Esekelo 16 - Baibo Busansulushi Bwa Libuku Ili

Ndabala ya Jelusalemu itashomeki

¹ Mpeeke Mwaami Lesa wakaŋambila alimwi ayi,

² “Webo omuntu, shibisha ndabala ya Jelusalemu micito ya njiyo ilensha bunya

³ akwiilwiita ayi nebo neMwaami Lesa Shinkusu shoonse ntokwaamba ayi, ‘Ondabala ya Jelusalemu, wakashalilwa mucishi ca Kenani. Baiso bakalinga bene amoli, banyoko bakalinga bene Iti.

⁴ Bushiku mbowakashalwa taaku wakatimbulawo lukowa lwako, nabi kukusanshaawo amaanshi ayi ukushikwe matombe, nabi wakakunanikawo mwiinyo, nabi kukupetelesha mushisani.

⁵ Taaku muntu wakakufwitako nkumbu kwaamba ayi akucitileko shintu ishi, sombi wakasowekwabo muluundu. Ceebo bushiku mbowakashalwa taaku wakalinga kukusuniiwo, sobwe.

⁶ “ ‘Mpeeke nebo ndakeendila kufwaafwi akukubona kooalabanganabo mumalowa. Ono koocaalabangana mumalowa umo ndakakulengesha ayi ube abuumi.

⁷ Ndakakulengesha kukomena kabotu anga cishango ca mumuunda. Wakakomena waba ankusu akuba mooye wiindaawo kubota. Wakamena nkolo amisusu yakalaampa, nakubi boobo wakalinga kweendabo matakosha.

⁸ “ ‘Ndindakeendilako lwabili, ndakakulanga akubona ayi wakomena cakweelela kweebwa. Lyalo ndakafungulula cisani cangu nkocibetele kweela akukufweka ayi utanokweenda matakosha. Ndakashomesha cakulumbila kuli ndiwe akupanga cipangano andiwe. Kuswawaawo wakaba waangu. Nebo neMwaami Lesa Shinkusu shoonse ndaamba.

⁹ “ ‘Ndakabwesa maanshi, ndakusansha malowa ngowakalinga kucite akukunanika mafuta.

¹⁰ Ndakakufwalika lilaya lyakatungwa shakulibotesha akukufwalika nkwabilo sha cipaya. Ndakakufwalika cakufwala ca nsalu iteshimite akukufwekelesha ansaalu sha makwebo.

¹¹ Ndakakufwalika shintu shakulibotesha sha makwebo. Ncakwiila ndakakufwalika makosa alimwi abulungu bwa munshingo.

¹² Ndakakufwalika ninga ya kunshono, masikiyo kumatwi amushini ubotu kumutwi wako.

¹³ Ndushinisho wakafwala shakulibotesha sha golodi alimwi asilifa. Shakufwala shako shakalinga sha nsalu iteshimite, nsalu shuulwa maali aanji ansaalu shakatungwa shakushibotesha. Shakulya shako shakalinga shafulaulo upelekete, buuci amafuta amaolifi. Ncakwiila wakabota abuumbi cakwaamba ayi wakeelela akuba mukamwaami.

¹⁴ Wakaya mpuwo pakati ka mishobo yoonse ceebo ca bubotu bwako mukwiinga bulemu mbondakakupa bwakakulengesha bubotu bwako kwiindaawo. Nebo neMwaami Lesa Shinkusu shoonse ndaamba.

¹⁵ “ ‘Sombi webo wakacinka manungo mububotu bwako akuba mufuule ceebo ca mpuwo yako. Ncakwiila wakalinga kukumana amusankwa uli woonse utokwiinda.

¹⁶ Wakabwesa ashisani shako shimwi akuya mukubotesha misena yako yakulambililaako. Kumisena iyo nkowakalinga kucitila bufuule. Shintu sha mushobo uyo tasheelete kucitika.

¹⁷ Wakabwesa shakulibotesha sha silifa agolodi isho nshendakakupa, wapangaamo shibumbwabumbwa shisankwa isho nshewakatalika kulambila.

¹⁸ Wakabwesa shakufwala shako shakatungwa shakubotesha akushifwalika alimwi akushipa shipo sha mafuta atununkila kabotu ayo ngondakakupa.

¹⁹ Wakabwesa ashakulya nshendakakupa akucita bweenka ubo. Nkokwaamba ayi wakabwesa fulaulo upelekete, mafuta a olifi alimwi abuuci akupa shipo kushibumbwabumbwa sha tununkila kabotu. Nebo neMwaami Lesa Shinkusu shoonse ndaamba ayi ico cakacitika.

²⁰ “ ‘Lyalo wakabwesa baana basankwa abanakashi mbowakanshalila akubabenga ayi njimilambu kushibumbwabumbwa. Sa bufuule bwako bwakaceya

²¹ cakutaloonda kucaya bana bangu akubabenga ayi njimilambu kushibumbwabumbwa?

