Dutolonomi 32 - Baibo Busansulushi Bwa Libuku Ili

¹ “Kutika, oliculu nshentokwaamba, nyumfwa, ocishi ca panshi maswi angu.

² Kwiisha kwangu kube anga nimfula, amaswi angu aloke anga ngumume, anga nimfula pamweemfu, nabi mfula inene pamimeno.

³ Ndanoolumbaisha liina lya Mwaami Lesa, bantu bakwe bananooshimika bulemu bwakwe.

⁴ “NguMwaandami, milimo yakwe teecite kampenda. Nshila shakwe shoonse shililuleme. NguLesa ushomeka utabishi, ulacita shiluleme akoombolosha kabotu.

⁵ Sombi mwebo tamushomeki, tamweelete kwiitwa ayi bana bakwe, nolunyungu lushikubisha alimwi lushikubeca.

⁶ Mwebo nobantu baluya, batacite maano, Sa mbomweelete kucita kuMwaami Lesa bulya? Sa teshi ngoIshiwanu, Mulengi wanu, uyo wakamulengesha kuba mushobo unene?

⁷ “Amwiibaluke nshiku shakalekale, muyeeye mashalane akulukulu. Mukeepushe bamaishiwanu bakamulwiite, mukeepushe bamanene bakamusansulwite.

⁸ Lesa wakwiculu Wiindaawo ndyaakapa mishobo shishi ayi nshinebo, ndyaakapansaanya bantu boonse, wakabika manyinsa pakati kabo kweelana akufula kwa bana bakwe Isilaeli.

⁹ Ceebo cipansha ca Mwaami Lesa mbantu bakwe, ncakwiila bamulunyungu lwakwe Jakobo ncipansha cakwe.

¹⁰ “Wakabacana kabeengooka muluyanga, mucishi ciyoosha mutameeni cintu nabi comwi. Wakabafuna akubalama kabotu bweenka muntu mbwaalama liinso,

¹¹ bweenka mbuli mumbankwashi mbwaapalanganya ciinswa, akunooshinguluka peculu lya bana bakwe, ulafungulula mapapaminwa akwe ayi ababeleke, akubayumuna pamapapaminwa akwe.

¹² Mwaami Lesa eenkabo ngowakabatanjilila, taaku lesa umwi wakabacafwa.

¹³ “Ngowakalengesha ayi beendeleshe cishi coonse ca tulundu akubapa shakulya sha muluundu. Wakabapa buuci kuswa mumabwe, shisamu sha maolifi shakakomena mubulongo bwa mabwe.

¹⁴ Ŋombe ampongo shabo shakalinga kukamika abuumbi. Mbelele, mpongo aŋombe shabo shakalinga kwiinite. Mbelele shisankwa shakalinga shibotu anga nsha kuBashani, awalo witi alimwi awaini shakalinga kwiinditeewo kubota.

¹⁵ “Bantu ba Mwaami Lesa bakabila, sombi bakamwaashukila. Bakeena ceebo bakalinga kulyatabo mushakulya. Sombi bakasuula Lesa, Mulengi wabo, akukaka Mwaandami shikubapulusha.

¹⁶ Bakakalasha Mwaami Lesa ceebo cakulambila balesa bamwi, wakabakalalila ceebo ca shibumbwabumbwa shabo shimulensha bunya.

¹⁷ Bakabenga milambu kubalesa abo bateshi bancinencine, balesa mbobatakalinga kwishi, balesa bapya, abo bamashali babo mbobatakwe kulemekaawo.

¹⁸ Bakakaka Mwaandami, Lesa uyo wakabalenga, Bakaluba Lesa wabo uyo wakabapa buumi.

¹⁹ “Mwaami Lesa ndyaakabona boobo, wakabakaka, ceebo bana bakwe basankwa abanakashi bakamukalasha.

²⁰ Wakaamba ayi, ‘Ndaakubafutatila, tubone na balaakweela kuli. Mukwiinga ndunyungu lushicimpamya, ncakwiila mbaana batashomeki.

²¹ Bakanengesha kunyumfwa busuba ceebo cakulambila citeshi Lesa. Bakankalasha ceebo cakulambila shibumbwabumbwa shitaaku mboshibete. Aboobo ndaakubalengesha busuba mukupa bulemu mushobo utacite ankooya. Ndaakubakalasha mukusuna bantu batacite lushibo.

²² Bukali bwangu bulaakunoonyaka anga ngumulilo kuya mukushika akumusena wa bafu. Ulaakunyonyoola cishi ca panshi ashisepo sha ncico, akukumika lwiimbi lwa tulundu.

²³ “ ‘Ndaakulundika mapensho pali mbabo akubanyonyoola amifwi yangu.

²⁴ Ndaakutuma nsala ashimpwita, balaakufwa kumalwashi ayoosha. Ndaakutuma banyama bamuluundu ayi babacaaye, alimwi ansooka shikali ayi shikabaluume.

²⁵ Pansengwe palaakuba kufwa kunkondo, mumaandaabo balaakunookala caboowa. Bacikula bwangu basankwa abanakashi balaakufwa, abalo bacembele abakateta, boonse mbomunya ubo.

²⁶ Ndakalinga kusuni kubanyonyoola boonse ayi bantu bamwi batakabeebalukiwo tubili.

