Dutolonomi 3 - Baibo Busansulushi Bwa Libuku Ili

Bene Isilaeli mbobakakoma mwaami Ogi

¹ “Kuswawaawo twakaya kumatwa kululama cishi ca Bashani. Mpeeke Ogi mwaami wa kuBashani wakaswa abashilumamba bakwe boonse kwaamba ayi alwane aswebo pafwaafwi andabala ya Edileyi.

² Sombi Mwaami Lesa wakaŋambila ayi ‘Utamuloondi. Ntoomwaaba mumaansaako pantu pomwi abashilumamba bakwe boonse alimwi acishi cakwe. Cita bweenka mbowakacita kuli Sioni mwaami wa bene Amoli uyo wakalinga kulela muEshiboni.’

³ “Aboobo Mwaami Lesa wakaaba mwaami Ogi abashilumamba bakwe mumaansa esu. Mpeeke twakabacaya boonse.

⁴ Paciindi ceenka ico twakabwesa mandabala anene akwe oonse kutashiya nabi yomwi. Mandabala oonse akabwesekwa akalinga makumi osanwe ayomwi, nkokwaamba ayi cishi coonse ca Aligobu cakalinga kweendelesha mwaami Ogi wa kuBashani.

⁵ Mandabala oonse aya akalinga kushitilishitwe alilinga lilaamfu, minjililo icite shisasa ampingilo sha nshisho sha nshimbi. Kwakalinga amishi iinji yatakalinga kushitilishitwe alilinga.

⁶ Twakanyonyoola mandabala oonse akucaya basankwa, banakashi alimwi abanike boonse bakalingaamo, bweenka mbotwakacita mumandabala a mwaami Sioni wa kuEshiboni.

⁷ Twakabwesa shifubwa akusaala shintu sha mumandabala ayo.

⁸ “Paciindi ico twakabwesa cishi cakalinga kwicwe lya Joodani kuswa kubamaami bobilo aba ba bene Amoli, kuswa kuMulonga wa Anoni kushika kuKalundu ka Emoni.”

⁹ Kalundu ka Emoni kaleetwa ayi Silioni kubene Sidoni alimwi ayi Seneya kubene Amoli.

¹⁰ “Twakabwesa cishi coonse cakwe Ogi mwaami wa Bashani. Twakabwesa mandabala anene ali pacitunta, cishi ca Gilyadi aca Bashani, kuya kwicwe kushika akumandabala aSaleka aEdileyi.”

¹¹ Mwaami Ogi wakalinga ngomucaalishi kubaLefaimu. Bulo bwakwe bwakapangwa anshimbi alimwi bwakalinga mamita ali one mubulaamfu, mubufwaafwi mamita ali obilo kweelana ashipimo shisuminishitwe. Buciboneka abobulya mundabala ya bene Amoli ya Laba.

Mikowa iyo yakekala kwicwe lya Joodani

¹² “Ono cishi ico ndicakaba mumaansa esu, mukowa wakwe Lubeni alimwi awakwe Gadi ndakeebika mucishi cakalinga kumatwa a ndabala ya Alowa pafwaafwi aMulonga wa Anoni alimwi acipansha ca cishi ca tulundu ca Gilyadi pantu pomwi amandabala a ncico.

¹³ Musa wa mukowa wakwe Manase ndakaubika kucipansha cakacaalaako ca Gilyadi alimwi acishi ca Bashani coonse uko Ogi nkwaakalinga kulela. Nkokwaamba ayi cishi coonse ca Aligobu.” Cishi ca Bashani cakalinga kushibikitwe ayi ncishi ca baLefaimu.

¹⁴ Jeya wamulunyungu lwakwe Manase wakabwesa cishi coonse ca Agobu, nkokwaamba ayi cishi ca Bashani coonse kushika akumanyinsa aGesha alimwi aMaaka. Mishi yoonse wakeetumba liina lyakwe. Abobulya iciitwa ayi Jeya.

