Dutolonomi 29 - Baibo Busansulushi Bwa Libuku Ili

Cipangano ca Mwaami Lesa abene Isilaeli mucishi ca Moabu

¹ Maswi aya nga mucipangano ca Mwaami Lesa ico ncaakaambila Mose ayi apange abene Isilaeli mucishi ca Moabu. Uku nkwiilikoobo pacipangano cakwe ambabo paKalundu ka Sinayi.

² Mpomunyaawo Mose wakabunganya bene Isilaeli boonse akubaambila ayi, “Mwakalibonena nobeene shoonse isho Mwaami Lesa nshaakacita kuli Falawo mwaami wa kuIjipiti, bamatanjilili bakwe alimwi akucishi cakwe coonse.

³ Mwakalibonena nobeene myaalu iloondesha, shaankamiko alimwi ashitondesho sha nkusu sha kwiculu isho Mwaami Lesa nshaakacita.

⁴ Sombi abobulya sunu, taana kumulengesha ayi mwishibishishe nabi kunyumfwishisha sheesho nshemwakabona.

⁵ Kwamyaaka ili makumi one iyo Mwaami Lesa njaakamutanjilila muluyanga, shakufwala nabi nkwabilo shanu tashikwe kukwamookaawo.

⁶ Temwakalinga kucitewo shinkwa wakulya, waini nabi bwalwa bwakunwa, sombi Mwaami Lesa wakalinga kumupa shoonse shakalinga kuyandika mubuumi bwanu kwaamba ayi mwishibe ayi nguLesa wanu.

⁷ Nditwakashika kokuno, mwaami Sioni wa kuEshiboni alimwi amwaami Ogi wa kuBashani bakesa mukutulwana. Sombi twakabakoma.

⁸ Twakabwesa cishi cabo akwaabanya mukowa wa bene Lubeni wakwe Gadi alimwi amusa wa mukowa wakwe Manase.

⁹ Anu munookonkela kabotu maswi oonse ali mucipangano ici, kwaamba ayi mukanooswitilila mushintu shoonse nsheshi mukanoocita.

¹⁰ “Pabushiku bwasunu noonse muliimfwi pameenso a Mwaami Lesa, Lesa wanu. Nkokwaamba ayi mwebo nobamatanjilili, abamaloba, bacinenenene, basankwa bamwi boonse,

¹¹ banakashi, baana alimwi abaswamashi mbomwikalaabo abo bamutepela nkuni akumutekela maanshi.

¹² Mwebo muli waano sunu ayi musumine cipangano ico Mwaami Lesa, Lesa wanu, ncaatoopanga amwebo mukushomesha cakulumbila,

¹³ kwaamba ayi Mwaami Lesa ambilishe ayi sunu mwaba bantu bakwe, alakwe waba Lesa wanu kweelana ambwaakamushomesha akushomesha cakulumbila kubamashali banu bakulukulu Abulaamu, Isaki alimwi aJakobo.

¹⁴ Cipangano cakulumbila ici ca Mwaami Lesa, tacikumitebo kuli ndimwe nweenka, sobwe.

¹⁵ Sombi cilikumite abaabo boonse bamulunyungu lwesu batana kushalwa, abo batabete waano sunu.

¹⁶ “Mwebo nobeene mulishi mbuli mbotwakalinga kwikala mucishi ca Ijipiti alimwi ambotwakeenda mushishi sha mishobo imwi.

¹⁷ Mwakabona shibumbwabumbwa shabo shilensha nsoni isho shakapangwa kushisamu, mabwe, silifa alimwi agolodi.

¹⁸ Ono mucenjele ayi patakabi musankwa, mwanakashi, cipani nabi mukowa uli waano sunu weshi ukafutatile Mwaami Lesa, Lesa wesu akutalika kulambila balesa ba mishobo imwi. Ceebo ici inga caba anga ngumuyanda wasonsa akuba cisamu ca musuku mubi.

¹⁹ Anu kutabi muntu nabi womwi pabushiku bwasunu utoonyumfwa maswi aya, pesule alyuume pacaamba akwaamba ayi taaku ceenga cacitika nabi kaacita kuyanda kwakwe mwiine. Ici inga canyonyoola ndimwe noonse, baluleme alimwi abataluleme.

²⁰ Mwaami Lesa teshi akalekelele muntu wa mbuli wooyu. Sombi bukali bwakwe bulaakuba pali nguwe, amashingo oonse alembetwe mulibuku ili alaakumupolela, kushikila Mwaami Lesa akashiminganye liina lyakwe pacishi ca panshi cino.

²¹ Mpeeke Mwaami Lesa ulaakumulengesha ayi abe citondesho kumikowa yoonse ya bene Isilaeli akumuletela mapensho, kweelana amashingo oonse ali mucipangano ayo alembetwe mulibuku ili lya Milawo.

²² “Ono mumashalane ali kunembo, bamulunyungu lwanu alimwi abaswamashi baswa mushishi shili mulaale, balaakubona mapensho alimwi amalwashi ayo Mwaami Lesa ngweshi akalete mucishi canu.

²³ Cishi canu coonse cilaakubabo luyanga, cilaakunoolibo ncikula. Taaku ceshi cikanoomenaawo nabi bwiisu boonse. Cilaakuba anga ngamandabala anene aSodoma aGomola, Adima alimwi aSeboyimu, ayo ngaakanyonyoola Mwaami Lesa ndyaakakalala abuumbi.

²⁴ Lyalo bantu ba mucishi coonse ca panshi balaakwiipusha ayi, ‘Nciinshi Mwaami Lesa ncaakacitila bobulya cishi cabo? Nciinshi ncaakalalila bobulya?’

²⁵ Ono kukumbula kulaakuba kwakwaamba ayi, ‘Ceebo bantu aba bakapwaya cipangano ico Mwaami Lesa, Lesa wa bamashali babo bakulukulu ncaakapanga ambabo paciindi ndyaakalinga kubakusha mucishi ca Ijipiti.

²⁶ Bakaswa munshila ya Mwaami Lesa akutalika kulambila akusebensela balesa bamwi abo mbobatana kulambilawo kale, abo mbwaakabakasha.

²⁷ Paceebo ceeci Mwaami Lesa wakakalalila bantu bakwe akuleta mashingo oonse alembetwe mulibuku ili pacishi cabo.

²⁸ Mpeeke Mwaami wakakalala abuumbi cakwaamba ayi wakabakusha mucishi cabo akubawaala mucishi cimwi, kweelana ambomubwene bulya.’

²⁹ “Kuli shintu shimwi isho Mwaami Lesa, Lesa wesu nshaakatushisa. Sombi wakatuyubulwita Milawo yakwe kwaamba ayi swebo abamulunyungu lwesu tunooikonkela kwamuyayaya.