Dutolonomi 4 - Baibo Busansulushi Bwa Libuku Ili

Mose mbwaakasengesha bene Isilaeli ayi banoonyumfwila

¹ Lyalo Mose wakaambila bantu ayi, “Kamukonkela milawo yoonse iyo njentoomwiisha, mulaakuba abuumi alimwi mulaakwikala mucishi ico ncaatoomupa Mwaami Lesa, Lesa wa bamashali banu bakulukulu.

² Kutanungaawo nabi kukushaawo pamilawo njeentoomupa. Amukonkele milawo ya Mwaami Lesa, Lesa wanu yoonse njendamwaambila.

³ Mwebo nobeene mwakabona cakacita Mwaami Lesa paKalundu ka Peyo. Wakanyonyoola woonse wakalambila lesa wa kuPeyo wiitwa ayi Baali.

⁴ Sombi mwebo nobamwi nomwakalinga kushomeka kuMwaami Lesa, Lesa wanu mucili boomi asunu.

⁵ “Ndamwiisha milasho amilawo yoonse, bweenka Mwaami Lesa mbwaakandwiita ayi ncite. Mukanooikonkela mucishi ico ncemuli pafwaafwi kulwana akucibwesa.

⁶ Amukeekonkele cakushomeka. Ico cilaakutondesha mishobo imwi busongo mbomucite akunyumfwishisha kwa shintu shoonse. Na bakanyumfwe milawo iyi, balaakwaamba ayi, ‘Mushobo uyu ngunene ulicite busongo bunene akunyumfwishisha kwa shintu shoonse!’

⁷ “Taaku mushobo aumwi nabi ngunene buyani, ucite lesa uli pafwaafwi bobulya paciindi coonse nceenga kamumusuni mbuli Mwaami Lesa, Lesa wesu. Ulatucafwa munshila shili shoonse kulilabo twamusenga.

⁸ Taaku mushobo umwi ucite milasho amilawo iluleme anga njeeyi njindamwiisha sunu.

⁹ Amucenjele! Amushinishe ayi teshi mukaluube kulilabo kamucili boomi, isho nshemwakabona ameenso anu nobeene. Mukaambileeko bana banu abashikulu banu

¹⁰ shabushiku ndimwakeemikana kunembo lya Mwaami Lesa, Lesa wanu paKalundu ka Sinayi palya ndyaakaambila ndime ayi, ‘Bunganya bantu abo. Ndisuni ayi banyumfwe mbweshi ŋambe kwaamba ayi beeye kunyumfwila kulilabo kabacili boomi alimwi ayi bakeeishe abana babo kucita bweenka ubo.’

¹¹ “Mukabaambile mbuli mbomwakaya mukwiimikana munshaaKalundu ako kakalinga kufweketwe amakumbi ashiya mbi, alimwi amulilo kaubilima abuumbi cakushika mwiculu mwiine.

¹² Mukabalwiite mbuli Mwaami Lesa mbomwakanyumfwa kaamba kuswa mumulilo. Mwakanyumfwa kaamba, sombi tamukwe kumubonaawo.

¹³ Wakamulwiita ncemweelete kucita mukulama cipangano ncaakapanga amwebo. Mulyeelete kukonkela Milawo ili Likumi iyo njaakalemba pamabwe obilo apampamene.

¹⁴ Mwaami Lesa wakandwiita ayi mwiishe milasho amilawo yoonse iyo njemweelete kukonkela mucishi ico nceshi mukasaale kwitala lya Mulonga wa Joodani akwikalaamo.

Kucenjesha pakulambila shibumbwabumbwa

¹⁵ “Mwaami Lesa ndyaakaamba amwebo kuswa mumulilo paKalundu ka Sinayi, tamukwe kubonaawo cintu cili coonse mumulilo. Ono anu amucenjele. Mutakeeleshi

¹⁶ kubisha kwiinda mukulipangila cibumbwabumbwa ca mushobo uli woonse. Nkokwaamba ayi ciboneka anga ngumusankwa nabi mwanakashi,

¹⁷ munyama nabi muyuni,

¹⁸ ntaale ashintu shimwi sha mushobo uyo, nabi inswi.