²⁷ Sombi ndakaloonda balwani babo kulisumpula akwaamba ayi bakanyonyoola bantu bangu, kakuli ndime ndakabanyonyoola nemwiine.’

²⁸ “Bene Isilaeli ngumushobo utacite maano, ncakwiila tabacite kalango.

²⁹ Bakaalilwa kwishiba ncebakakomenwa, tabakoonshi kunyumfwa cakacitika kuli mbabo.

³⁰ Anu muntu womwi inga wakoma buyani bali cuulu, nabi bobilo kukoma bali shuulu likumi? Sa te nceebo cakwaamba ayi Mwaandami wabo wakabashiya beenka? Ndushinisho Mwaami Lesa, Lesa wabo wakabalekelesha.

³¹ Balwani babo balishi ayi balesa babo balilefukite, tabacite nkusu mbuli Lesa wa bene Isilaeli.

³² Balwani babo mbeshikubisha anga mbene Sodoma aGomola, bali anga njiminyansa icata shisepo shilula alimwi shikola,

³³ Bali anga nguwaini wakapangwa kubuyoka bwa nsoka, ncakwiila bali anga mbuyoka bwakwe lukonkola.

³⁴ “Mwaami Lesa uciyeeya balwani babo ncebakacita Utoolindilabo ciindi ceelete ayi abape mulandu.

³⁵ Mwaami Lesa ulaakuboosha cishole mukubapa mulandu. Paciindi ceelete balaakuwa boonse. Bushiku bwa mapensho abo buli pafwaafwi. Balaakunyonyoolwabo onoono.

³⁶ Mwaami Lesa ulaakufuna bantu bakwe, na akabone ayi nkusu shabo shamana. Ulaakubanyumfwila nkumbu basebenshi bakwe, na akabone ayi tabacite wakubacafwa.

³⁷ Lyalo Mwaami Lesa ulaakwiipusha bantu bakwe ayi, ‘Bali kuli balesa ba nkusu mbomwakashoma?

³⁸ Mwakabatebeta mafuta a milambu yanu akubapa cipo ca waini ayi banwe. Abese bamucaafwe bulya! Abacice kwaamba ayi bamufuneeko!

³⁹ “ ‘Nebo neenka, ndime Lesa. Taaku Lesa aumwi kwiinda ndime. Ndacaya akupa buumi, ndacisa akushilika. Taaku weenga wakasha nceensuni kucita.

⁴⁰ Ndakonsha kutambika lyaansa kwiculu akushomesha cakulumbila ayi, mbocili lushinisho ayi nebo ndanooli muumi lyoonse,

⁴¹ ndaakunona mupeeni wangu ubekabeka, akubona kwaamba ayi bululami bwacitika. Ndaakuboosha cishole pabalwani bangu, akupa mulandu kubaabo bampatite.

⁴² Mifwi yangu ilaakunoonswenkabo bulowa bwabo, mupeeni wangu ulaakucaya abo bampikisha. Taaku mulwani nabi womwi weshi nkashiye, beshi bakacisikwe abeshi bakacatwe kunkondo, boonse balaakufwa.’

⁴³ “Mwebo nomishobo yoonse, kamulumbaisha bantu ba Mwaami Lesa. Ulaakupa mulandu abo babacaya akuboosha cishole kubalwani, sombi ulalekelela bantu bakwe.”

⁴⁴ Mose wakesa pantu pomwi aJoshuwa mwanaakwe Nani akwaamba maswi oonse a lwiimbo ulu bantu boonse kabanyumfwite.

Mose mbwaakapa milasho yakweelaako

⁴⁵ Ono Mose ndyaakamana kwaambila bene Isilaeli maswi oonse ayo,

⁴⁶ wakaamba ayi, “Maswi oonse aya ngondamwaambila sunu, abe muli ndimwe kwaamba ayi mukeeishe bana banu ayi bakakonkele milawo iyi kabotu kabotu.

⁴⁷ Teshi maswi atacite ncito, sombi mbobuumi bwanu. Kamwaakonkela, lyalo mulaakwikala nshiku shiinji mucishi ico cili kwitala lya Joodani ncemutooya mukwikalaamo.”

⁴⁸ Pabushiku mbomunya ubo, Mwaami Lesa wakaambila Mose ayi,

⁴⁹ “Koya mutulundu twa Abalimu, mucishi ca Moabu ico cilangene andabala ya Jeliko. Utante paKalundu ka Nebo, akubona cishi ca Kenani, ico ncentoopa bene Isilaeli.

⁵⁰ Na ukatante pakalundu ako, ulaakufwa peenka apo, bweenka mbuli mukwanu Aloni mbwaakafwita paKalundu ka Oli,

⁵¹ mukwiinga nobilo noonse tamukwe kushomeka kuli ndime pameenso a bene Isilaeli. Ndimwakashika kumaanshi a kuMeliba pafwaafwi andabala ya Kadeshi muluyanga lwa Sini, tamukwe kundemeka pameenso a bene Isilaeli.

⁵² Paceebo ceeci, cishi ici ulaakucibonenabo palaale, sombi teshi ukashike mucishi ico ncentoopa bene Isilaeli.”