Dutolonomi 5 - Baibo Busansulushi Bwa Libuku Ili

Milawo ili likumi

¹ Mose wakabunganya bene Isilaeli boonse akubaambila ayi, “Nobene Isilaeli, amukutike kumilawo amilasho yoonse njeentoomupa sunu. Muyiiye akwiikonkela cakushinisha.

² PaKalundu ka Sinayi Mwaami Lesa, Lesa wesu wakapanga cipangano,

³ kuteshibo abamashali besu bakulukulu beenka, sombi aswebo soonse sotuli boomi sunu.

⁴ Pakalundu palya Mwaami Lesa wakabandika kuli ndimwe mulomo amulomo mumulilo.

⁵ Paciindi ico ndakeemikana pakati kanu aMwaami Lesa kwaamba ayi noomulwiita maswi akwe mukwiinga mwakalinga kuloonda mulilo. Aboobo tamukwe kukonsha kutanta peculu lya kalundu. “Mpeeke Mwaami Lesa wakaamba ayi,

⁶ ‘Ndime Mwaami Lesa, Lesa wanu nendakamukusha mucishi ca Ijipiti umo momwakalinga basha.

⁷ “ ‘Utalambili Lesa aumwi, sombibo ndime.

⁸ “ ‘Utalipangili shibumbwabumbwa shikoshanya ashintu sha kwiculu, mucishi ca panshi, nabi shili mumaanshi panshi lya cishi.

⁹ Utafukamini cibumbwabumbwa cili coonse nabi kucilambila, mukwiinga nebo neMwaami Lesa, Lesa wanu, ndi shibusuba. Ndapa mulandu bantu abo bampatite, alimwi akubamulunyungu lwabo, kushikila akulishalane lyatatu alimwi alyane.

¹⁰ Sombi ndabonesha lusuno lwangu kushuulu ashuulu sha baabo bansuni akukonkela milawo yangu.

¹¹ “ ‘Utasebenseshi liina lyangu mushintu shitaluleme, mukwiinga nebo neMwaami Lesa, Lesa wanu ndaakupa mulandu muntu woonse weshi akabule kusebensesha kabotu liina lyangu.

¹² “ ‘Ingashila bushiku bwangu bwakookesha bwa Cibelu alimwi akubusalasha kweelana ambondakaamba nebo neMwaami Lesa, Lesa wanu.

¹³ Ulicite nshiku shosanwe abomwi nsheweelete kusebensa milimo yako,

¹⁴ Sombi bushiku bwasanu ashobilo, mbushiku bwangu ubo mboweelete kookesha. Taaku muntu weelete kusebensa pabushiku ubo, webo, bana bako, basha bako, shifubwa shako nabi baswamashi bekala mucishi cako. Basha banu balyeelete kookesha bweenka mbuli ndimwe.

¹⁵ Amwiibaluke ayi mwakalinga basha mucishi ca Ijipiti alimwi ayi nebo neMwaami Lesa, Lesa wanu ndakamufuna kwiinda munkusu shangu shinene. Nceceeco ncendamwaambilila ayi mulame bushiku bwakookesha bwa Cibelu.

¹⁶ “ ‘Lemeka baiso abanyoko kweelana ambondakaamba nebo neMwaami Lesa, Lesa wanu ayi shintu shoonse shikakweendele kabotu alimwi ayi ukekale nshiku shiinji mucishi ico nebo neMwaami Lesa nceshi nkakupe.

¹⁷ “ ‘Utacaayi muntu, sobwe.

¹⁸ “ ‘Utaciti bulale.

¹⁹ “ ‘Uteepi.

²⁰ “ ‘Utabekeshi shikamukobonyoko.

²¹ “ ‘Utakumbwi mukamwiine camunyono. Utakumbwi camunyono ŋanda ya shikamukobonyoko, muunda wakwe, musha wakwe musankwa nabi mwanakashi, ŋombe shakwe, mbongolo shakwe nabi shintu shakwe shimwi.’

²² “Iyi njemilawo Mwaami Lesa njaakamupa mwebo noonse ndimwakalinga kubungene kukalundu. Ono ndyaakaamba aliswi lya peculu kuswa mumulilo amakumbi ashiya mbi, wakapabo milawo yeenka iyi cakuteendilishaawo aimwi. Lyalo wakeelemba pamabwe obilo apampamene akwaapa ndime.

Bantu mbobakaba boowa

²³ “Kalundu koonse ndikakaba mumulilo alimwi ndimwakanyumfwa liswi kuswa mumunshinshe, bamatanjilili banu abamaloba ba mikowa yanu bakesa kuli ndime

²⁴ akwaamba ayi, ‘Mwaami Lesa, Lesa wesu watutondesha nkusu shakwe shinene abulemu bwakwe ndyaakaamba aswebo kuswa mumulilo! Sunu twaboona ayi cilakonsheka muntu kunoocili muumi nabi na Lesa waamba anguwe.

²⁵ Ono tufwitenshi? Mulilo ulya utootunyonyoola. Na Mwaami Lesa, Lesa wesu aambe aswebo alimwi, tutoofwa.

²⁶ Sa kuliiwo muntu wakacaala kaali muumi na wamana kunyumfwa Lesa muumi kaamba kuli nguwe mumulilo?

²⁷ Boolela webo Mose uye unyumfwe shoonse Mwaami Lesa, Lesa wesu nsheshi aambe. Wamana uboole use utulwiite sheshi aambe. Tulaakukutika akukonkela.’

²⁸ “Mwaami Lesa ndyaakanyumfwa cikani ici, wakaamba ayi, ‘Ndanyuumfwa bantu aba mbobaamba. Shoonse nshebaamba shilibo kabotu.

²⁹ Na lyoonse banooyeeya bobulya alimwi kabandemeka akukonkela milawo yangu yoonse, shintu shoonse inga kashibeendela kabotu pantu pomwi abamulunyungu lwabo, lyoonse alyoonse.

³⁰ Koya ubaambile ayi baye kumisumba yabo.

³¹ Sombi webo Mose unooshiite anebo kuno. Ntookulwiita milawo amilasho yangu yoonse. Ukeeishe bantu kwaamba ayi bakanooikonkela mucishi ico nceshi nkabape.’

³² “Nobene Isilaeli amushinishe kwaamba ayi mulaakunookonkela shoonse Mwaami Lesa, Lesa wanu nsheshi amulwiite ayi mucite. Mutakasuuli mulawo wakwe uli woonse.

³³ Mukeekonkele yoonse kwaamba ayi shintu shinoomweendela kabotu, alimwi kwaamba ayi mutolelele kunooli boomi mucishi ico ncemutooya mukubwesa.