunyumfwa kaabandika kuli ndime.

³ Wakaamba ayi, “Webo omuntu, ntookutuma kubene Isilaeli, mushobo waashu uyo wakangashukila. Balo alimwi abamashali babo bakulukulu bakangashukila kushikila asunu.

⁴ Bantu abo tabanyumfwi alimwi mbeshicimpamya. Ono uye ubalwiitebo nebo neMwaami Lesa Shinkusu shoonse nsheshi nkaambe.

⁵ Nabi bakanyumfwe nabi batakanyumfwi ceebo mbaashu, balaakwishiba ayi palinga mulaluki pakati kabo.

⁶ “Ono webo omuntu, utabaloondi nabi kututuma kusheesho nshebaamba. Utaloondi nakubi kwaamba ayi shisonsoonya amyuumfwa shoonse shilikushingulukite alimwi bwikaalo bwako buli anga uli pakati ka ntalaŋongo. Utaloondi nshebaamba nabi kuloonda mbabo nakubi kwaamba ayi mbaashu.

⁷ Webo ubalwiitebo maswi angu nabi bakanyumfwe nabi batakanyumfwi ceebo mbaashu.

⁸ “Sombi webo omuntu, kutika nsheshi nkulwiite. Utaashuki mbuli bwakaashuka bantu aba. Cenama ulye nceshi nkupe.”

⁹ Mpomunyaawo ndakalangilisha akubona lyaansa lyakalinga kutambikitwe kuli ndime. Muli ndilyo mwakalinga cakulembelaawo

¹⁰ ico ncaakafungulula kunembo lyangu. Cakalinga kulembetwe maswi abuumba, akulila alimwi amaswi amapensho kumbasu shoonse shobilo.