Dutolonomi 26 - Baibo Busansulushi Bwa Libuku Ili

Shipo sha pakutebula

¹ “Ono na mukashike mucishi ico Mwaami Lesa, Lesa wanu ncaatoomupa akwikala mumo,

² noonse womwi awomwi ulyeelete kubwesa mutaanga akulongelamo shilimwa shoonse nsheshi mukataangune kutebula mubulongo buli mucishi ico Mwaami Lesa, Lesa wanu ncaatoomupa. Lyalo mukatole kumusena womwi wakulambililaako uko Mwaami Lesa nkweshi akasaale.

³ Mukaye kumupailishi weshi akanoosebensa paciindi ico akwaamba ayi, ‘Pabushiku bwasunu ndasumina kuMwaami Lesa, Lesa wangu ndakashika mucishi ico ncaakashomesha kutupa kwiinda mubamashali besu bakulukulu.’

⁴ “Mpeeke mupailishi ulaakubwesa mutaanga uyo akuubika kunembo lya cipaililo ca Mwaami Lesa, Lesa wanu.

⁵ Lyalo kunembo lya Mwaami Lesa, Lesa wanu mulaakunokwaamba ayi, ‘Mushali wangu mukulukulu wakalinga mwine Alamu shikwiingaila uyo wakatola bamuŋanda yakwe kucishi ca Ijipiti. Pakuya bakalingabo baniini, sombi bakafula akuba mushobo unene wa nkusu.

⁶ Bene Ijipiti bakatulela calunkutwe akutupensha mukutukakatisha kucita milimo iyumu.

⁷ Kuswawaawo twakalilila Mwaami Lesa, Lesa wa bamashali besu bakulukulu ayi atucafweeko. Lyalo wakanyumfwa kulila kwesu akubona mbuli mbotwakalinga kupenshekwa, kupekwa milimo iyumu alimwi ambotwakalinga kuungumana abuumbi.

⁸ Mpomunyaawo Mwaami Lesa wakatukusha mucishi ca Ijipiti kwiinda munkusu shakwe shinene. Wakacita shaankamiko ashitondesho sha nkusu sha kwiculu alimwi ashintu shiinji shiloondesha.

⁹ Kuswawaawo wakatuleta kumusena uno mucishi muli bubile abulongo bubotu.

¹⁰ Ono ndaleeta shakulya shitaanshi kutebulwa isho Mwaami Lesa nshaakampa.’ “Lyalo mukabike mutaanga uyo kunembo lya Mwaami Lesa, Lesa wanu akumulambila.

¹¹ Mpeeke mwebo abana banu mulyeelete kusekelela pashintu shoonse Mwaami Lesa, Lesa wanu nshaamucitila. Bene Lefi alimwi abaswamashi mbomwikalaabo bakasekelele pantu pomwi amwebo.

¹² “Mumwaaka watatu woonse, mukape shalikumi shanu sha shakulya shoonse kubene Lefi, baswamashi, bana banshiwa alimwi abamukalubinje banakashi, kwaamba ayi mumandabala anu oonse bakanooba ashakulya.

¹³ Kuswawaawo mukaambile Mwaami Lesa, Lesa wanu ayi, ‘Ndakusha cipansha ca likumi cisalalite kuswa muŋanda yangu akupa bene Lefi, baswamashi, bana banshiwa alimwi abamukalubinje banakashi kweelana ambomwandwiita. Nshina kupwaya milawo yanu nabi kwiilubaako, sobwe.

¹⁴ Taaku cipansha ca likumi nabi comwi ncendakalya ndindakalinga kucite cililo, taaku nabi comwi ncendakakusha muŋanda ndindakalinga kutasalalite kweelana aMilawo, alimwi taaku nabi comwi ncendakapa ayi ncipo kubafu. Anu ndakamunyumfwila noBaami baLesa, baLesa bangu akucita shoonse nshemwakandwiita.

¹⁵ Ono amulange panshi kuswa kwiculu kusalalite uko kuli cuuna canu akupa bantu banu bene Isilaeli coolwe. Cishi acalo ico ncemwakashomesha kubamashali besu bakulukulu ayi mulaakutupa, cishi muli bubile abulongo bubotu.’

Bantu ba Mwaami Lesa bakonkela milawo yakwe

¹⁶ “Pabushiku bwasunu, Mwaami Lesa, Lesa wanu wamwaambila ayi munookonkela milawo amilasho yakwe yoonse. Munokwiikonkela amyoyo yanu yoonse alimwi abuumi bwanu boonse.

¹⁷ Mwebo mwasumina sunu ayi Mwaami Lesa nguLesa wanu, alimwi ayi munanokweenda munshila shakwe shoonse akukonkela milawo amilasho yakwe yoonse.

¹⁸ Alakwe pabushiku bwasunu Mwaami Lesa, Lesa wanu wasumina ayi muli bantu bakwe mwiine, kweelana ambwaakashomesha. Paceebo ceeco wamwaambila ayi munoolama milawo yakwe yoonse.

¹⁹ Ncakwiila washomesha ayi ulaakumusumpula kwiinda mishobo yoonse njaakalenga, amwebo mulaakunoomulumbaisha, akumulemeka. Anu mulaakuba bantu bakwe cancinencine kweelana ambwaakashomesha.”