Esekelo 11 - Baibo Busansulushi Bwa Libuku Ili

Mwaami Lesa mbwaakoombolosha bene Jelusalemu

¹ Mpeeke Mushimu wakwe Lesa wakanyamuna akuntola kumwinjililo wa Ŋanda ya Mwaami Lesa wakalinga kulangite kwicwe. Ono kumulyango wa mwinjililo kwakalinga basankwa bali 25. Pakati kabo ndakabonawo Jaasaniya mwanaakwe Asuli alimwi aPelatiya mwanaakwe Benaya abo bakalinga bamatanjilili ba bantu.

² Mpomunyaawo Mwaami Lesa wakaŋambila ayi, “Webo omuntu, aba mbobantu bapinga kucita bubi akupanda bantu maano abiibi mundabala ino.

³ Balo balaamba ayi, ‘Sa te onoonobo nciindi cakuyaka maanda? Ndabala ino ili anga ninongo yakutelekaamo, ono swebo tuli nyama! Nakubi boobo ilatutabilila kuswa kumulilo.’

⁴ Paceebo ceeco, webo omuntu, balalukile mapensho bantu aba.”

⁵ Mpomunyaawo Mushimu wa Mwaami Lesa wakanselukila akuntuma kulwiita bantu maswi akwaamba ayi, “Mwaami Lesa waamba ayi ‘Nobene Isilaeli mwebo ndishishi nshemutokwaamba alimwi amiyeeyo yanu yoonse ndiibwene.

⁶ Mwebo mwakacaya bantu baanji muno mundabala akwisusha mikwakwa yoonse amituntu ya bantu.’

⁷ “Paceebo ceeco, Mwaami Lesa waamba ayi, ‘Mituntu ya bantu iyo njemwakasoweelaamo yaba njenyama, ayalo ndabala ino njenongo, sombi mwebo ndaakumutandaamo.

⁸ Mwebo mulaloonda nkondo, ono nkondo yeenka iyo njeshi nkamuletele. Nebo neMwaami Lesa Shinkusu shoonse ndaamba.

⁹ Ndaakumutandaanya mundabala akumwaaba mumaansa a baswamashi alimwi akumupa mulandu.

¹⁰ Mulaakufwa kunkondo mweenka mucishi canu. Lyalo ndyeshi mukeshibe ayi nebo ndi Mwaami Lesa.

¹¹ Ono ndabala ino teshi ikamutabilileewo bweenka bucita nongo kunyama ili muli njiyo. Sombi ndaakumupa mulandu mweenka mucishi canu ca Isilaeli.

¹² Lyalo ndyeshi mukeshibe ayi nebo ndi Mwaami Lesa. Ndaakucita boobo ceebo tamukwe kukonkela milasho nabi kulama milawo yangu, sombi mwakakonkela milawo ya mishobo imushingulukite.’ ”

¹³ Ono nebo kaancilaluka, Pelatiya mwanaakwe Benaya wakawa akufwa. Lyalo ndakaliwaala panshi akushisha ciwa panshi alimwi akoolobesha ayi, “Sobwe nobaami baLesa Beshinkusu shoonse! Sa mutooyanda kucaya boonse bakacaalaawo pabene Isilaeli?”

Kushomesha kwakwe Lesa kubaabo bakatolwa mubusha

¹⁴ Ono Mwaami Lesa wakaŋambila ayi,

¹⁵ “Webo omuntu, bantu bali muJelusalemu batokwaamba pali ndiwe abene Isilaelinyoko abo bali mubusha pantu pomwi awebo. Batokwaamba ayi, ‘Bantu abo bali kulaale abuumbi kwaamba ayi balambile Mwaami Lesa. Anu cishi cino Mwaami Lesa watupa ayi ncesubo sweenka.’

¹⁶ “Paceebo ceeco ubalwiite ayi nebo neMwaami Lesa Shinkusu shoonse ndaamba ayi, ‘Nakubi kwaamba ayi ndakamutandila pakati ka mishobo imwi kulaale akumupalanganishisha mushishi shimwi, kwaciindi ciniini ndalinga kumufunaako mushishi umo momwakaya.’

¹⁷ “Paceebo ceeco ubalwiite ayi nebo neMwaami Lesa Shinkusu shoonse ndaamba ayi, ‘Ndaakumubunganya kuswa pakati ka mishobo ya mucishi ca panshi coonse iyo njendakamupalanganishishaako. Ndaakuboosha cishi ca Isilaeli mumaansaanu.’

¹⁸ “Balaakuboolela mucishi cabo, bakakusheemo shikoshanyo shoonse shifundoosha kumoyo shiliimo alimwi ashibumbwabumbwa shilensha bunya.

¹⁹ Ndaakubapa myoyo ipya alimwi atulango tupya. Ndaakukusha myoyo yabo iyumu anga ngamabwe akubapa myoyo inyumfwila ndime.

²⁰ Lyalo balaakukonkela milasho yangu alimwi akunyumfwila milawo yangu cakushomeka. Balaakuba bantu bangu, anebo ndaakuba Lesa wabo.

²¹ Sombi abo balyaabite mukulambila shikoshanyo shifundoosha kumoyo ashibumbwabumbwa shilensha bunya, ndaakubapa mulandu kweelana anshebakacita. Nebo neMwaami Lesa Shinkusu shoonse ndaamba.”

Bulemu bwakwe Lesa mbobwakashiya ndabala ya Jelusalemu

²² Mpomunyaawo bakelebu bakafungulula mapapaminwa abo akutalika kuuluka aalo mawilo akayaabo. Mumuni utowa uyo utondesha bulemu bwakwe Lesa wa bene Isilaeli walo wakalingabo peculu lyabo.

²³ Kuswawaawo mumuni utowa uyo wakanyamuka kuswa mundabala akuya mukwikalila peculu lya tulundu tuli kwicwe lwa njiyo.

²⁴ Lyalo mucili anga nciloto ico, Mushimu wakwe Lesa wakanyamuna akumboosha kubaabo bakatolwa mubusha bakalinga kuBabiloni. Pesule cili anga nciloto ico cakashimingana.

²⁵ Mpeeke ndakaambila baabo bakatolwa mubusha shoonse shakaŋambila Mwaami Lesa.