Esekelo 14 - Baibo Busansulushi Bwa Libuku Ili

Lesa mbwaapatite bantu balambila shibumbwabumbwa

¹ Bamaloba ba bene Isilaeli bamwi bakesa kuli ndime ayi banjipushe kuyanda kwakwe Lesa.

² Mpeeke Mwaami Lesa wakaŋambila ayi,

³ “Webo omuntu, bantu aba batalika kulambila shibumbwabumbwa nabi balishi ayi shilaakuba mfumpu kunembo lyabo. Sa batooyeeya ayi inga ndabakumbula?

⁴ Paceebo ceeco ubalwiite ayi nebo neMwaami Lesa Shinkusu shoonse waamba ayi, ‘Na mwine Isilaeli watalika kulambila shibumbwabumbwa nakubi kwaamba ayi ulishi ayi shilaakuba mfumpu kunembo lyakwe, ono pesule wesa mukwiipusha kumulaluki, nebo neMwaami Lesa ndimeshi nkamukumbule kweelana akulambila shibumbwabumbwa kwakwe.

⁵ Ndaakucita boobo kwaamba ayi mbooshe myoyo ya bene Isilaeli abo boonse bakanshiya ceebo ca shibumbwabumbwa.’

⁶ “Paceebo ceeco ambila mushobo wa bene Isilaeli ayi Mwaami Lesa waamba ayi, ‘Amusanduke kuswa kushibiibi! Amusanduke kuswa kushibumbwabumbwa shanu akufutatila micito yanu yoonse ilensha bunya.

⁷ “ ‘Na mwine Isilaeli nabi muswamashi ukala mucishi ca Isilaeli watalika kulambila shibumbwabumbwa nakubi kwaamba ayi ulishi ayi shilaakuba mfumpu kunembo lyakwe, ono pesule wesa mukwiipusha kumulaluki, nebo neMwaami Lesa ndimeshi nkamukumbule.

⁸ Muntu uyo ndaakumupata akumusandula kuba citondesho kubamwi alimwi akuba kashimi. Ndaakumukusha pakati ka bantu bangu. Lyalo ndyeshi mukeshibe ayi nebo ndi Mwaami Lesa.

⁹ “ ‘Ono na mulaluki akacenjeekwe mukukumbula shabubeshi, ngayi nebo neMwaami Lesa ndime ndamucenjeeka. Nakubi boobo muntu uyo ndaakumukaka akumukusha kuswa pakati ka bantu bangu bene Isilaeli.

¹⁰ Nkokwaamba ayi mulaluki uyo ulaakupekwa mulandu weelene ashikwiipusha.

¹¹ Ndaakucita boobo kwaamba ayi bene Isilaeli bakabule kunshiya akulibisha tubili ceebo ca shibiibi shabo. Balaakuba bantu bangu anebo ndaakuba Lesa wabo. Nebo neMwaami Lesa Shinkusu shoonse ndaamba.’ ”

Nowa, Danyelo alimwi aJobo

¹² Mpeeke Mwaami Lesa wakaŋambila ayi,

¹³ “Webo omuntu, na cishi cabisha mukutashomeka kuli ndime, nebo ndaakutandabika lyaansa lyangu mukunyonyoola shakulya sha ncico. Ndaakutuma nsala pabantu ayi bafwe pantu pomwi ashifubwa shabo.

¹⁴ Nabi bantu aba botatwe Nowa, Danyelo aJobo kabaliimo, inga balo bapulukabo beenka ceebo ca bululami bwabo. Nebo neMwaami Lesa Shinkusu shoonse ndaamba.

¹⁵ “Nabi na ndatuma banyama bamuluundu mucishi ico mukucaya bantu boonse akucilengesha kubula wikalaamo alimwi awiindaamo ceebo ca banyama,

¹⁶ nebo neMwaami Lesa Shinkusu shoonse ndaamba ayi, ‘Kweelana ambocibete lushinisho ayi ndi muumi, basankwa abo botatwe nabi kabaliimo inga tabakoonshi kubapulushawo bana babo basankwa abanakashi. Ncakwiila inga bapulukabo beenka, sombi cishi calo inga caba luyanga.’

¹⁷ “Nabi na ndaleta nkondo mucishi ico akwaamba ayi, ‘Mupeeni awiinde mucishi coonse,’ akucaya bantu ba mumo alimwi ashifubwa shabo

¹⁸ nebo Mwaami Lesa Shinkusu shoonse ndaamba ayi, ‘Kweelana ambocibete lushinisho ayi ndi muumi, basankwa abo botatwe nabi kabaliimo inga tabakoonshi kubapulushawo bana babo basankwa abanakashi. Ncakwiila inga bapulukabo beenka.’

¹⁹ “Nabi na ndatuma mwaalu mucishi ico akupomweeta bukali buyoosha pali ncico kwiinda mukutila bulowa kucaya bantu boonse alimwi ashifubwa shabo,

²⁰ nebo neMwaami Lesa Shinkusu shoonse ndaamba ayi, ‘Kweelana ambocibete lushinisho ayi ndi muumi, Nowa, Danyelo aJobo, nabi kabaliimo inga tabakoonshi kupulushawo bana babo basankwa abanakashi. Ncakwiila inga bapulukabo beenka ceebo ca bululami bwabo.’ ”

²¹ Mwaami Lesa Shinkusu shoonse waamba ayi, “Ino cilaakuba buyani ndaakutuma mapensho one eendaawo kubica pandabala ya Jelusalemu, nkokwaamba ayi ndaakutuma nkondo, nsala, banyama bamuluundu amwaalu kucaya bantu ba mumo alimwi ashifubwa shabo?

²² Nakubi boobo kulaakuba bamwi beshi bakacaaleewo, nkokwaamba ayi bana babo basankwa abanakashi balaakufunwa kuswa muJelusalemu. Balaakwisa kuli ndiwe, lyalo waakubona mibo amicito yabo ibiibi, awebo ulaakusumina pamapensho ayo ngondakaleta muJelusalemu. Nkokwaamba ayi mapensho oonse ngondakacita momulya.

²³ Ulaakusumina waakubona mibo amicito yabo ibiibi ceebo cakwishiba kwaamba ayi anu nshikwe kubafumbukabo pakubapa mulandu. Nebo neMwaami Lesa Shinkusu shoonse ndaamba.”