Dutolonomi 31 - Baibo Busansulushi Bwa Libuku Ili

Joshuwa mbwaakaba pamusena wakwe Mose

¹ Mpomunyaawo Mose wakatolelela kwaambila bene Isilaeli ayi,

² “Ono bulya ndicite myaaka ili 120, paceebo ceeci inga nshicikoonshi kunoocili mutanjilili wanu. Kuteshibo ceeco ceenka, sombi Mwaami Lesa wakandwiita ayi teshi nkasubuke Mulonga wa Joodani.

³ Mwaami Lesa, Lesa wanu mwiine ngweshi akanooli kunembo akunyonyoola mishobo iyo ili kooko kwaamba ayi mukabwese cishi cabo. Joshuwa ngweshi abe mutanjilili wanu kweelana abwakaamba Mwaami Lesa.

⁴ Mpeeke Mwaami Lesa ulaakunyonyoola bantu abo bweenka mbwaakacita Sioni alimwi aOgi, bamaami ba bene Amoli abo mbwaakanyonyweeta pantu pomwi acishi cabo.

⁵ Mwaami Lesa ulaakulengesha ayi mukabakoome, aboobo mulyeelete kubacita bweenka mbondamulwiita.

⁶ Anu amuyume akulishoma. Mutabaloondi nabi kututuma ceebo Mwaami Lesa, Lesa wanu unanooli amwebo. Teshi akamushiyeewo nabi kumusuula.”

⁷ Lyalo Mose wakeeta Joshuwa akumwaambila pameenso abene Isilaeli boonse ayi, “Uyume akulishoma, ceebo ndiwe weshi utole bantu aba mucishi ico Mwaami Lesa ncaakashomesha cakulumbila kupa bamashali babo. Ulyeelete kubabaanya cishi ico ayi cikabe cinebo.

⁸ Mwaami Lesa mwiine ngweshi anookutanjilila alimwi unanooli awebo. Teshi akakushiyeewo nabi kukusuula. Aboobo tooelete kuloonda nabi kutyongola.”

Kubelenga milawo kulilabo na peenda myaaka yosanwe ayobilo

⁹ Mpeeke Mose wakalemba Milawo yakwe Lesa akupa bene Lefi bapailishi abo bakalinga kulanga paLibokoshi lya Cipangano ca Mwaami Lesa, alimwi akupa bamatanjilili boonse ba bene Isilaeli.

¹⁰ Lyalo Mose wakabaambila ayi, “Lyoonse na peenda myaaka ili yosanwe ayobilo, mumwaaka wakulekelela nkongole mulyeelete kunoobelenga Milawo iyi, Munoobelengaamo paciindi cakusekelela kwa Shimpaka.

¹¹ Mukanoobelengela bene Isilaeli boonse na besa mukulambila Mwaami Lesa, Lesa wanu kumusena womwi wakulambililaako uyo Mwaami Lesa ngweshi akasaale.

¹² Mukabunganye bantu boonse, nkokwaamba ayi basankwa, banakashi, baana alimwi abaswamashi mbomwikalaabo mumandabalaanu, ayi banyumfwe akwiiya kulemeka Mwaami Lesa, Lesa wanu alimwi akukonkela kabotu maswi oonse ali mumilawo iyi.

¹³ Munshila iyi, bamulunyungu lwanu abo batana kunyumfwaawo Milawo iyi ya Mwaami Lesa, Lesa wanu, inga beenyumfwa. Aboobo, balaakwiiya kumunyumfwila mumyaaka yoonse njeshi mukekale mucishi ico ncemutooya mukubwesa akwikalaamo kwitala lya Joodani.”

Mwaami Lesa mbwaakapa Mose milasho yakweelaako

¹⁴ Kuswawaawo Mwaami Lesa wakaambila Mose ayi, “Ono uli pafwaafwi kufwa. Ita Joshuwa usaakwe kuTente ya Cipangano ayi mupe milasho.” Mpeeke Mose aJoshuwa bakaya kuTente iyo.