²² Ndiwakalinga kucita shintu ishi shilensha bunya abufuule bwako tookwe kwiibaluka nshiku shako sha kubwanike, ndiwakalinga kweendabo matakosha, kooalabanganabo mumalowa.’ ”

Ndabala ya Jelusalemu mboyakalinga ifuule

²³ Mwaami Lesa Shinkusu shoonse waamba ayi, “Mapensho, mapensho kuli ndiwe! Peculu lya shibiibi shako shimwi,

²⁴ wakaliyakila misena yakulambililaako shibumbwabumbwa akucitila bufuule mweela mukwakwa womwi awomwi.

²⁵ Kweela kwa mukwakwa womwi awomwi mwakayakaako misena yakulambililaako akusebaanya bubotu bwanu mukukumana amusankwa uli woonse utokwiinda. Wakalinga kucita boobo mankanda maanji pabushiku bomwi abomwi.

²⁶ Wakalinga kucita bufuule abene Ijipiti beshikamukobonyoko beshilunkumbwa. Wakasonkomona bukali bwangu ceebo ca bufuule bwako.

²⁷ “Aboobo ndakatambika lyaansa lyangu mukukupa mulandu akukuceesheshako cishi. Ndakakwaaba mumaansa a bene Filisiti balwani bako abo bakalinga kukupatite akukucimitwe ceebo ca bufuule ubo mbowakalinga kucita.

²⁸ “Wakalinga kucita bufuule abene Asilya ceebo cakutakuta kwako, nakubi boobo akwalo uko tookwe kukutaawo, sobwe.

²⁹ “Bufuule bwako bwakeendilila cakwaamba ayi wakabikawo abene Babiloni, mushobo wa beshimakwebo, sombi akwalo kuli mbabo tookwe kukutaawo, sobwe.”

³⁰ Mwaami Lesa Shinkusu shoonse waamba ayi, “Webo uli mulwashi mumoyo ceebo wakalinga kucita shintu ishi shoonse anga ngumufuule utacite nsoni.

³¹ Ndimwakaliyakila misena yakulambililaako shibumbwabumbwa akucitila bufuule mweela mukwakwa womwi awomwi, temwakalinga mbuli mufuule ceebo mwebo mwakalinga kukaka kupekwa maali.

³² Webo omwanakashi mufuule! Ulisuni basankwa beensu kwiinda ibayo.

³³ Mufuule woonse ulapekwa maali, sombi webo ndiwe upa shipo kubaabo bakusuna, kubanyengelela ayi bese bacite bufuule awebo kuswa kumisena yoonse.

³⁴ Aboobo webo uli mufuule upuseneeko abafuule bamwi boonse. Taaku bakweendela. Ncakwiila webo ulipusene cancinencine abafuule bamwi ceebo ndiwe ubalipila, sombi webo taaku ncoolipilwaawo, sobwe.”

Lesa ulaakupa mulandu ndabala ya Jelusalemu

³⁵ “Paceebo ceeco, webo omufuule, nyumfwa maswi aMwaami Lesa.

³⁶ Mwaami Lesa Shinkusu shoonse waamba ayi, ‘Wakasowa buboni bwako alimwi akufuulila basankwa bakalinga kukusuna. Wakalinga kulambila shibumbwabumbwa shako shilensha bunya akushipa bulowa bwa bana bako.

³⁷ Paceebo ceeco, ntoobunganya mbowakalinga kweendaabo boonse abo mbowakalinga kusangalalilaamo, mbowakalinga kusuni abaabo mbowakalinga kupatite. Ndaakubabunganya ayi bese bakulwaane kuswa kumisena yoonse ikushingulukite akwisa mukukufuula kunembo lyabo ayi bakubonene.

³⁸ Ndaakukupa mulandu ceebo ca bulale abucayi. Mubukali bwangu buyoosha, ndaakukupa mulandu wakucaikwa.

³⁹ Ndaakukwaaba mumaansaabo, lyalo balaakumwayulula misena njoocitila bufuule anjoolambililaako shibumbwabumbwa. Balaakukunyaya shakufwala ashakulibotesha akukushiyabo matakosha.

⁴⁰ Balaakukutambila bantu beshi bakakuume mabwe akukutimboola mutupanshapansha amipeeni yabo.

⁴¹ Balaakukutentela maanda akukupa mulandu pameenso a banakashi baanji. Ndaakumana bufuule bwako alimwi teshi ukalipilewo tubili basunikwi bako.

⁴² Lyalo bukali bwangu buyoosha bulaakumana abukali bwangu bwa busuba pali ndiwe bulaakuswa. Ndaakubooshamo moyo cakutakalalaawo tubili.

⁴³ “ ‘Ono mukwiinga tamukwe kwiibaluka nshiku sha bucikula bwangu bwako, sombi wakankalasha mukucita shintu shoonse ishi. Ndushinisho ndaakukupa mulandu pasheesho nshewakacita. Ceebonshi wakeelikawo bufuule pasheesho shoonse shilensha bunya nshewakalinga kucita? Nebo neMwaami Shinkusu shoonse ndaamba.’ ”

Bweenka bubete banyina amwaana mwanakashi mbwaabete

⁴⁴ Mwaami Lesa waamba ayi, “Ondabala ya Jelusalemu, abo boonse baamba tushimpi balaakunokwaamba kashimpi aka pali ndiwe ayi, ‘Bweenka bubete banyina amwaana mwanakashi mbwaabete.’

