Dutolonomi 34 - Baibo Busansulushi Bwa Libuku Ili

Lufu lwakwe Mose

¹ Lyalo Mose wakaswa mushinyika sha Moabu akutanta paKalundu ka Nebo, kushika apeculu peene paKalundu ka Pisiga ako kalangene andabala ya Jeliko. Nkweeke uko, Mwaami Lesa wakamubonesha cishi coonse. Nkokwaamba ayi kutalikila kucishi ca Gilyadi kushika akucishi ca Dani,

² cishi coonse ca Nafutali, Efuleemu acakwe Manase, cishi ca Juda kushika akuLweenge lwa Mediteleniyani kumbo,

³ cishi ca kumalenge lya cishi ca Juda alimwi acishi coonse citalikila kucinyika ca Jeliko, Ndabala ya Tukunka, tibili akuSowa.

⁴ Kuswawaawo Mwaami Lesa wakaambila Mose ayi, “Cilya ncecishi ncendakashomesha Abulaamu, Isaki aJakobo ayi ndaakupa bamulunyungu lwabo. Ndakubonesha, sombi teshi ukalyateemo napaceyi.”

⁵ Aboobo Mose musebenshi wa Mwaami Lesa wakafwa mucishi ca Moabu kweelana abwakaamba Mwaami Lesa.

⁶ Mpeeke Mwaami Lesa wakamufukila mucinyika ca Moabu ico cilangene andabala ya Betipeyo. Sombi kushikila asunu, taaku muntu ushi pali cuumbwe cakwe Mose.

⁷ Mose wakafwa kaacite myaaka ili 120. Nacibi boobo wakalinga kunoocilashabo kabotu alimwi kaacicitebo nkusu.

⁸ Bene Isilaeli bakamulila kwanshiku shili makumi otatwe mushinyika sha Moabu.

⁹ Ono Joshuwa mwanaakwe Nani wakesushikwa busongo mukwiinga Mose wakabika maansaakwe pali nguwe. Paceebo ceeci bene Isilaeli bakalinga kumunyumfwila akunoocita shoonse Mwaami Lesa nshaakalwiita Mose.

¹⁰ Kuswabo ceeco ciindi, takuna kubawo kale mulaluki mucishi ca Isilaeli uli anga nguMose, uyo Mwaami Lesa ngwaakalinga kubandikaakwe mulomo amulomo.

¹¹ Taaku mulaluki nabi womwi wakacitaawo kale shaankamiko ashitondesho sha nkusu sha kwiculu shili mbuli sheesho Mwaami Lesa nshaakatuma Mose ayi akacite muIjipiti kumwaami Falawo, kubacinenenene bakwe alimwi amucishi cakwe coonse.

¹² Ncakwiila taaku muntu nabi womwi uyo wakacitawo kale shintu sha nkusu shiyoosha mbuli sheesho Mose nshaakacita pameenso abene Isilaeli.