Esekelo 13 - Baibo Busansulushi Bwa Libuku Ili

Balaluki babeshi basankwa mbobakalalukilwa mapensho

¹ Mpomunyaawo Mwaami Lesa wakaŋambila ayi,

² “Webo omuntu, Laluka mapensho pabalaluki bene Isilaeli abo balaluka sha mumitwi yabo beene. Ubaambile ayi, ‘Amunyumfwe maswi a Mwaami Lesa.’ ”

³ Mwaami Lesa Shinkusu shoonse waamba ayi, “Mapensho kubalaluki baluya abo bakonkela miyeeyo yabo beene kakutaaku ancebabwene.

⁴ Nobene Isilaeli, balaluki banu balibo anga mbamwaaba ba mumatongo.

⁵ Bakacileka akuya mukulama pamusena apo lubumbu lwabo mpolwakamwayuluka nabi kuya mukuluyaka alimwi kwaamba ayi lukatabilile bene Isilaeli pabushiku bwa Mwaami Lesa bwa nkondo.

⁶ Shili anga nshiloto shabo nshabubeshi abulaluki bwabo mbwakucenjeekabo. Balaamba ayi, ‘Mwaami Lesa waamba,’ kakuli teshi ndime ndabatuma. Nakubi boobo balangila maswi abo ayi acitike cancinencine.

⁷ Nebo ndabalwiita ayi, ‘Shili anga nshiloto nshemubona nshabubeshi alimwi ashintu nshemulaluka nshakucenjeeka. Mwebo mulaamba ayi ayo ngamaswi angu, sombi nshikwe kubandikawo kuli ndimwe.’

⁸ “Paceebo ceeci nebo neMwaami Lesa Shinkusu shoonse ndaamba ayi, ‘Ceebo ca maswi anu abubeshi alimwi ashili anga nshiloto nshemubona nshabubeshi, nebo ndimupatite.

⁹ Ndaakupa mulandu balaluki beshikubona shili anga nshiloto shabubeshi alimwi akulaluka shintu shakucenjeeka. Teshi bakanoobaako bantu bangu na babungana ayi bapange miyeeyo nabi kulembwa pamundando wa meena a bamumushobo wa bene Isilaeli. Teshi bakapilukewo tubili mucishi ca Isilaeli. Lyalo ndyeshi mukeshibe ayi nebo ndi Mwaami Lesa.’

¹⁰ “Balaluki aba balasowa bantu bangu ndibabaambila ayi, ‘Kuli luumuno,’ kakuli taaku luumuno. Bantu bangu bayaka lubumbu lutashimpite abalo balaluki balushingula abulongo butuba.

¹¹ Aboobo ambila baabo balushingula abulongo butuba ayi lubumbu lwabo lulaakuwa. Ndaakutuma mfula inene abuumbi, mfula ya mabwe ilaakwisa pali ndulo alimwi cipuupu cinene cilaakulupuupila.

¹² Lubumbu ulo lwaakuwa, sa bantu teshi bakamwiipushe ayi, ‘Ino mpindu ya bulongo butuba mbomwakashingulaako ili kuli?’

¹³ “Paceebo ceeco Mwaami Lesa Shinkusu shoonse ndaamba ayi, ‘Mubukali bwangu buyoosha, ndaakutuma cipuupu cinene, mfula ya mabwe alimwi amfuula inene abuumbi ilaakwisa mukunyonyoola lubumbu.

¹⁴ Ndaakumwaya lubumbu ulo ndomwakashingula abulongo butuba. Ndaakulupalanganya cakwaamba ayi alwiimbi lulaakucaalabo patuba. Na lukawe, amwebo mulaakunyonyoolwa andulo. Lyalo ndyeshi mukeshibe ayi nebo ndi Mwaami Lesa.’

¹⁵ Aboobo bukali bwangu buyoosha bulaakwisa palubumbu alimwi apabaabo bakalushingula bulongo butuba. Lyalo ndaakumwaambila ayi lubumbu lwaloba pantu pomwi abaabo bakalushingula.

¹⁶ Ncakwiila balaakuloba balaluki bene Isilaeli abo bakaambila bene Jelusalemu ayi, ‘Kuli luumuno,’ kakuli taaku luumuno. Nebo neMwaami Lesa Shinkusu shoonse ndaamba.”

Balaluki babeshi banakashi mbobakalalukilwa mapensho

¹⁷ Mwaami Lesa wakaamba ayi, “Ono webo omuntu, lansha ciwa ca bukali kubanakashi bali pabene mishaanu abo balaluka shamumitwi yabo beene. Ulaluke mapensho pali mbabo akubalwiita ayi

¹⁸ nebo neMwaami Lesa Shinkusu shoonse ndaamba ayi, ‘Mapensho kubanakashi abo batunga shitumwa shakufwala pamikono ashitambala sha musamu shipusenepusene mukulaampa kwaamba ayi babe ankusu mubuumi bwa bantu bamwi. Sa mulisuni kuba ankusu pabantu bangu akushisebensesha mukulicanina mpindu?

¹⁹ Mulanyansha pakati ka bantu bangu kwaamba ayi mucanebo bale ukwanabo mumapaka aniini alimwi abusekele bwa shinkwa Mulacaya bantu abo bateelete kucaikwa akushiya baabo beelete kufwa. Mwebo mulaambila bantu bangu shabubeshi, abalo balamunyumfwila.’

²⁰ “Paceebo ceeco nebo neMwaami Lesa Shinkusu shoonse ndaamba ayi, ‘Ndipatite shitumwa shanu isho nshemusebensesha kweendelesha buumi alufu pabantu bangu. Ndaakushisutoola pamaansaanu akwaangulula bantu abo mbomweendelesha.

²¹ Ndaakumufuula shitambala shanu sha musamu akupulusha bantu bangu kuswa mumaansaanu. Ncakwiila teshi mukabeendeleshewo tubili. Lyalo ndyeshi mukeshibe ayi nebo ndi Mwaami Lesa.’

²² “Mwebo mwakalengesha bantu baluleme kutyongola ceebo ca bubeshi bwanu nabi nebo nshina kubaletelawo mapensho. Mwakayuminisha bamucita shibi ayi bataswi kunshila shabo shibiibi mukupulusha buumi bwabo.

²³ Paceebo ceeco teshi mukabonewo tubili shili anga nshiloto shanu shabubeshi nabi kulaluka shakucenjeeka. Ndaakupulusha bantu bangu kuswa mumaansaanu. Lyalo ndyeshi mukeshibe ayi nebo ndi Mwaami Lesa.”