Dutolonomi 33 - Baibo Busansulushi Bwa Libuku Ili

Mose mbwaakapa mikowa yabene Isilaeli coolwe

¹ Mose, muntu wakwe Lesa, wakapa bene Isilaeli shoolwe ishi kaatana kufwa.

² Wakaamba ayi, “Mwaami Lesa wakaswa kuKalundu ka Sinayi. Wakaboneka anga ndisuba kuEdomu akumunikila bantu bakwe kuswa kuKalundu ka Palani. Wakesa abaanjelo bali shuulu likumi, kululyo lwakwe kwakalinga kunyaka mulilo.

³ Mwaami Lesa ulisuni bantu bakwe akunoobalama mukwiinga mbaakwe. Paceebo ceeci soonse tulafukama muliimfwa lyakwe akutambula milasho yakwe,

⁴ aMilawo Mose njaakatupa ceebo mbobuboni bwesu sobene Isilaeli.

⁵ Bene Isilaeli alimwi abamatanjilili babo ndibakalinga kubungene mumikowa yabo Lesa wakaba ngomwaami wa bene Isilaeli.”

⁶ Ono kumukowa wakwe Lubeni, Mose wakaamba ayi, “Mukowa wakwe Lubeni unoociliiwo utaloobi nacibi kwaamba ayi bantu bakwe mbaniinibo.”

⁷ Akwalo kumukowa wakwe Juda wakaamba ayi, “NoBaami baLesa, amunyumfwe kulila kwa mukowa wakwe Juda. Amubacatanye amikowa imwi alimwi. NoBaami baLesa amubape nkusu shakulifuna, mubacaafwe kukoma balwani babo.”

⁸ Kumukowa wakwe Lefi wakaamba ayi, “Mwebo noBaami baLesa, amuyubulule kuyanda kwanu kwiinda muli Ulimu aTumimu, kwiinda mubene Lefi basebenshi banu bashomeka. Ncakwiila mwakabasunka kuMasa, akubona ayi balashomeka kumaanshi a kuMeliba.

⁹ Bakashomeka kuli ndimwe kwiinda kubamashali, bamakwababo nabi bana babo. Bakakonkela milawo yanu akulama cipangano canu.

¹⁰ Balaakwiisha bana bakwe Jakobo milasho yanu, balaakwiisha bene Isilaeli milawo yanu. Balaakunoopa tununkila kabotu kunembo lyanu alimwi amilambu yakutenta pacipaililo canu.

¹¹ NoBaami baLesa, amucafwe mukowa wabo kusumpuka, akukondwa mushintu shoonse nsheshi banoocita. Amunyonyoole balwani babo kushikila boonse bakaloobe.”

¹² Kumukowa wakwe Benjameni wakaamba ayi, “Uyu ngomukowa Mwaami Lesa ngwaasuni akuufuna. Uloolama bushiku boonse, akwikala pakati ka nguwo.”

¹³ Kumukowa wakwe Josefu wakaamba ayi, “Mwaami Lesa aape cishi cabo coolwe kwiinda mukubapa mfula kuswa kwiculu, akwiinda mukubapa maanshi aswa panshi.

¹⁴ Cishi cabo acibe acoolwe cakuba ashisepo shipya kulumwi, akuba ashisepo shibotu mwaaka woonse.

¹⁵ Tulundu twabo tukulukulu tube ashisepo shibotu.

¹⁶ Cishi cabo acibe ashintu shibotu shoonse. Bakapekwe coolwe ceebo ca bubotu bwa Mwaami Lesa uyo wakaamba mucikupu cakalinga kunyaka. Mukowa wakwe Josefu ncakwiila upekwe coolwe ici mukwiinga wakalinga ngomutanjilili pabamakwabo.

¹⁷ Josefu ulicite nkusu anga ngumucende alimwi ameeca ali anga nga nyaati. Meeca akwe mbamulunyungu lwakwe Manase abo bali shuulu ashuulu, abamulunyungu lwakwe Efuleemu abo bali shuulu likumi. Meeca aya ulayasishaako mishobo imwi akubashindikila kweela cishi ca panshi.”

¹⁸ Kumukowa wakwe Sebuluni awakwe Isaka wakaamba ayi, “Mukowa wakwe Sebuluni ube abuboni mumakwebo a mulweenge, abwalo buboni bwa mukowa wakwe Isaka bufulileeko kumishaabo.

¹⁹ Balaakutamba baswamashi ayi bakese kukalundu kabo akubenga milambu yeelete nkomunya uko. Buboni bwabo bulaswa mumakwebo a mulweenge, alimwi amumuseese wa muloombe lwa lweenge.”

²⁰ Akwalo kumukowa wakwe Gadi wakaamba ayi, “Aalumbaishikwe Lesa uyo wakakomenya cishi cakwe. Gadi ulabelamina anga ninkalamu isuni kukwamoona lyaansa nabi mutwi.

²¹ Wakalisalila cishi ciindaawo kubota. Wakapekwa cipansha ceelete mutanjilili. Wakakonkela milawo amilasho ya Mwaami Lesa ndibakalinga kubungene bamatanjilili ba bene Isilaeli.”

²² Kumukowa wakwe Dani wakaamba ayi, “Mukowa wakwe Dani ngumwanaankalamu, uloolukila kuswa kuBashani.”

²³ Kumukowa wakwe Nafutali wakaamba ayi, “Mwaami Lesa ulisangalete abuumbi pali Nafutali, alimwi Nafutali uliswitebo shoolwe sha Mwaami Lesa. Cishi cakwe cilaakweela kumalenge kulweenge lwa Galili.”

²⁴ Kumukowa wakwe Asha wakaamba ayi, “Mukowa wakwe Asha ulicite coolwe kwiinda imwi yoonse. Aube acoolwe pakati ka mikowanyina, cishi ca nguwo acibe ashisamu sha maolifi shiinji.

²⁵ Mandabala a nguwo akacaalwe ashisasa sha nshimbi asha bulonse, alimwi keekala muluumuno kwa buumi bwakwe boonse.

²⁶ Nobene Isilaeli, taaku lesa umwi uli anga nguLesa wanu, uyo weendeenda mwiculu mubulemu bwakwe, uleendeenda mumakumbi ayi amucaafwe.

²⁷ Lesa ngoomufuna lyoonse, maansaakwe amuyayaya ngaamulama. Ulatanda balwani kunembo lyanu, akumwaambila ayi mubanyonyoole.

²⁸ Aboobo bene Isilaeli balekala muluumuno, bamulunyungu lwakwe Jakobo tabalokelwi kalongo mucishi muswite shili anga ngamaila awaini, uko mume nkooloka kuswa kwiculu.

²⁹ Mulicite coolwe mwebo nobene Isilaeli! Taaku mushobo uli mbuli ndimwe nomwakafunwa aMwaami Lesa. Mwaami Lesa mwiine ndyeliyawo lyanu alimwi ngomupeeni wanu, uyo umufuna akulengesha ayi mukome. Balwani banu balaakwisa mukulibombya kuli ndimwe, nakubi boobo mulaakubalyatoola.”