Esekelo 12 - Baibo Busansulushi Bwa Libuku Ili

Esekelo mbwaakatondesha lweendo lwakuya mubusha

¹ Mpeeke Mwaami Lesa wakaŋambila ayi,

² “Webo omuntu, ulishiite pakati ka bantu baashu. Balicite meenso akuboneshaako, sombi tababoneshi, balicite matwi akunyumfwishaako, sombi tabanyumfwishi ceebo mbantu baashu.

³ “Paceebo ceeco webo omuntu, longela shintu shako anga ngumuntu utooya mubusha. Ono lumwi lubala, boonse kabakubwene, ukanyamuke kuswa kooko nkoobete akuya kumusena umwi. Mpashi inga beshiba nakubi kwaamba ayi mbantu baashu.

⁴ Lumwi lubala, boonse kabakubwene, longela shintu shako. Ono macolesha, boonse kabakubwene, unyamuke akutalika kuya anga ngumuntu utooya mubusha.

⁵ Lyalo kabakubwene, utulule lubumbu akuswita mpapo pantu pomwi ashintu shako.

⁶ Ushibike pacifushi kabakubwene akushitola ciindi camumuntu ngulya. Ono ukalifwekeleshe kumeenso ayi utakeshibi nkootooya ceebo webo ndaakulengesha kuba cakucenjesheshako mushobo wa bene Isilaeli.”

⁷ Aboobo ndakacita kweelana ambondakaambilwa. Malumwi, ndakalongela shintu shangu anga ngumuntu utooya mubusha. Ono macolesha ndakatulula lubumbu amaansaangu. Mpeeke ndakaswita mpapo pantu pomwi ashintu shangu akushinyamwita pacifushi ciindi camumuntu ngulya boonse kabambwene.

⁸ Mpeeke ndibwakaca macuunsa Mwaami Lesa wakaŋambila ayi,

⁹ “Webo omuntu, mushobo waashu wa bene Isilaeli sa te wakwiipushaawo ayi, ‘Ino utoocitanshi?’

¹⁰ Ubaambile ayi Mwaami Lesa waamba ayi, ‘Makani aya alikumite kumuleli wa ndabala ya Jelusalemu pantu pomwi abene Isilaeli boonse bekalaamo.’

¹¹ Ubalwiite ayi ncewacita caba citondesho kuli mbabo. Ubalwiite ayi bweenka mbowacita, abalo mbweshi bakacite. Balaakutolwa mushishi sha busha.

¹² “Muleli wabo ulaakunyamuna shintu shakwe pacifushi ciindi camumuntu ngulya akuloboka kwiinda pabulyango mbweshi bakamutulwite mulubumbu kwaamba ayi aswite mpapo. Ulaakulifwekelesha kumeenso kwaamba ayi ataboni nkwaatooya.

¹³ Ndaakufungulula koombe kangu umo mweshi akacatwe akumuleta kundabala inene ya Babiloni. Sombi lakwe teshi akeeboneewo, nakubi boobo ulaakufwita nkomunya uko.

¹⁴ Bacinenenene bakwe abashilumamba bakwe, ndaakubapalanganishisha kumbasu shone sha cishi ca panshi. Ncakwiila ndaakubatandaanya amupeeni usomwetwe.

¹⁵ “Ndaakumana kubatandila pakati ka mishobo imwi akubapalanganishisha mushishi shimwi, ndyeshi bakeshibe ayi nebo ndi Mwaami Lesa.

¹⁶ Ndaakupulushawo bamwi baniini kuswa kunkondo, nsala akumwaalu kwaamba ayi ciindi baakunooli pakati ka mishobo imwi bakanokwiibaluka shintu shilensha bunya shoonse isho nshebakalinga kucita. Lyalo ndyeshi bakeshibe ayi nebo ndi Mwaami Lesa.”

Citondesho ca mulaluki utootutuma

¹⁷ Mpeeke Mwaami Lesa wakaŋambila ayi,

¹⁸ “Webo omuntu, kotutuma pakulya shakulya shako akubukuma ceebo ca boowa pakunwa maanshi.

¹⁹ Kuswawaawo waambile bene Isilaeli ayi, pabantu bekala muJelusalemu amucishi ca Isilaeli Mwaami Lesa Shinkusu shoonse waamba ayi, ‘Balaakunoolya shakulya shabo cakulisukama akunwa maanshi caboowa. Shintu shoonse sha mucishi cabo shilaakubwesekwa ceebo ca shintu shalunkutwe sha bantu boonse bekalaamo.

²⁰ Mandabala anene ayo aswite bantu, alaakunyonyoolwa. Aboobo cishi cilaakuba luyanga. Lyalo ndyeshi bakeshibe ayi nebo ndi Mwaami Lesa.’ ”

Kashimpi kapukite amaswi atapukite

²¹ Mpeeke Mwaami Lesa wakaŋambila ayi,

²² “Webo omuntu, Ceebonshi bene Isilaeli ncebaambila kashimpi aka kakwaamba ayi, ‘Nshiku shileenda, sombi taaku cili anga nciloto cicitika cancinencine?’

²³ Ono baambile ayi nebo neMwaami Lesa Shinkusu shoonse ndaamba ayi, ‘Nebo ntooyanda kumanisha kashimpi aka. Ncakwiila teshi bakakaambewo tubili mucishi ca Isilaeli.’ Ubalwiite ayi, ‘Bulya ciindi cili pafwaafwi cakwaamba ayi shoonse shakaambwa ndyeshi shikacitike.’

²⁴ “Lyalo pabene Isilaeli teshi pakabeewo tubili shili anga nshiloto shabubeshi ashabulaluki shakucenjeeka pabene Isilaeli.

²⁵ Mukwiinga nebo nemwiine neMwaami Lesa ndimeshi nkanokwaamba alimwi isho nsheshi nkanokwaamba shilaakunoocitika cakutasowaawo ciindi, sobwe. Munshiku shanu mwebo nobamumushobo waashu, ndaakucita kulila coonse ico nceendakaamba. Nebo neMwaami Lesa Shinkusu shoonse ndaamba.”

²⁶ Mpeeke Mwaami Lesa wakaŋambila ayi,

²⁷ “Webo omuntu, mushobo wa bene Isilaeli utokwaamba ayi, ‘Shili anga nshiloto nshaabona teshi shikacitike coonoono alimwi nshaalaluka nsheesho sheshi shikacitike kalekale.’

²⁸ Paceebo ceeci baambile ayi nebo neMwaami Lesa Shinkusu shoonse ndaamba ayi, ‘Taaku maswi angu eshi akanoocelwa kucitika. Shoonse nshendakaamba shilaakucitika. Nebo neMwaami Lesa Shinkusu shoonse ndaamba.’ ”