Dutolonomi 30 - Baibo Busansulushi Bwa Libuku Ili

Kuboola kuMwaami Lesa akupekwa coolwe

¹ “Ono ntoomulwiita ayi cili kuli ndimwe nobeene kusala coolwe nabi mashingo. Na shoonse ishi shikamucitikile pakati ka mishobo iyo Mwaami Lesa, Lesa wanu nkweshi akamupalanganishishe, mulaakwiibaluka shakusala nshentoomulwiita.

² Na mwebo alimwi abamulunyungu lwanu mukasandukile kuMwaami Lesa akukonkela milawo yakwe njentoomupa amyoyo alimwi abuumi bwanu boonse,

³ lyalo Mwaami Lesa, Lesa wanu ulaakumunyumfwila nkumbu. Ulaakumukusha kuswa mumishobo iyo njaakapalanganya akumulengesha ayi mube ashoolwe alimwi.

⁴ Nacibi kwaamba ayi mukapalanganishikwe cakuya mukushika kweela cishi ca panshi, Mwaami Lesa, Lesa wanu ulaakumubunganya akumuboosha,

⁵ ayi mukabwese cishi umo mwakalinga bamashali banu bakulukulu. Ulaakumupa coolwe alimwi akumufusha kwiinda bwakalinga bamashali banu bakulukulu.

⁶ Kuswawaawo Mwaami Lesa, Lesa wanu ulaakupa ndimwe abamulunyungu lwanu myoyo yakunyumfwila, kwaamba ayi mukamusuune amyoyo alimwi abuumi bwanu boonse, ayi mukatolelele kwikala mucishi ico.

⁷ Mpeeke ulaakutuntulwita mashingo oonse aya pabalwani banu abo bakalinga kumupatite akumupensha.

⁸ Lyalo mulaakunoonyumfwila Mwaami Lesa alimwi, akukonkela milawo yakwe yoonse njentoomupa sunu.

⁹ Mpomunyaawo Mwaami Lesa, Lesa wanu ulaakumupa coolwe mumilimo yoonse njeshi mukanoocita, akumupa baana baanji, shifubwa alimwi ashakulya shiinji. Ulaakukondwa kumupa coolwe bweenka mbwaakakondwa pakupa coolwe bamashali banu bakulukulu.

¹⁰ Ici cilaakucitika na mukanoonyumfwila Mwaami Lesa, Lesa wanu akukonkela milawo amilasho yakwe yoonse ilembetwe mulibuku ili. Mulyeelete kuboola kuMwaami Lesa, Lesa wanu amyoyo alimwi abuumi bwanu boonse.

¹¹ “Anu mulawo ngontoomupa sunu teshi uyumu alimwi toobete kulaale sobwe.

¹² Toobete kwiculu nkweenga kamwiipusha ayi, ‘Ngani eshi aye kwiculu mukutuletela, tunyumfwe mbowaamba akuukonkela?’

¹³ Nabi kuba kwitala lya lweenge nkweenga kamwiipusha ayi, ‘Ngani eshi asubukile kwitala mukutuletela, tunyumfwe mbowaamba akuukonkela?’

¹⁴ Sobwe, ulibo pafwaafwi, mulishi, mulakonsha kuwaamba, aboobo amuukonkele.

¹⁵ “Amubone, sunu ndamupa ciindi cakusala pakati ka bubotu abubi, pakati ka buumi alimwi amapensho.

¹⁶ Ceebo ndamulwiita ayi musune Mwaami Lesa, Lesa wanu, kweenda munshila shakwe akukonkela milawo, milasho yakwe alimwi akwiisha kwakwe kumwi koonse. Na mukacite boobo, Mwaami Lesa, Lesa wanu ulaakumufusha akumupa coolwe mucishi ico ncemutooya mukubwesa akwikalaamo.

¹⁷ Sombi na mukabule kucita boobo, mukayungoolwe kuya mukufukamina akulambila balesa bamwi,

¹⁸ ntoomulwiitila limwi sunu ayi ncakwiila mulaakunyonyoolwa. Teshi mukekaale ciindi cilaamfu mucishi ico cili kwitala lya Joodani ncemutooya mukubwesa akwikalaamo.

¹⁹ Sunu ndeeta liculu alimwi acishi ca panshi ayi shibe bakamboni bangu. Ndamupa ciindi cakusala pakati ka buumi alufu, apakati ka coolwe amashingo. Ono amusale buumi kwaamba ayi mwebo abamulunyungu lwanu munooli boomi.

²⁰ Ono amusune Mwaami Lesa, Lesa wanu, munoomunyumfwila alimwi akushomeka lyoonse kuli nguwe. Na munoocita boobo, mulaakwikala myaaka iinji mucishi ico ncaakashomesha cakulumbila kupa bamashali banu bakulukulu Abulaamu, Isaki alimwi aJakobo.”