Esekelo 15 - Baibo Busansulushi Bwa Libuku Ili

Cikoshanyo ca cisamu ca munyansa

¹ Mpeeke Mwaami Lesa wakaŋambila ayi,

² “Webo omuntu, ino musampi wa cisamu ca munyansa inga weenda buyani kubota pashisamu shoonse sha muluundu?

³ Sa inga woosebensesha kupanga cintu cili coonse? Sa inga wapangishako nabibo mpoopo yakwaanjikawo shintu?

⁴ Ngubotubo kunkuni, sombi na wapya kweela koonse kobilo akuba mashimbi pakati, sa inga wasebenseshekwa kuncito imwi?

⁵ Na tewakalinga kucite ncito koocili wakabumbulu, ino inga waba buyani anciito na wapya mumulilo akuba mashimbi?

⁶ “Paceebo ceeco, nebo neMwaami Lesa Shinkusu shoonse ndaamba ayi, ‘Bweenka mbuli mbondakapa musampi wa munyansa pashisamu shoonse sha muluundu kuba nkuni mbweeke ubo mbweshi nkacite abantu bekala muJelusalemu.

⁷ Ndaakubapa mulandu. Nabi bakapuluka kuswa kumulilo womwi, mulilo umwi ulaakubatenta. Ndaakumana kubapa mulandu, ndyeshi mukeshibe ayi nebo ndi Mwaami Lesa.

⁸ Ndaakulengesha cishi cabo kuba luyanga ceebo tabakwe kushomeka kuli ndime. Nebo neMwaami Lesa ndaamba.’ ”