Esekelo 19 - Baibo Busansulushi Bwa Libuku Ili

Lwiimbo lwa buumba

¹ Mwaami Lesa wakaŋambila ayi nyimbe lwiimbo lwa buumba kulilila baana ba mwaami bobilo bene Isilaeli.

² “Nyinawanu wakalinga anga ninkalamu ishashi icite mpuwo pakati ka nkalamunyina. Wakalinga koona pantu pomwi ankalamu shisankwa akulela bana bakwe.

³ Wakalela mwanaakwe womwi uyo wakaba nkalamu icite nkusu. Mwaana uyu wakeeya kucata banyama akutalika kulya bantu.

⁴ Mpeeke mishobo yakanyumfwa makani apali nguwe. Lyalo bakamucatila mucilindi ncibakamuteya akumukwelela kundobo kumutola mucishi ca Ijipiti.

⁵ “Ono nyina ndyaakabona ayi nshaakalinga kulangila shaala kucitika, wakabwesa mwanaakwe umwi akumulengesha kuba nkalamu icite nkusu.

⁶ Yakalinga kweendela pantu pomwi ankalamu mukwiinga ciindi ico yakaba nkalamu icite nkusu. Yakeeya kucata banyama akutalika kulya bantu.

⁷ Yakamwayoola shiyubilo akunyonyoola mandabala. Bantu ba mucishi bakaloonda abuumbi ciindi ndiyakatalika kubuluma.

⁸ Lyalo mishobo yakabungana ayi balwane anjiyo, ee, bantu ba mushishi shishingulukite boonse bakesa. Bakateya koombe kabo alimwi akwiicatisha mucilindi.

⁹ Bakeekwelela kundobo pakwiibika mucinsangala akwiitola kumwaami wa bene Babiloni. Bakeebika muntolongo Aboobo kubuluma kwa njiyo takukwe kunyumfwikaawo tubili patulundu twa cishi ca Isilaeli.

¹⁰ “Nyoko wakalinga anga ncisamu ca munyansa mumuunda wa nguwo, munyansa uyo wakashangwa kweela maanshi. Cisamu ico cakalinga kucata shisepo alimwi cakalinga kucite misampi iinji abuumbi ceebo kwakalinga maanshi aanji.

¹¹ Misampi ya ncico yakalinga iyumu, yeelete kuba nkoli ya muleli. Cisamu ico cakalaampa akwiindilila shisamu shimwi shoonse. Muntu uli woonse wakalinga kufwambaana kucibona ceebo cakalinga cilaamfu alimwi cakalinga kucite misampi iinji.

¹² Nakubi boobo cakashulwa mubukali buyoosha alimwi akuciwishisha panshi. Awalo muuwo wakwicwe wakalengesha shisepo sha ncico kunyana. Misampi ya ncico yakayuma akumana kupya kumulilo.

¹³ Bulya cilishangitwe muluyanga, mucishi ciyumu nta, citacite maanshi.

¹⁴ Mulilo wakayambuka kuswa kumusampi unene umwi wa ncico akutenta shisepo sha cisamu ca munyansa ico. Taaku musampi uyumu wakacaalako uyo wakalinga kweelete kuba nkoli ya muleli. Ulu ndwiimbo lwa buumba. Lulyeelete kwiimbwa muciindi ca kuungumana.”