Dutolonomi 6 - Baibo Busansulushi Bwa Libuku Ili

Mulawo unene

¹ “Iyi njemilawo amilasho iyo Mwaami Lesa, Lesa wanu njaakandwiita ayi mwiishe. Mukanooikonkela mucishi ico ncemuli pafwaafwi kwinjila akubwesa.

² Kulilabo kamucili boomi mwebo abamulunyungu lwanu mulyeelete kulemeka Mwaami Lesa, Lesa wanu akukonkela milasho amilawo yakwe yoonse njeentoomupa, kwaamba ayi mukekaale mucishi ico kwa ciindi cilaamfu.

³ Nobene Isilaeli, amwiikutike alimwi munooikonkela! Lyalo shintu shoonse shinanoomweendela kabotu alimwi mulaakuba mushobo unene akwikala mucishi ca bulongo bubotu, bweenka bwakashomesha Mwaami Lesa, Lesa wa bamashali banu bakulukulu.

⁴ “Amunyumfwe mwebo nobene Isilaeli! Mwaami Lesa, Lesa wesu ngoMwaami eenkabo!

⁵ Suna Mwaami Lesa, Lesa wako amoyo wako woonse, abuumi bwako boonse alimwi ankusu shako shoonse.

⁶ Kutaluba milawo iyi njeentoomupa sunu.

⁷ Amuyiishe bana banu. Kamwiindulukaamo ndyemuli kumishaanu nabi kumwibo, pakookesha nabi pakusebensa.

⁸ Amuyaange pamikono yanu alimwi mwiifwaale pankumo ayi nciibalusho.

⁹ Mwiileembe peculu pamilyango ya maanda anu apaminjililo.

Kucenjesha pabantu batanyumfwili

¹⁰ “Bweenka Mwaami Lesa wanu mbwaakalasha bamashali banu bakulukulu, nkokwaamba ayi Abulaamu, Isaki alimwi aJakobo, ulaakumupa mandabala anene asumpukite ayo mwebo ngomutakwe kuyakaako.

¹¹ Maanda alaakunooswitebo shintu shiinji shibotu nshemutakwe kubikaamo mwebo. Mulaakuba amikalo ikabitwe kale, myuunda ya minyansa aya maolifi mwebo njemutakwe kulima. Ono Mwaami Lesa aakumwinjisha mucishi ico, umo mweshi mukabe ashoonse nshemusuni kulya,

¹² mukacenjele kwaamba ayi mutakalubi Mwaami Lesa uyo wakamufuna mucishi ca Ijipiti, umo mumwakalinga basha.

¹³ Mukanoolemeka Mwaami Lesa, Lesa wanu. Mukanoolambilabo nguwe eenka akunooshomesha shintu cakulumbila muliina lyakwe.

¹⁴ Mutalambili balesa bamwi, abo ba bantu bamushingulukite kuno.

¹⁵ Na mukalambile balesa bamwi, bukali bwa Mwaami Lesa bulaakwisa pali ndimwe mbuli mulilo akumunyonyoola noonse cakumaninina mukwiinga Mwaami Lesa, Lesa wanu uyo ngomuli akwe ngushibusuba kubaabo balambila balesa bamwi.

¹⁶ “Mutasunki Mwaami Lesa, Lesa wanu mbuli mbomwakacita kuMasa.

¹⁷ Mulyeelete kushinisha kwaamba ayi mulaakunookonkela milawo amilasho yoonse njaamupa.

¹⁸ Amucite cintu Mwaami Lesa ncaamba ayi cililuleme alimwi ncibotu. Lyalo shintu shoonse shinanoomweendelabo kabotu. Mulaakukonsha kubwesa cishi ca bulongo bubotu ico Mwaami Lesa ncaakashomesha bamashali banu bakulukulu,

¹⁹ alimwi mulaakutandaanyamo balwani banu kweelana ambwaakalasha.

²⁰ “Muciindi citoosa bana banu balaakumwiipusha ayi, ‘Nceebonshi Mwaami Lesa, Lesa wesu ncaakatwaambilila kukonkela milawo amilasho yoonse iyi?’

²¹ Mwebo mukakumbule ayi, ‘Twakalinga basha bakwe Falawo, mwaami wa cishi ca Ijipiti. Ono Mwaami Lesa wakatufuna kwiinda munkusu shakwe shinene.

²² Twakabona ameenso esu, Mwaami Lesa kaacita shaankamiko ashintu shimwi shiyoosha kubene Ijipiti bamwi boonse, mwaami wabo alimwi abacinenenene bakwe boonse.

²³ Wakatwaangulula akutuleta kokuno kwaamba ayi atupe cishi cino kweelana ambwaakashomesha bamashali besu bakulukulu.

²⁴ Lyalo Mwaami Lesa, Lesa wesu wakatwaambila kukonkela milawo iyi yoonse akumulemeka. Na tunoocita boobo, unanootulama lyoonse akunootulengesha kusumpuka kweelana ambwaatoocita cino ciindi.

²⁵ Na twakonkela cakushomeka shintu shoonse shaakatwaambila ayi tukonkele, tulaakumusangalasha.’