Esekelo 17 - Baibo Busansulushi Bwa Libuku Ili

Cikoshanyo ca bamumbankwashi acisamu ca munyansa

¹ Mwaami Lesa wakaŋambila ayi,

² “Webo omuntu, lwiita bene Isilaeli cikoshanyo

³ kubeshibisha nebo neMwaami Lesa Shinkusu shoonse nshentokwaamba. Cikoshanyo ico ncakwaamba ayi, ‘Kwakalinga mumbankwashi munene wakalinga kucite mapapaminwa ankusu amapepe alaamfu a mishobo ipusenepusene. Mumbankwashi wakoolukila kuLebanoni akucata kwiculu lya cisamu ca sida.

⁴ Mpeeke wakatyolaako musampi wakwiculu kwiine akuutola kucishi ca beshimakwebo, uko nkwaakaya mukuushanga mundabala yomwi pamandabalaabo.

⁵ Wakabwesa ambuuto shimwi sha mucishi canu akuya mukushanga kuli bulongo bucite mboleshi. Wakaya mukucishanga anga ncisamu ca masompe munshaamaanshi aanji.

⁶ Mbuto iyo yakamena akuba cisamu ca munyansa cicite misampi ifwefwela. Misampi iyo yakakomena kuya mwiculu umo mwakalinga mumbankwashi, sombi miyanda yalo yakaya panshi. Cisamu ca munyansa ico cakaba amisampi akusonsa matewu aanji.

⁷ “ ‘Sombi kwakalinga mumbankwashi munene umwi uyo wakalinga kucite mapapaminwa ankusu amapepe aanji. Cisamu ca munyansa ico cakalansha miyanda ya ncico kumumbankwashi kuswa mpocakalinga kushangitwe. Misampi yalo yakalanga kumumbankwashi ayi keecana nkuko maanshi.

⁸ Sombi cakashangwa mubulongo bucite mboleshi munshaamaanshi aanji kwaamba ayi cibe amisampi, cikacate shisepo akuba cisamu ca munyansa cinene.’

⁹ “Ono nebo neMwaami Lesa Shinkusu shoonse ndeepusha ayi, ‘Sa cisamu ici inga cakomena kabotu? Sa mumbankwashi mutaanshi inga taacitumuni, kupululaako shisepo, kuponsolako misampi alimwi akwiileka ayi iyume? Inga takuyandiki lyaansa lyankusu nabi bantu baanji ayi citumunwe.

¹⁰ Nabi na calimbulwa, sa inga casonsa? Sa inga taciyumini limwi na capuupilwa muuwo wakwicwe? Sa inga taciyuminibo peenka apo mpweshi cikashangwe?’ ”

Busansulushi bwa cikoshanyo

¹¹ Mpeeke Mwaami Lesa wakaŋambila ayi,

¹² “Ipusha mushobo waashu uyo ayi, ‘Sa tamwishi busansulushi bwa shintu ishi?’ Ubalwiite ayi, ‘Mwaami wa bene Babiloni wakaya kuJelusalemu akubwesa mwaami wa mumo alimwi abacinenenene bakwe wabatola kuBabiloni.

¹³ Kuswawaawo wakabwesa womwi pakati ka bamuŋanda ya bwaami akupangaakwe cipangano. Lyalo wakamulengesha kushomesha cakulumbila ayi unanooshomeka. Wakatolelesha abacinenenene ba mucishi

¹⁴ kwaamba ayi bwaami ubo butakabuki tubili alimwi akulengesha cipangano ico kulamwa.

¹⁵ Sombi mwaami wa bene Juda lakwe wakaashuka akutuma beshikumwiimikanina kuIjipiti kuya mukuleta maaki alikoto lya bashilumamba linene. Sa muntu uyu ulaakuswitilila? Sa uyo weenga wacita sha mushobo uyo inga wapuluka? Sa inga wakonsha kupwaya cipangano amana wapuluka?’

¹⁶ “Nebo neMwaami Lesa Shinkusu shoonse ndaamba ayi, ‘Kweelana ambocibete lushinisho ayi ndi muumi, mwaami uyo ulaakufwita muBabiloni ceebo wakapwaya kushomesha cakulumbila kwakwe acipangano ico ncaakapanga amwaami wa Babiloni uyo wakamubika pacuuna ca bwaami.

¹⁷ Falawo mwaami wa bene Ijipiti alikoto lyakwe lya bashilumamba liyumu teshi bakamucafweeko munkondo baakuyaka shakutantaawo pakulwana akukaba shilindi kwaamba ayi bacaye bantu baanji.

¹⁸ Mwaami wa bene Juda wakapwaya kushomesha cakulumbila kwakwe acipangano ico ncaakapanga ayi ulaakucilama. Wakacita shintu ishi shoonse aboobo teshi akapulukewo, sobwe.’

¹⁹ “Paceebo ceeco nebo neMwaami Lesa Shinkusu shoonse ndaamba ayi, ‘Kweelana ambocibete lushinisho ayi ndi muumi, ndaakumupa mulandu ceebo wakapwaya cipangano ico ncaakashomesha cakulumbila muliina lyangu ayi ulaakucilama.

²⁰ Ndaakumuteya koombe kangu akumucatishaamo. Ndaakumutola kucishi ca Babiloni akumupa mulandu uko ceebo taakwe kushomeka kuli ndime.

²¹ Bashilumamba bakwe bacibwene kulwana boonse balaakucaikwa munkondo abalo bashilumamba beshi bakacaaleewo balaakupalanganishilwa mumbasu shone shoonse. Lyalo ndyeshi mukeshibe ayi nebo neMwaami Lesa ndaamba.’ ”

Kushomesha kwakwe Lesa kwakupa kulangila

²² Mwaami Lesa Shinkusu shoonse waamba ayi, “Nebo nemwiine ndaakutimbula musampi wakwiculu kwiine kwa cisamu ca sida. Lyalo ndaakutyolaako musampi ubombu akuya mukuushanga pakalundu kalaamfu peculu peene.

²³ Ee, ndaakuushanga peculu peene pakalundu ka Isilaeli keendaawo kulaampa. Ulaakuba amisampi, kucata shisepo akuba cisamu ca sida cinene. Bayuni ba mishobo yoonse balaakuyakamo shiinswa akucana shimfule kumisampi ya ncico.

²⁴ Shisamu shoonse sha mucishi shilaakwishiba ayi ndi Mwaami Lesa. Ndawisha shisamu shilaamfu akulengesha shisamu shiniini kukomena. Ndayumya shisamu shisonsete akulengesha shisamu shiyumu kusonsa. Nebo neMwaami Lesa ndaamba alimwi ndaakucicita.”