Dutolonomi 7 - Baibo Busansulushi Bwa Libuku Ili

Bantu ba Mwaami Lesa

¹ “Ono Mwaami Lesa, Lesa wanu ulaakumutola mucishi ico nceshi mukabwese alimwi ulaakutandaanya mishobo yosanwe ayobilo icite nkusu kwiinda ndimwe iliimo, nkokwaamba ayi bene Iti, bene Gegashi, bene Amoli, bene Kenani, bene Pelisi, bene Ifi alimwi abene Jebusi.

² Na Mwaami Lesa, Lesa wanu akaabe bantu aba mumaansa anu alimwi mukabakoome mulyeelete kubacaya boonse. Kutapanga cipangano ambabo alimwi kutabanyumfwila nkumbu.

³ Kuteebaawo nabi womwi pakati kabo alimwi kutasuminisha bana banu kweeba nabi kweebeshekwa pakati kabo.

⁴ Mukwiinga inga batanjilila bana banu kuswa kuMwaami Lesa, Lesa wanu kwaamba ayi balambile balesa bamwi. Na ico cikacitike mulaakukalasha Mwaami Lesa. Paceebo ceeco ulaakumunyonyoola noonse cakufwambaana.

⁵ Sombi mukamwaaye shipaililo shabo, mukanyonyoole mabwe ngobakeemika pamisena yakulambilaawo alimwi akutimboola shikoshanyo shakwe Ashela, lesa wabo mwanakashi wakubesa akutenta shibumbwabumbwa shabo.

⁶ Mukacite boobo ceebo muli bantu ba Mwaami Lesa, Lesa wanu, alimwi mulisalalite. Mwaami Lesa wakamusala ayi mube bantu bakwe kuswa pakati ka mishobo imwi yoonse ili pacishi ca panshi ipusenepusene.

⁷ “Mwaami Lesa taakwe kumusala ceebo cakwaamba ayi mwakafula kwiinda mishobo imwi yoonse. Mwebo mwakalinga baniini abuumbi kwiinda mishobo imwi yoonse pacishi ca panshi.

⁸ Sombi Mwaami Lesa wakamusuna akuyanda kucita kweelana ambwaakashomesha cakulumbila kubamashali banu bakulukulu. Nceceeco ncaakamupulushisha kwiinda munkusu shakwe shinene akumwaangulula kuswa munkusu shakwe Falawo mwaami wa cishi ca busha ca Ijipiti.

⁹ Amwiibaluke kwaamba ayi Mwaami Lesa, Lesa wanu ngoLesa eenkabo alimwi ulashomeka. Ulaakubamba cipangano cakwe akutondesha lusuno lwakwe luli mushobo womwi lyoonse kushikila akumashalane ali cuulu abantu bamusuni alimwi bakonkela milawo yakwe.

¹⁰ Sombi boonse balwani bakwe ulaakubapa mulandu kwiinda mukubanyonyoola. Teshi akabalekebo napaceyi.

¹¹ Anu mubikeeko maano kukonkela milawo amilasho yoonse njendamupa sunu.

Shoolwe shili mukunyumfwila

¹² “Na munyumfwe akukukonkela milawo iyi cakushomeka, Mwaami Lesa wanu ulaakutolelela kulama cipangano cakwe amwebo alimwi ulaakumutondesha lusuno lwakwe ulo lubabo mushobo womwi lyoonse, bweenka mbwaakashomesha bamashali banu bakulukulu.

¹³ Ulaakumusuna akumupa coolwe cakwaamba ayi mulaakufula akuba abaana baanji. Ulaakupa coolwe myuunda yanu, cakwaamba ayi mulaakuba ashili anga ngamaila, waini alimwi amafuta a olifi. Ulaakumupa coolwe alimwi kwiinda mukumupa ŋombe alimwi ambelele shiinji. Shoolwe shoonse ishi ulaakumupeta mucishi ico ncaakashomesha bamashali banu bakulukulu ayi ulaakumupa.

¹⁴ Taaku bantu mucishi ca panshi coonse beshi bakapekwe shoolwe shiinji anga ndimwe. Bamumaandaanu balaakufula ashalo shifubwa shanu shilaakufula.

¹⁵ Mwaami Lesa ulaakumufuna kumalwashi oonse. Teshi akaleke malwashi ayoosha alya ngomwakabonaawo muIjipiti ayi ese pali ndimwe, sombi ulaakwaanyukwita pabalwani banu boonse.

¹⁶ Mukanyonyoole mishobo ili yoonse Mwaami Lesa njeshi akaabe mumaansa anu. Mutakabanyumfwili nkumbu alimwi mutakalambili balesa babo, ceebo ico inga camucaisha.

¹⁷ “Ono cimwi ciindi inga mwaamba ayi bantu aba mbaanji kwiinda ndiswe alimwi tatubakoonshi kubatandaamo.

¹⁸ Kutabaloonda. Amwiibaluke Mwaami Lesa, Lesa wanu mbwaakacita kuli Falawo, mwaami wa Ijipiti abantu bakwe boonse.

¹⁹ Amwiibaluke myaalu iyoosha iyo njemwakabona ameenso anu nobeene. Amwiibaluke ashaankamiko, shitondesho shankusu alimwi ankusu shinene isho Mwaami Lesa, Lesa wanu nshaakasebensesha ayi amwaangulule. Mwaami Lesa ulaakunyonyoola mishobo iyo njemutooloonda bulya bweenka mbwaakacita kubene Ijipiti.

²⁰ Ulaakulengesha bantu aba kupilingana kuboowa alimwi ulaakunyonyoola abo beshi bakayube.

²¹ Aboobo mutabaloondi, Mwaami Lesa, Lesa wanu uli amwebo. NguLesa wiindaawo alimwi weelete kuloondwa.

²² Mwaami Lesa, Lesa wanu ulaakutanda mishobo iyo kuswa kunembo lyanu paniininiini. Teshi mukasuminishikwe kunyonyoola yoonse paciindi comwi ceebo banyama bamuluundu inga bamufulila cakumulengesha boowa.

²³ Mwaami Lesa ulaakunookwaaba balwani mumaansa anu akubafulunganya mano kushikila boonse banyonyoolwa.

²⁴ Ulaakwaaba bamaami babo mumaansa anu. Mulaakubacaya alimwi akulobya meenaabo. Taaku eshi akakonshe kumukoma. Ncakwiila mulaakubanyonyoola boonse.

²⁵ Shibumbwabumbwa shabo mukashiteente. Tamweelete kukumbwa silifa agolodi ili pali nshisho alimwi tamweelete kwiibwesa. Na mukacite boobo cilaakumucaisha. Mukwiinga bantu balambila shibumbwabumbwa, balalensha bunya Mwaami Lesa, Lesa wanu.

²⁶ Kutaleta cibumbwabumbwa nabi comwi muŋanda yanu mukwiinga lishingo lyeenka lili pali nshisho inga lyaba apali ndimwe. Mulyeelete kushipata akushisebaanya mukwiinga Mwaami Lesa wakashishingana.