¹⁹ Mutakeeleshi kulambila nabi kusebensela cimwi ncemubona mwiculu mbuli lisuba, mweenshi, alimwi anyenyeenshi. Shintu ishi Mwaami Lesa, Lesa wanu wakashilekela bantu boonse ba mishobo imwi.

²⁰ sombi mwebo muli baabo mbwaakapulusha kuswa muIjipiti, umo mwakalingabo anga mumunyumbi. Wakamukushaamo kwaamba ayi mube bantu bakwe mwiine kweelana ambomubete bulya.

²¹ Ceebo ca ndimwe Mwaami Lesa, Lesa wanu wakankalalila akushomesha cakulumbila ayi teshi nkasubukeewo Mulonga wa Joodani akwinjila mucishi ca bulongo bubotu ico ncaatoomupa.

²² Ndaakufwita mucishi cino, teshi nkasubukeewo mulonga, sombi mwebo mulibo pafwaafwi kuusubuka kuya mukwinjila akubwesa cishi ca bulongo bubotu cilya.

²³ Mutakeeleshi kuluba cipangano ico Mwaami Lesa, Lesa wanu ncaakapanga amwebo. Amukonkele milawo yakwe kwaamba ayi mutakalipangili cibumbwabumbwa ca mushobo uli woonse.

²⁴ Mukwiinga Mwaami Lesa, Lesa wanu ngumukali anga ngumulilo utoobilima. Ngushibusuba kubaabo balambila balesa bamwi.

²⁵ “Na mukekaale ciindi cilaamfu mucishi cilya, mwaakuba abaana alimwi abashikulu, mutakabishi kwiinda mukulipangila cibumbwabumbwa mumushobo uli woonse. Ici mbubi pameenso aMwaami Lesa alimwi cilaakumukalasha.

²⁶ Ndeeta liculu acishi ca panshi kuba bakamboni sunu, kwaamba ayi na mukabule kunyumfwila, teshi mukekaale ciindi cilaamfu mucishi cili kwitala lya Joodani ico ncemuli pafwaafwi kubwesa. Sombi mulaakunyonyoolwa cakumaninina.

²⁷ Mwaami Lesa ulaakumupalanganishila mumishobo imwi umo baniinibo pakati kanu mweshi bakapulukile.

²⁸ Uko mulaakunoosebensela balesa bakupanga amaansa, mbuli balesa ba shisamu aba mabwe abo batalashi, batanyumfwi, batalyi nabi kunyumfwa bweema.

²⁹ Ono uko mulaakunoolangoola Mwaami Lesa, Lesa wanu, lyalo na mukanoomulangoola amoyo woonse alimwi abuumi bwanu boonse, mulaakumucana.

³⁰ Mwaakuba mumapensho alimwi shoonse ishi shaakucitika, lyalo mulaakupilukila kuMwaami Lesa, Lesa wanu akumunyumfwila.

³¹ Mwaami Lesa, Lesa wanu, ngushinkumbu. Teshi akamusuule nabi kumunyonyoola alimwi teshi akaluube cipangano ico lakwe mwiine ncaakapanga abamashali banu bakulukulu.

³² “Ono amuyeeye kukalekale, ciindi mwebo kamutana kushalwa, kuyabo akuciindi Lesa ndyaakalenga muntu pacishi ca panshi. Muyeeye cishi ca panshi coonse. Sa kuliiwo cintu cinene cakacitikawo kale mbuli ceeci? Sa kuliiwo muntu wakanyumfwaawo cintu ca mushobo uyu?

³³ Sa kuliiwo bantu bakanyumfwa Lesa kaamba kuswa mumulilo bakacaala kabali boomi mbuli ndimwe?