¹⁵ “Cishi ca Gilyadi ndakacipa kucipani cakwe Makiya wa mumukowa wakwe Manase.

¹⁶ Ono mukowa wakwe Lubeni alimwi awakwe Gadi ndakeepa cishi kuswa kuGilyadi kushika kuMulonga wa Anoni. Pakati ka Mulonga yakaba njenyinsa yabo kulubasu lwa kumalenge. Kumatwa nyinsa yakalinga kuMulonga wa Jaboku uyo wakalinga njenyinsa yabo abene Amoni.

¹⁷ Kuya kumbo cishi cabo cakalinga kweela kuMulonga wa Joodani, kumatwa cakalinga kuswa kuCishiba ca Galili kuya mukweela kuLweenge lwa Mwiinyo kumalenge. Kuya kwicwe cakalinga kweela munshaaKalundu ka Pisiga.

¹⁸ “Mpomunyaawo ndakabapa milasho yakwaamba ayi, ‘Mwaami Lesa, Lesa wesu wamupa cishi ici kwicwe lya Joodani kwaamba ayi mwikaleemo. Ono amupe shilwanisho bashilumamba banu mubatuume basubuke Mulonga wa Joodani kunembo lya mikowa imwi ya bene Isilaeli kwaamba ayi bakabacafwilishe kubwesa cishi cabo abalo.

¹⁹ Beenkabo bamakaanu abana banu mbweshi bacaale mumandabala ayo ngondamupa pantu pomwi ashifubwa shanu. Ndishi kwaamba ayi mulicite shifubwa shiinji.

²⁰ Mukacafwe bene Isilaelinyinaanu kushikila abalo bakabwese cishi ico Mwaami Lesa, Lesa wanu ncaatobapa kumbo lya Joodani. Mukabacaafwe kushikila Mwaami Lesa akabaleeke ayi bekale muluumuno uko, mbuli mbwaacita kale kuli ndimwe kuno. Lyalo inga mwaboolela alimwi kucishi cino ico ncendakamupa.’

²¹ “Lyalo ndakalwiita Joshuwa ayi, ‘Waboona shintu shoonse Mwaami Lesa, Lesa wako nshaakacita kubamaami bobilo balya, Sioni aOgi. Ncakwiila akubamwi boonse bacite shishi nshemutooyaako, ulaakucita bweenka ubo.

²² Mutabaloondi ceebo Mwaami Lesa, Lesa wanu ulaakumulwaninaako.’

Mose mbwaatakwe kusuminishikwa kwinjila muKenani

²³ “Paciindi ico ndakapaila cankusu ayi,

²⁴ ‘NoBaami baLesa noBeshinkusu shoonse, ndishi kwaamba ayi mwantondeshabo matalikilo a shintu shinene shikankamika nsheshi mukacite. Taaku lesa kwiculu nabi panshi weenga wacita shintu sha nkusu shiindaawo pasheesho nshemwacita!

²⁵ NoBaami baLesa, amunsuminishe nsubuke Mulonga wa Joodani kwaamba ayi mboneewo cishi ca bulongo bubotu kwitala, cishi cibotu ca tulundu alimwi atulundu twa Lebanoni.’

²⁶ “Sombi ceebo ca ndimwe nobantu, Mwaami Lesa wakankalalila alimwi taakwe kunyumfwila. Sombi wakaamba ayi, ‘Mbubo! Utacaambi tubili cikani ici!

²⁷ Koya peculu lya Kalundu ka Pisiga, ulange kumatwa akumalenge, kwicwe akumbo. Ulangishishe kabotu nsheshi ubone mukwiinga webo teshi ukausubukeewo Mulonga wa Joodani.

²⁸ Upe Joshuwa milasho akumuyumyayumya mukwiinga ulaakutanjilila bantu kwaamba ayi bakabwese cishi nceshi ubone.’

²⁹ “Aboobo twakacaala mucinyika cilangene andabala ya Betipeyo.”