Dutolonomi 9 - Baibo Busansulushi Bwa Libuku Ili

Kutashomeka kwa bantu

¹ “Ono amukutike mwebo nobene Isilaeli. Muli pafwaafwi kusubuka Mulonga wa Joodani ayi mubwese cishi ca mishobo inene icite nkusu kwiinda ndimwe. Mandabala abo nganene alimwi alishitilishitwe alubumbu lulaamfu abuumbi.

² Bantu baliimo mbalaamfu alimwi mbeshinkusu. Bantu abo mbamulunyungu lwakwe Anaki. Mwakanyumfwaawo kacaambwa ayi, ‘Anu ngani weenga walwana abamulunyungu lwakwe Anaki?’

³ Ono sunu nobeene mutoobona Mwaami Lesa, Lesa wanu utoomutanjilila abukali buli anga ngumulilo utoobilima. Unanooya cibakoma kunembo lyanu mwaakunooya, kwaamba ayi mukabatandeemo akubanyonyoola cakufwambaana mbuli mbwaakashomesha.

⁴ “Mwaami Lesa aakumana kumutandilaamo bantu abo, mutakaambi ayi, ‘Wakatuleta mucishi ici mukwiinga ndiswe tweeleteemo,’ sobwe. Mwaami Lesa ulaakubatandaamo ceebo mbamucita shibi.

⁵ Teshi kwaamba ayi muli bantu kabotu alimwi mulacita shiluleme Mwaami Lesa ncaatoomusuminishila kubwesa cishi cabo. Ulaakubatandaamo ceebo mbamucita shibi alimwi ceebo ulisuni kulama cipangano ncaakashomesha bamashali banu bakulukulu, nkokwaamba ayi Abulaamu, Isaki alimwi aJakobo.

⁶ Anu mwishibe ayi Mwaami Lesa taatoomupa cishi cibotu ici ceebo cakwaamba ayi cilimweelete, sobwe. Kwaambabo lushinisho mwebo muli bantu beshicimpamya.

⁷ “Kuteelesha kuluba mbomwakalengesha Mwaami Lesa kukalala muluyanga. Kuswabo bushiku mbomwakaswa mucishi ca Ijipiti kushikila abushiku mbomwakashika waano mwakalinga kumwaalookila.

⁸ PaKalundu ka Sinayi apalo mwakakalasha Mwaami Lesa cakwaamba ayi wakalinga kuyanda kumunyonyoola.

⁹ Ndindakatanta peculu lya kalundu kwaamba ayi ntambule mabwe obilo apampamene, apo pakalinga kulembetwe cipangano ico Mwaami Lesa ncaakapanga amwebo, ndakekala apo nshiku makumi one cakutalya nabi kunwaawo cimwi cintu.

¹⁰ Lyalo Mwaami Lesa wakampa mabwe obilo apampamene apo mpwaakalemba milawo alyaansa lyakwe, iyo njaakaamba mumulilo ndimwakalinga kubungene kukalundu kulya.

¹¹ Ee, nshiiku makumi one ndishakeenda Mwaami Lesa wakampa mabwe obilo apo mpaakalemba cipangano.

¹² “Mpeeke Mwaami Lesa wakandwiita ayi, ‘Seluka! Eendesha mukwiinga bantu bako mbowakatanjilila kuswa muIjipiti babica. Bacileka kale kucita shintu nshendakabaambila alimwi balipangila cibumbwabumbwa.’

¹³ “Mwaami Lesa wakandwiita alimwi ayi ‘Ndishi bantu aba mbobabete, mbeshicimpamya.

¹⁴ Ono bulya uteeleshi kunkasha. Ntooyeeya kubanyonyoola kwaamba ayi kukabule aubeebaluka alimwi. Lyalo ndaakulengesha ayi webo ube mushali wa mushobo unene alimwi ucite nkusu kwiinda wa baaba.’

¹⁵ “Aboobo ndakapiluluka akuseluka pakalundu, kaanjumwite mabwe obilo apampamene apo pakalinga kulembetwe cipangano. Mulilo wakalinga kubwenekete koobilima pakalundu.

¹⁶ Ndakabona kwaamba ayi mwabishisha Mwaami Lesa kwiinda mukulipangila cibumbwabumbwa ca nshimbi cakalinga kuboneka anga ngumucende mwaana. Ncakwiila munshila iyo mwakacileka kukonkela milawo yakamupa Mwaami Lesa.

¹⁷ Aboobo ndakawaala mabwe panshi kunembo lyanu akwaapwaya.

¹⁸ Ono alimwi ndakafubama pameenso aMwaami Lesa kwanshiku makumi one cakutalya nabibo kaanshi. Ndakacita boobo ceebo mwakabishisha akukalasha Mwaami Lesa.

¹⁹ Ndakalinga kuloonda bukali bwa Mwaami Lesa buyoosha mukwiinga wakalinga wakalala cakuyanda kumunyonyoola. Nacibi boobo Mwaami Lesa wakanyumfwa kusenga kwangu alimwi.

²⁰ Mwaami Lesa wakalinga wakalalila aAloni cakuyanda kumucaya, sombi ndakamupailila paciindi ceenka ico.

²¹ Ndakabwesa cintu ca bubi cilya ncemwakalinga mwapanga, ico cakalinga kuboneka anga ngumucende mwaana, akuciwaala mumulilo. Mpeeke ndakacipwayoola akucipela kuba busu. Lyalo ndakawaala busu ubo mukalonga ako kakalinga kukunka kuswa mukalundu.

²² “Mwebo, Mwaami Lesa, Lesa wanu mwakamukalasha alimwi ndimwakalinga kuTabela, kuMasa alimwi akuKibuloti Ataafa.

²³ KuKadeshi Baniya akwalo ndyaakamutuma ayi muye mubwese cishi ncaakamupa, mwebo mwakamwaalookila mukubula kumushoma nabi kumunyumfwila.

²⁴ Kuswabo paciindi ndindakamwishiba mulibo beshikwaalookila Mwaami Lesa.

²⁵ “Aboobo ndakafubama pameenso aMwaami Lesa nshiiku makumi one mukwiinga ndakalinga kwishi ayi wakalinga kushinishite kumunyonyoola.

²⁶ Mpeeke ndakapaila ayi, ‘NoBaami baLesa Beshinkusu shoonse, mutanyonyooli bantu banu nobeene, abo mbomwakafuna kuswa muIjipiti munkusu shanu shinene.

²⁷ Amwiibaluke musebenshi wanu Abulaamu, Isaki alimwi aJakobo. Lyalo musuule bushicimpamya, bubi alimwi ashibiibi sha bantu aba.

²⁸ Mwabula kucita boobo bene Ijipiti inga baamba ayi mwaalilwa kushisha bantu mucishi ncemwakabashomesha. Balaakwaamba ayi mwakakusha bantu muIjipiti ayi mubacaaye ceebo mwakalinga kubapatite.

²⁹ Nakubi boobo aba mbobantu mbomwakasala nobeene kuba baanu alimwi mbomwakakusha muIjipiti kwiinda munkusu shanu shinene.’