³⁴ Sa kuliiwo lesa wakayeeyaawo kuya mukubwesa bantu kuswa pakati ka mushobo umwi akubaalula kuba bantu bakwe mbuli bwakamucita Mwaami Lesa, Lesa wanu muIjipiti? Mumeenso anu wakasebensesha nkusu shakwe shinene. Wakaletela bene Ijipiti myaalu ankoondo, wakacita shaankamiko ashitondesho sha nkusu sha kwiculu alimwi akulengesha shintu shiyoosha kucitika.

³⁵ Mwaami Lesa wakamutondesha shintu shoonse ishi kumwishibisha ayi lakwebo eenka ngoLesa alimwi taaku aumwi.

³⁶ Wakamusuminisha kunyumfwa liswi lyakwe kuswa kwiculu kwaamba ayi amupe milasho, alimwi pano pacishi ca panshi wakamusuminisha kwaamba ayi mubone mulilo wakwe usalalite, akubandika kuli ndimwe mumulilo uyo.

³⁷ Ceebo ca bamashali banu bakulukulu, wakamusala alimwi kwiinda munkusu shakwe shinene wakamukusha mucishi ca Ijipiti.

³⁸ Ndimwakalinga kuya ceenda Mwaami Lesa wakalinga kutanda shishi shinene alimwi shiindaawo nkusu pali ndimwe kuswa kunembo lyanu kwaamba ayi amunjiishe akumupa cishi cabo ico cicili caanu abobulya.

³⁹ Aboobo amwiibaluke sunu alimwi mutakalubiiwo kwaamba ayi Mwaami Lesa, nguLesa kwiculu apacishi ca panshi. Taaku aumwi, sobwe.

⁴⁰ Amukonkele milawo yoonse njendamupa sunu. Lyalo shintu shoonse shilaakumweendela kabotu kushikila akubamulunyungu lwanu. Alimwi mulaakutolelela kwikala mucishi ico Mwaami Lesa, Lesa wanu ncatoomupa ayi cibe caanu muyayaya.”

Mandabala anene akulobokelaamo kwicwe lya Mulonga wa Joodani

⁴¹ Mpeeke Mose wakabika mandabala anene otatwe palubasu akalinga kwicwe lya Mulonga wa Joodani,

⁴² uko musankwa nkweenga walobokela akulifuna na wacaya muntu mumapuso uteshi mulwani wakwe. Inga walobokela kuyomwi pamandabala ayo akubula kucaikwa.

⁴³ Bamumukowa wakwe Lubeni bakapekwa ndabala inene ya Besa, mucitunta ca muluyanga. Bamumukowa wakwe Gadi bakapekwa ndabala inene ya Lamoti mucishi ca Gilyadi. Ingayi bamumukowa wakwe Manase bakapekwa ndabala ya Golani mucishi ca Bashani.

Musena uko mose nkwaakapeta bene Isilaeli milawo alimwi

⁴⁴ Mose wakapa bene Isilaeli milasho amilawo yakwe Lesa.

⁴⁵ Mose wakabapa milasho amilawo iyi ndibakaswa muIjipiti

⁴⁶ alimwi kabali muliwesa lili kwicwe lya Mulonga wa Joodani, pafwaafwi andabala ya Betipeyo. Umo mwakalinga mucishi cakalinga cakwe Sioni mwaami wa bene Amoli, uyo wakalinga kulela ndabala ya Eshiboni. Mose abene Isilaeli bamwi boonse bakakoma mwaami uyo ndibakaswa muIjipiti.

⁴⁷ Bakabwesa cishi cakwe Sioni acakwe Ogi mwaami umwi mwine Amoli, uyo wakalinga kulela ndabala ya Bashani, kwicwe lya Joodani.

⁴⁸ Cishi ico cakalinga kuswa kundabala ya Alowa, kweela lya Mulonga wa Anoni kuya mukushika akuKalundu ka Silioni ako keetwa ayi Kalundu ka Emoni.

⁴⁹ Cakalinga kubikaako amusena woonse wakalinga kwicwe lya Mulonga wa Joodani kuya mukushika akuLweenge lwa Mwiinyo kulubasu lwa kumalenge. Kuya kwicwe cakalinga kweela munshaaKalundu ka Pisiga.