Dutolonomi 27 - Baibo Busansulushi Bwa Libuku Ili

Milawo yakwe Lesa yakalembwa pamabwe

¹ Kuswawaawo Mose wakeemikana pantu pomwi abamatanjilili ba bene Isilaeli akwaambila bantu boonse ayi, “Munookonkela milawo yoonse njentoomupa sunu.

² Na mukasubuke Mulonga wa Joodani akushika mucishi ico Mwaami Lesa, Lesa wanu ncaatoomupa, mukeemike mabwe aneneanene akwaamata.

³ Lyalo mukalembewo milawo amilasho yoonse njeshi mupe na mukashikebo mucishi muli bubile abulongo bubotu ico Mwaami Lesa, Lesa wa bamashali banu bakulukulu ncaakamushomesha.

⁴ Ono na mukasubuke Mulonga wa Joodani mukeemike mabwe aya paKalundu ka Ebali akwaamata, kweelana ambontoomulwiita sunu.

⁵ Uko kweenka, mukayake cipaililo ca mabwe ca Mwaami Lesa, Lesa wanu. Mutakasebenseshi ceela nabi comwi pakuyaka.

⁶ Cipaililo ici mukayakishe mabwe atabesetwe, lyalo mukanoobengelaawo amilambu yakutenta kuMwaami Lesa, Lesa wanu.

⁷ Nkomunya uko nkomweelete kubengela amilambu ya bwanabwankashi, mukanokwiilya akusangalala kunembo lya Mwaami Lesa, Lesa wanu.

⁸ Pamabwe ayo eenka ngweshi mukeemike, mukalembewo maswi a milawo yoonse yakwe Lesa cakwaamba ayi akanoobonekesha.”

⁹ Lyalo Mose wakeemikana pantu pomwi abene Lefi bapailishi akwaambila bene Isilaeli boonse ayi, “Amukutumane nobene Isilaeli, munyumfwe nshentokwaamba. Pabushiku bwasunu, mwebo mwaba bantu ba Mwaami Lesa wanu.

¹⁰ Paceebo ceeci kamumunyumfwila akukonkela milawo amilasho yakwe yoonse iyo njentoomupa sunu.”

Mashingo a pakutanyumfwila

¹¹ Kuswawaawo, Mose wakaambila bene Isilaeli ayi,

¹² “Na mukasubuke Mulonga wa Joodani, mikowa iyi ilyeelete kwiimikana paKalundu ka Gelisimu ayi ipe coolwe pabene Isilaeli bamwi boonse. Mukowa wakwe Simyoni, Lefi, Juda, Isaka, Josefu alimwi aBenjameni.

¹³ Apalo pakunooshingana, mikowa iyi njeyeelete kwiimikana paKalundu ka Ebali. Mukowa wakwe Lubeni, Gadi, Asha, Sebuluni, Dani alimwi alimwi aNafutali.

¹⁴ “Ono bene Lefi balaakoolobesha maswi aya ayi,

¹⁵ ‘Aashinganishikwe muntu uli woonse uyo upanga cibumbwabumbwa cakubesa nabi ca ceela akunoocilambila cabushishi, ceebo Mwaami Lesa ulipatite kulambila shibumbwabumbwa.’ “Mpeeke bantu boonse balaakwaamba ayi, ‘Ameni!’

¹⁶ “ ‘Aashinganishikwe muntu uli woonse uyo unyansha baishi abanyina.’ “Mpeeke bantu boonse balaakwaamba ayi, ‘Ameni!’

¹⁷ “ ‘Aashinganishikwe muntu uli woonse uyo uceesha manyinsa amubye.’ “Mpeeke bantu boonse balaakwaamba ayi, ‘Ameni!’

¹⁸ “ ‘Aashinganishikwe muntu uli woonse uyo utanjilila moofu munshila iteshi njenjiyo.’ “Mpeeke bantu boonse balaakwaamba ayi, ‘Ameni!’

¹⁹ “ ‘Aashinganishikwe muntu uli woonse uyo unyengelela baswamashi, bana banshiwa alimwi abamukalubinje banakashi.’ “Mpeeke bantu boonse balaakwaamba ayi, ‘Ameni!’

²⁰ “ ‘Aashinganishikwe muntu uli woonse uyo usebaanya baishi kwiinda mukukumana abakaabo bamwi.’ “Mpeeke bantu boonse balaakwaamba ayi, ‘Ameni!’

²¹ “ ‘Aashinganishikwe muntu uli woonse uyo ukumana amunyama.’ “Mpeeke bantu boonse balaakwaamba ayi, ‘Ameni!’

²² “ ‘Aashinganishikwe muntu uli woonse uyo ukumana anankashi yakwe nabi wakucanaamo.’ “Mpeeke bantu boonse balaakwaamba ayi, ‘Ameni!’

²³ “ ‘Aashinganishikwe muntu uli woonse uyo ukumana abapongoshi bakwe banakashi.’ “Mpeeke bantu boonse balaakwaamba ayi, ‘Ameni!’

²⁴ “ ‘Aashinganishikwe muntu uli woonse uyo ucaya mubye cabushishi.’ “Mpeeke bantu boonse balaakwaamba ayi, ‘Ameni!’

²⁵ “ ‘Aashinganishikwe muntu uli woonse uyo utambula makulo ayi acaye mubye utacite mulandu.’ “Mpeeke bantu boonse balaakwaamba ayi, ‘Ameni!’

²⁶ “ ‘Aashinganishikwe muntu uli woonse uyo utakonkeli maswi oonse ali mumilawo yoonse yakwe Lesa.’ “Mpeeke bantu boonse balaakwaamba ayi, ‘Ameni’