¹⁵ Lyalo Mwaami Lesa wakaboneka nkomunya uko mulicincilo lya likumbi ilyo lyakeemikana pamulyango wa Tente.

¹⁶ Mwaami Lesa wakaambila Mose ayi, “Webo utoofwa onoono, ono na ufwe, bene Isilaeli balaakucileka kushomeka kuli ndime akutalika kulambila balesa beensu ba mucishi ico ncebatooyaamo. Balaakunkaka akupwaya cipangano cili pakati pali mbabo anebo.

¹⁷ Pabushiku ubo ndaakubakalalila akubafutatila, mpeeke balaakunyonyooka. Balaakupolelwa mapensho aanji kushikila bakeshibe ayi shoonse shabacitikila ceebo nebo neMwaami Lesa nshibete ambabo.

¹⁸ Ncakwiila pabushiku ubo ndaakubafutatila ceebo ca bubi bwabo bwakulambila balesa bamwi.

¹⁹ “Ono lemba lwiimbo ulu akwiisha bene Isilaeli boonse kwaamba ayi lube bukamboni bwakubashinina.

²⁰ Nebo pakubashisha mucishi umo muli bubile abulongo bubotu ico ncendakashomesha bamashali babo bakulukulu, balaakutalika kulambila balesa bamwi. Balaakunkaka akupwaya cipangano cili pakati pali mbabo anebo, mukwiinga balaakunoolyatabo mushakulya.

²¹ Mapensho aanji aakubapolela, lwiimbo ulu lulaakunokwiimbwa akuba bukamboni bwakubashinina, mukwiinga bamulunyungu lwabo teshi bakaluluube. Nebo ndishi shoonse nsheshi bakacite, nacibi kwaamba ayi nshina kubashisha mucishi ico ncendakashomesha cakulumbila kubapa.”

²² Aboobo Mose wakalemba lwiimbo ulo pabushiku ubo akulwiisha bene Isilaeli.

²³ Lyalo Mwaami Lesa wakaambila Joshuwa mwanaakwe Nani ayi, “Uyume akulishoma mukwiinga ndiwe weshi utanjilile bene Isilaeli kuya mucishi ncendakabashomesha cakulumbila, anebo nemwiine nanooli awebo.”

²⁴ Ono Mose ndyaakamanisha kulemba maswi oonse mulibuku lya Milawo yakwe Lesa,

²⁵ wakaambila bene Lefi bapailishi abo bakalinga kulanga paLibokoshi lya Cipangano ayi,

²⁶ “Amubwese Libuku lya Milawo ili akulibika lubamba aLibokoshi lya Cipangano ca Mwaami Lesa, Lesa wanu. Uko, lilaakunooli bukamboni bwakushinina bantu bakwe boonse.

²⁷ Nebo ndishi bwaashu abushicimpamya mbobacite. Balo bakalinga kwaashukila Mwaami Lesa nebo kaancili muumi, ono cilaakweela kuli na nkafwe!

²⁸ Amubunganye bamatanjilili ba mikowa yoonse, alimwi abacinenenene kwaamba ayi mbalwiite maswi aya balinyumfwile. Ntokwiita liculu alimwi acishi ca panshi ayi shibe bakamboni bangu bakubashinina.

²⁹ Mukwiinga ndishi ayi ndaakufwa, balaakutalika kubisha akukaka nshendabalwiita. Mpeeke munshiku shitoosa, balaakupolelwa mapensho ceebo ca kubisha kunembo lya Mwaami Lesa akumukalasha kwiinda mukucita sheesho nshaakabakasha.”

Lwiimbo lwakwe Mose

³⁰ Mpomunyaawo Mose wakaamba maswi oonse a lwiimbo ulu bene Isilaeli boonse kabanyumfwite.