⁴⁵ Webo ndushinisho ulikoshetebo banyoko abo bakapata beebaabo abana babo. Ncakwiila bamakwanu banakashi wakabanabo ceebo abalo bakalinga kupatite bameebaabo abana babo. Banyoko bakalinga bene Iti abalo baiso bakalinga bene Amoli.

⁴⁶ “Munene wako mwanakashi nguSamaliya uyo ushiitile kulubasu lwa kumatwa abana bakwe banakashi. Mwanike wako mwanakashi nguSodoma uyo ubetele kumalenge abana bakwe banakashi.

⁴⁷ Webo tookwe kukonkelabo nshila shabo alimwi akwiiya micito yabo ilensha bunya, sombi munshila shako shoonse wakabisha kwiinda mbabo.

⁴⁸ Ono nebo neMwaami Lesa Shinkusu shoonse ndaamba ayi, ‘Kweelana ambocibete lushinisho ayi ndi muumi, mwanike wako Sodoma abana bakwe banakashi tabakwe kucitawo kale nshewakacita webo abana bako banakashi.

⁴⁹ “ ‘Cibiibi cakacita Sodoma mukwanu mwanakashi nceeci. Lakwe abaana bakwe banakashi wakalinga kulisumpula, kucite shakulya shiinji alimwi bakalinga kunooshiite kwakubula cakulisukama, sombi taakalinga kucafwa bakandu abataaku mbobabete.

⁵⁰ Bakalinga beshikulisumpula akucita shintu shilensha bunya pameenso angu. Paceebo ceeco ndakabanyonyoola kweelana ambooshi.

⁵¹ “ ‘Samaliya taakwe kushikawo nabi pamusa wa shibiibi nshewakacita. Webo wakacita shintu shilensha bunya shiinji kwiinda nguwe. Webo wakalengesha bamakwanu banakashi kuboneka anga balo baliluleme na tweelanisha asheesho nshewakacita webo.

⁵² Nyumfwa nsoni ceebo bamakwanu babonekako kululama. Ceebo webo wakabisha kwiinda mbabo, ncakwiila balo balabonekako kululama kwiinda ndiwe. Aboobo ulyeelete akunyumfwa nsoni akulisenda mukwiinga walengesha bamakwanu kuboneka kululama.’ ”

Sodoma aSamaliya mbweshi bakapekwe coolwe alimwi

⁵³ Mwaami Lesa wakaambila Jelusalemu ayi, “Ndaakulengesha Sodoma abana bakwe banakashi alimwi aSamaliya abana bakwe banakashi kuswitilila. Ncakwiila awebo ndaakukulengesha kuswitilila pantu pomwi ambabo.

⁵⁴ Webo ulaakulisenda akunyumfwa nsoni pasheesho shoonse nshewakacita, balo bamakwanu balaakusangalala pakubona ayi tabakwe kucita shibiibi sheelene anshewakacita.

⁵⁵ Mpeeke mukwanu Sodoma abana bakwe banakashi aSamaliya abana bakwe banakashi balaakuba bweenka mbobakalinga kalekale. Awebo abana bako ulaakuba bweenka mbowakalinga kalekale.

⁵⁶ Sa teshi ndiwe wakalinga kuseka mukwanu Sodoma munshiku shakulisumpula kwako,

⁵⁷ ee, bubi bwako kabutana kuyubuluka? Te mpaapa awebo sunu bene Edomu abeshikamukobonyinaabo boonse alimwi abene Filisiti batookuseka? Nkokwaamba ayi boonsebo bakushingulukite abo bakupatite batookuseka.

⁵⁸ Ulyeelete kucinyumfwa cilemeneshi ca bufuule bwako alimwi amicito yako ilensha bunya. Nebo neMwaami Lesa Shinkusu shoonse ndaamba.”

Cipangano citamaani

⁵⁹ Mwaami Lesa Shinkusu shoonse waamba ayi, “Ndaakukucita kweelana amboweelete ceebo wakasuula kushomesha kwako akupwaya cipangano cangu.

⁶⁰ Nakubi boobo ndaakwiibaluka cipangano ncendakapanga andiwe koocili cikula bwangu alimwi ndaakupanga cipangano citamaani andiwe.

⁶¹ Lyalo awebo ulaakwiibaluka nshila shako akunyumfwa nsoni pakutambula bamakwanu banakashi bobilo, munene amwanike. Ndaakukupa kwaamba ayi bakabe anga mbana bako banakashi, sombi kuteshi kubacita kweelana acipangano cangu andiwe.

⁶² Kuswawaawo ndaakupanga cipangano andiwe. Lyalo ndyeshi ukeshibe ayi nebo ndi Mwaami Lesa.

⁶³ Mpeeke ndaakukulekelela shibiibi, sombi ulaakushiibaluka akunyumfwa nsoni cakwaamba ayi teshi ukacalulewo tubili mulomo wako. Nebo neMwaami Lesa Shinkusu shoonse ndaamba.”